ފުލުގައި އޮތް ގްރީން ސްޓްރީޓްސް އިން ނިއު ހިފަހައްޓައިފި

ދިރާގު ދިވެހި ޕްރިމިއަރ ލީގުގައި ތާވަލުގެ ފުލުގައި އޮތް ކުލަބް ގްރީން ސްޓްރީޓްސް އިން ނިއުރޭޑިއަންޓް ސްޕޯޓްސް ކުލަބު މޮޅުވިޔަ ނުދީ ހިފަހައްޓައި މުހިންމު ޕޮއިންޓެއް ހޯދައިފިއެވެ.

ގައުމީ ފުޓްބޯޅަ ދަނޑުގައި ކުޅުނު މި މެޗު ނިމުނީ 2-2 ން އެއްވަރުވެގެންނެވެ.

މި މެޗު ފަށައިގެން ނިއު އިން ވަނީ ރަނގަޅު ކުޅުމެއް ދައްކާ ފުރަތަމަ ހާފުގައި ދެ ލަނޑުގެ ލީޑެއް ނަގާފައެވެ. މެޗުގެ 10 ވަނަ މިނިޓުގައި ނިއު އިން ލީޑު ނެގީ ރާއިފް ހިފައިގެން ދިޔަ ބޯޅައެއް އޭރިޔާ ތެރެއަށް ވަދެ ގޯލަށް ވައްދާލައިގެންނެވެ. މެޗުގެ 22 ވަނަ މިނިޓުގައި ނިއު އިން ލީޑު ދެ ގުނަ ކުރިއެވެ. އޭރިޔާ ތެރެއިން ނިއުގެ ކުޅުންތެރިޔަކު ފޮނުވާލި ބޯޅައެއް ގްރީން ސްޓްރީޓްސްގެ ކީޕަރު އަތުގަ ޖެހިފައި ނުކުތުމުން، ގޯލު އޭރިޔާ ތެރޭގައި ހުރި ބްރެޒިލްގެ އެޓޭކިން މިޑްފީލްޑަރ ޑެ ސިލްވަރ ވަނީ ބޯޅަ ގޯލަށް ވައްދާލާފަ އެވެ.

މެޗުގެ ފުރަތަމަ ހާފުގައި ގްރީން ސްޓްރީޓްސް ގެ މާ އެދެވޭ ހަމަލާތަކެއް ނުފެނުނެވެ. ނަމަވެސް ދެވަނަ ހާފުގައި ގްރީން ސްޓްރީޓްސް އިން ވަނީ ވަރަށް ބޮޑަށް ކުޅުން ރަނގަޅުކޮށް، ނިއުގެ ފަހަތަށް ބާރުބޮޑު ކޮއްފައެވެ.

ގްރީން ސްޓްރީޓްސްގެ މަސައްކަތުގެ ނަތީޖާ ފެނިގެން ދިޔައީ މެޗުގެ 55 ވަނަ މިނިޓުގައެވެ. ޕެނަލްޓީ އަކުން މިސްރުގެ އެލްސައީދު އަބްދެލްފައްތާހު ވަނީ ގްރީން ސްޓްރީޓްސްގެ ފުރަތަމަ ލަނޑު ޖަހައި، އެޓީމަށް އުންމީދެއް ގެނެސްދީފައެވެ. މި ލަނޑުން ފަހު ގްރީން ސްޓްރީޓްސް އިން ވަނީ ކުރިއަށް ޖެހި އިތުރު ލަނޑެއް ޖަހަން މަސައްކަތެއް ކޮށްފައެވެ.

ގްރީން ސްޓްރީޓްސްގެ މަސައްކަތް ކާމިޔާބުވީ މެޗު ނިމެން ދެ މިނިޓަށް ވެފައި ވަނިކޮށެވެ. މެޗުހެ 88 ވަނަ މިނިޓުގައި އުޒްބެކިސްތާންގެ ޑިފެންޑަރު ޝުކްރާލީ ޕުލާޓޯވް ވަނީ ގްރީން ސްޓްރީޓްސްގެ ދެވަނަ ލަނޑު ޖަހައި، މެޗު އެއްވަރުކޮށްދީފަ އެވެ.

މި މެޗުން ލިބުނު އެއް ޕޮއިންޓާއެކު ނިއުރޭޑިއަންޓް އަށް 7 މެޗުން 17 ޕޮއިންޓް ލިބިފައިވާއިރު، އެޓީމު އޮތީ ތާވަލުގެ ދެވަނައިގައެވެ. ނިއު އަށް ވުރެ އެއް ޕޮއިންޓް މަދުން ހޯދައިގެން އޮޑި ސްޕޯޓްސް ކުލަބު އޮތީ ތިންވަނައިގައެވެ. ތާވަލު ކުރީގައި އޮތް މާޒިޔާ އާއި ނިއު ދެމެދު އޮތީ ހަތަރު ޕޮއިންޓުގެ ފަރަގެކެވެ.

މި މެޗުން ލިބުނު މުހިންމު ޕޮއިންޓާއެކު ގްރީން ސްޓްރީޓްސް ވަނީ 7 މެޗުން 4 ޕޮއިންޓު ހޯދައިގެން ތާވަލުގެ ފުލުން ކުރިއަށް ޖެހިލާފައެވެ.