ނިއު ރޭޑިއަންޓް ބަލިކޮށް، މާޒިޔާގެ ރެކޯޑު ކުރިއަށް

މިހާރު ކުރިއަށްދާ ދިރާގު ދިވެހި ޕްރިމިއަރ ލީގުގައި ވާދަވެރި ނިއު ރޭޑިއަންޓް ސްޕޯޓްސް ކުލަބާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން އިން އެ ޓީމުގެ މޮޅުވުމުގެ ސިލްސިލާ ދަމަހައްޓައިފި އެވެ.

ހުކުރު ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު ނިއު ރޭޑިއަންޓް އިން ކާމިޔާބު ކުރީ 2-1 އިންނެވެ. މެޗުގައި ނިއު ރޭޑިއަންޓް އިން ލަނޑު ޖަހައި ލީޑު ނަގާފައި ވަނިކޮށް، މާޒިޔާ އިން ވަނީ ފަހަތުން އަރައި ދެ ލަނޑު ޖަހައިގެން މެޗުން މޮޅުވެފަ އެވެ.

މެޗު ފަށައިގެން ނުވަ ވަނަ މިނެޓުގައި ނިއު ރޭޑިއަންޓް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ބިދޭސީ ކުޅުންތެރިޔާ ގޯމޭސް ޑަ ސިލްވާ އެވެ.

ނަމަވެސް، މެޗުގެ ފުރަތަމަ ހާފުގެ އިތުރު ވަގުތުގައި މާޒިޔާ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. މާޒިޔާ އަށް މެޗުގެ ނަތީޖާ ހަމަހަމަ ކޮށްދިނީ އަޙުމަދު އައިހަމް އެވެ.

ދެ ވަނަ ހާފު ފަށައިގެން މާޒިޔާ އިން އިތުރު ލަނޑެއް ޖެހުމަށް ކުރި މަސައްކަތުގެ ނަތީޖާ އަކީ، މެޗުގެ 66 ވަނަ މިނެޓުގައި ދެ ވަނަ ލަނޑެއް ޖަހައި ލީޑު ނެގުމެވެ. އެ ލަނޑު މާޒިޔާ އަށް ޖަހައިދިނީ ހަމްޒާ މުޙައްމަދު (ހަމްޕު) އެވެ.

މޮޅާއެކު މާޒިޔާ އިން ލީގުގެ ފުރަތަމަ ބުރު ނިންމާލީ، ކުޅުނު ހުރިހާ މެޗަކުން ވެސް މޮޅުވެގެންނެވެ. ލީގުގައި މިހާތަނަށް ކުޅެފައިވާ ނުވަ މެޗުން ވެސް މާޒިޔާ މޮޅުވެފައިވާއިރު، އެއް ވަނައިގައި އެ ޓީމު އޮތީ 27 ޕޮއިންޓާ އެކު އެވެ.

ނިއު ރޭޑިއަންޓް އިން ލީގުގެ ފުރަތަމަ ބުރު ނިންމާލީ ތިން ވަނައިގައި އޮވެގެންނެވެ. ނިއު ރޭޑިއަންޓް ކުޅެފައިވާ ނުވަ މެޗުން އެ ޓީމަށް ލިބެނީ، 17 ޕޮއިންޓެވެ. ލީގުގައި ނިއު ރޭޑިއަންޓް ދެ މެޗުން ބަލިވެފައިވާއިރު، އެއް މެޗުން ވަނީ އެއްވަރުވެފަ އެވެ.