ޔޫވީ ބަލިކޮށް އީގަލްސް އިން ގަދަ ހަތަރަކަށް

ދިވެހި ޕްރިމިއާ ލީގުގައި ހޮނިހިރު ދުހަވަހުގެ ރޭ ކުޅުނު މެޗުން ޔުނައިޓެޑް ވިކްޓަރީ (ޔޫވީ) 3-1 އިން ބަލިކޮށް، ކްލަބް އީގަލްސް އިން ލީގުގެ ހަތަރު ވަނަ އަށް ޖެހިލައިފި އެވެ.

ގަލޮޅު ދަނޑުގައި ކުޅުނު މެޗުގައި، އީގަލްސް އިން ލީޑުނެގީ އިބްރާހިމް މަހުދީ ހުސެއިން (ފޭދޫ އިއްބެ) ބޮލުން ޖެހި ގޯލުންނެވެ. މެޗުގެ 25 ވަނަ މިނިޓްގައި އީގަލްސްގެ ފުލްބެކް، އަބްދުލްމަލިކް ނެގި ބޯޅަ ފޭދޫ އިއްބެ ބޮލުން ފޮނުވާލިއިރު، ބޯޅަ ގޯލަށް ވަނީ ޔުނައިޓެޑް ވިކްޓަރީގެ ބިދޭސީ ކީޕަރު، އަލީ އާދެލް މުސްތަފާ އަލީ އަތުގައި ޖެހިފަ އެވެ. މެޗުގެ 36 ވަނަ މިނިޓްގައި، އީގަލްސްގެ ދެ ވަނަ ގޯލު ޖެހީ ބިދޭސީ މިޑްފީލްޑަރު، އިބްރާހިމް ލެބޭ އެވެ. މިއީ ފޭދޫ އިއްބެ ދިން ބޯޅައެއް މެއިން ކޮންޓްރޯލް ކުރުމަށް ފަހު ލެބޭ ޖެހި ގޯލެކެވެ.

ފުރަތަމަ ހާފު ނިމުމުގެ ކުރިން އީގަލްސްގެ ތިން ވަަނަ ގޯލު ޖެހީ، 43 ވަނަ މިނިޓްގައި އެ ޓީމުގެ ފުލްބެކް، ޔޫސުފް ސިދާމް އަލީ (ސިއްކޮ) އެވެ. އީގަލްސްގެ ކެޕްޓަން، އަހުމަދު ރިޒްވާން (ރިޒޭ) ދިން ބޯޅަ އޭރިއާތެރެއިން ކޮންޓްރޯލް ކުރުމަށް ފަހު، ސިއްކޮ ވަނީ ގޯލުގެ ކައިރީ ކަނަށް ފޮނުވާލާފަ އެވެ.

ދެ ވަނަ ހާފުގައި ޔުނައިޓެޑް ވިކްޓަރީން ވަނީ ލަނޑެއް ޖަހާފަ އެވެ. މި ލަނޑު އެ ޓީމަށް ކާމިޔާބު ކޮށްދިނީ އިޝްއާފް މުހައްމަދު ފިރާގު އެވެ. މެޗުގެ 67 ވަނަ މިނިޓްގައި، އީގަލްސް އޭރިއާ ތެރެއިން ލިިބުނު ބޯޅަ އިޝްއާފު ވަނީ ހަމަޖެހިލާފަ ގޯލަށް ފޮނުވާލާފަ އެވެ.

މި މެޗުން މޮޅުވުމުން ލީގުގެ ހަތަރު ވަނައިގައި އީގަލްސް އޮތީ ހަތް މެޗުން ލިބުނު ނުވަ ޕޮއިންޓާ އެކު އެވެ. މެޗުން ބަލިިވި، ޔުނައިޓެޑް ވިކްޓަރީ ލީގުގެ ހަތް ވަނައިގައި އޮތީ ހަތް މެޗުން ލިބުނު ހަތަރު ޕޮއިންޓާ އެކު އެވެ.

ލީގުގެ އެއް ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަން އަށް ހަތް މެޗުން 21 ޕޮއިންޓް، ދެ ވަނައިގައި އޮތް ނިއު ރޭޑިއަންޓް ސްޕޯޓްސް ކްލަބަށް ހަތް މެޗުން 17 ޕޮއިންޓް ލިބިފައިވާއިރު، ތިން ވަނައިގައި އޮތް އޮޑި ސްޕޯޓްސް ކްލަބަށް ވަނީ ހަތް މެޗުން 16 ޕޮއިންޓް ލިބިފަ އެވެ.