ޔޫވީ އިން ގްރީން ބަލިކޮށްފި

ދިރާގު ދިވެހި ޕްރިމިއާ ލީގުގެ ފުރަތަމަ ބުރުގެ ފަހު މެޗުގައި ކުލަބު ގްރީން ސްޓްރީޓްސް އާ ދެކޮޅަށް ކުޅުނު މެޗުން، ޔުނައިޓެޑު ވިކްޓަރީ (ޔޫވީ) މޮޅުވެއްޖެ އެވެ.

އާދީއްތަ ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު ޔޫވީ އިން ކާމިޔާބު ކުރީ 3-1 އިންނެވެ. މެޗުގެ ފުރަތަމަ ހާފުގައި ޔޫވީ އިން އެއް ލަނޑު ޖެހިއިރު، ފަހު ހާފުގައި އެ ޓީމުން ދެ ލަނޑު ޖެހި އެވެ. އަދި ފަހު ހާފުގައި ގްރީން އިން ވެސް ވަނީ ލަނޑެއް ޖަހައިފަ އެވެ.

މެޗުގެ ފުރަތަމަ ހާފުގެ 18 ވަނަ މިނެޓުގައި ޔޫވީ އަށް ލީޑު ނަގައިދިނީ މުސްލިމް މުޙައްމަދު އެވެ. އޭގެ ފަހުން މެޗުގެ ދެ ވަނަ ހާފުގައި ޔޫވީގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ބިދޭސީ ކުޅުންތެރިޔާ މުސްތަފާ މަހުމޫދު އެލްޝާޒްލީ އެވެ.

އޭގެ ފަހުން މެޗުގެ 78 ވަނަ މިނެޓުގައި ޔޫވީގެ ތިން ވަނަ ލަނޑެއް ޖަހައި ލީޑު އިތުރަށް ފުޅާ ކޮށްދިނީ އާދަމް ޝިޔާން މުޙައްމަދު އެވެ. މެޗުގައި ގްރީންގެ ހަމަ އެކަނި ލަނޑު، މެޗުގެ 84 ވަނަ މިނެޓުގައި ޖެހީ ރިލްވާން ވަހީދު އެވެ. އެއީ އެ ޓީމަށް ލިބުނު ޕެނަލްޓީ ކާމިޔާބު ކޮށްގެން އޭނާ ޖެހި ލަނޑެކެވެ.

މި މެޗާ އެކު ލީގުގެ ފުރަތަމަ ބުރުގެ ކުޅުން ނިމިފައިވާއިރު، އެއް ވަނައިގައި އޮތީ އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން އެވެ. އެއް ވަަނައިގައި އެ ޓީމު އޮތީ ފުރަތަމަ ބުރުގައި ކުޅުނު ނުވަ މެޗުން ވެސް މޮޅުވެ، 27 ޕޮއިންޓާ އެކު އެވެ.

ދެ ވަނައިގައި އޮޑި ސްޕޯޓްސް ކުލަބަށް ނުވަ މެޗުން ލިބެނީ 22 ޕޮއިންޓެވެ. ތިން ވަަނައިގައި އޮތް ނިއު ރޭޑިއަންޓް ސްޕޯޓްސް ކުލަަބަށް ލިބެނީ 17 ޕޮއިންޓެވެ. 14 ޕޮއިންޓާ އެކު ބުރު ސްޕޯޓްސް ކުލަބު ހަތަރު ވަނައިގައި އޮތްއިރު، ފަސް ވަނައިގައި އޮތް ކުލަބު އީގަލްސް އަށް ލިބެނީ 13 ޕޮއިންޓެވެ.

ހަ ވަނައިގައި އޮތް ވިކްޓްރީ ސްޕޯޓްސް ކުލަބަށް 10 ޕޮއިންޓު ލިބޭއިރު، ހަތް ވަނައިގައި ޔޫވީ އަށް ލިބެނީ ހަތް ޕޮއިންޓެވެ. އަށް ވަަނައިގައި ކުލަބު ވެލެންސިއާ އޮތްއިރު، ނުވަ ވަނައިގައި އޮތީ ޓީސީ ސްޕޯޓްސް ކުލަބެވެ. 10 ކުލަބު ވާދަ ކުރާ ލީގުގެ ފުލުގައި އޮތީ ގްރީން އެވެ.