ދިރާގު ދިވެހި ޕްރިމިއާ ލީގުގައި ބުރާސްފަތި ދުވަހުގެރޭ ކުލަބު ގްރީން ސްޓްރީޓްސް އާއި ކުލަބު އީގަލްސް ބައްދަލުކުރި މެޗު އެއްވަރުވެއްޖެއެވެ.
ޤައުމީ ފުޓްބޯޅަ ދަނޑުގައި ކުޅުނު މެޗު އެއްވަރުވީ 1-1 ގެ ނަތީޖާއަކުންނެވެ.
ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗުގެ ވަރަށް ކުރީކޮޅު އީގަލްސްއިން ވަނީ ލީޑު ނަގާފައެވެ. އެގޮތުން މެޗުގެ 14 ވަނަ މިނެޓުގައި ލިބުނު ޕެނަލްޓީއަކުން މި ލަނޑު އީގަލްސްއަށް ކާމިޔާބުކޮށްދިނީ މުޙައްމަދު ނާއިމެވެ. މިއީ އޭރިއާ ތެރެއިން ގްރީންގެ ޑިފެންޑަރު މުޙައްމަދު ސާއިފުގެ އަތުގައި ބޯޅަ ޖެހުމުން ރެފުރީ ދިން ޕެނަލްޓީއެކެވެ. މި ލަނޑާއެކު ފުރަތަމަ ހާފުގައި ގްރީނުން ކުރިއަށް ޖެހި އީގަލްސްގެ ހާފަށް ބާރު ބޮޑުކުރި ނަމަވެސް، މާކަ ނުރައްކާތެރު ހަމަލާއެއް އެޓީމަށް އުފެއްދިފައެއް ނުވެފައެވެ.
މެޗުގެ ދެވަނަ ހާފުގައިވެސް ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މި ހާފުގައި އީގަލްސްގެ ސައިފުﷲ އިބްރާހީމަށް ވަނީ ލަނޑު ޖަހަން ހުސް ފުރުޞަތެއް ލިބި ބޭކާރުވެފައެވެ. އެގޮތުން އޭރިއާ ތެރެއިން ހުހަށްހުރެ އޭނާ ފޮނުވާލި ހަމަލާ ދިޔައީ ގޯލުގެ ހުރަސް ދަނޑި މަތިން ބޭރަށެވެ. އެއާއެކު މެޗުގެ 65 ވަނަ މިނެޓުގައި ގްރީނުން ވަނީ ނަތީޖާ އެއްވަރުކޮށްފައެވެ. ހިލޭ ޖެހުމަކުން މި ލަނޑު އެ ޓީމަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި އަބްދުﷲ ޔާމީން (ޔާނު) އެވެ.
އޭގެ ފަހުން އަލުން ލީޑު ނަގަން އީގަލްސްގެ އިމްރާން ނަޝީދު (އިންމަ) އަށް ހުސް ފުރުޞަތެއް ލިބި ބޭކާރުވިއިރު، މެޗުގެ 78 ވަނަ މިނެޓުގައި އެ ޓީމުގެ ނާއިމަށްވެސް ވަނީ ރަނގަޅު ފުރުޞަތެއް ލިބިފައެވެ. އެކަމަކު އޭރިއާ ތެރެއިން އޭނާ ފޮނުވާލި ހަމަލާ ގްރީންގެ ގޯލްކީޕަރު ހަނީފް ސާގިބް ވަނީ ހުށިޔާރުކަމާއެކު ދިފާޢުކޮށްފައެވެ.
މި މެޗަށްފަހު ވާހަކަދައްކަމުން ގްރީންގެ ކޯޗު އަލީ ނިސްތާރު މުޙައްމަދު ބުނީ މެޗުން ޕޮއިންޓެއް ލިބުމުން އެކަމާއި ހިތްހަމަޖެހޭ ކަމަށާއި، އެކަމަކު ގެއްލިގެން ދިޔައީ ތިން ޕޮއިންޓް ހޯދޭނެ މެޗެއް ކަމަށެވެ.
އީގަލްސްގެ ކޯޗު މުޙައްމަދު ޝާޒްލީ (ޝާޒް) ބުނީ މެޗުގައި އީގަލްސްގެ ފަރާތުން ފެނިގެންދިޔަ ކުޅުމާ މެދު ހިތްހަމަޖެހޭ ކަމަށާއި، އެކަމަކު ނަތީޖާއާ މެދު ހިތްހަމަނުޖެހޭ ކަމަށެވެ. އަދި ކުރިއަށް ހުރި މެޗުތަކުގައި ޓީމަށް ދިމާވެފައިވާ ލަނޑު ޖެހުމުގެ މައްސަލަ ރަނގަޅު ކުރުމަށް މަސައްކަތް ކުރާނެ ކަމަށްވެސް ޝާޒްލީ ބުންޏެވެ.
މި ނަތީޖާއާއެކު ގްރީން އޮތީ ތާވަލުގެ ތިންވަނައިގައި ކުޅުނު 13 މެޗުން ލިބުނު 19 ޕޮއިންޓާއެކުއެވެ. އަދި އީގަލްސް އޮތީ ތާވަލުގެ ހަވަނައިގައި 11 މެޗުން 13 ޕޮއިންޓާއެކުއެވެ.
