ބެޓިސްއާ އެއްވަރުވި ނަމަވެސް، އެތުލެޓިކޯ އެއްވަނައަށް

ސްޕެނިޝް ލީގުގައި އާދީއްތަ ދުވަހުގެރޭ ރެއާލް ބެޓިސްއާ އެއްވަރުވި ނަމަވެސް، ތާވަލުގެ އެއްވަނައަށް އެތުލެޓިކޯ މެޑްރިޑް އަލުން އަރައިފިއެވެ.

އާދީއްތަ ދުވަހުގެރޭ ބެޓިސް އާއި އެތުލެޓިކޯ ބައްދަލުކުރި މެޗު އެއްވަރުވީ 1-1 ގެ ނަތީޖާއަކުންނެވެ.

ބެޓިސްގެ ދަނޑުގައި ކުޅުނު މި މެޗުގައި ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔައިރު، މެޗުގެ ވަރަށް ކުރީކޮޅު އެތުލެޓިކޯއިން ވަނީ ލީޑު ނަގާފައެވެ. އެގޮތުން މެޗު ފަށައިގެން ފަސްވަނަ މިނެޓުގައި އޭރިއާ ތެރެއިން އެންހެލް ކޮރެއާ ދިން ޕާހަކުން މި ލަނޑު އެތުލެޓިކޯއަށް ކާމިޔާބުކޮށްދިނީ ޔަނިކް ކަރަސްކޯއެވެ.

އެކަމަކު އޭގެ ފަހުން ބެޓިސްއިިން ކުޅުން ރަނގަޅުކުރިއިރު، މެޗުގެ 20 ވަނަ މިނެޓުގައި އެ ޓީމުން ވަނީ ނަތީޖާ އެއްވަރުކޮށްފައެވެ. އެލެކްސް މޮރޭނޯ ހުރަސްކޮށްދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ކްރިސްޓިއަން ޓެލޯއެވެ. އަދި އޭގެ ފަހުންވެސް މި މެޗުގައި ލީޑު ނަގަން ދެ ޓީމަށްވެސް ވަނީ ރަނގަޅު ފުރުޞަތުތަކެއް ލިބި ބޭކާރުވެފައެވެ.

މި ނަތީޖާއާއެކު ތާވަލުގެ އެއްވަނައަށް އެތުލެޓިކޯ ޖެހިލިއިރު، ކުޅުނު 30 މެޗުން އެ ޓީމަށް ވަނީ 67 ޕޮއިންޓް ލިބިފައެވެ. ދެވަނައިގައި އޮތް އެންމެ ފަހުގެ ޗެމްޕިއަން ރެއާލް މެޑްރިޑަށް 30 މެޗުން 66 ޕޮއިންޓް ލިބިފައިވާއިރު، ތިންވަނައިގައި އޮތް ބާސެލޯނާއަށް 30 މެޗުން ލިބިފައިވަނީ 65 ޕޮއިންޓެވެ. އަދި އެތުލެޓިކޯއާ އެއްވަރުކުރި ބެޓިސް އޮތީ ތާވަލުގެ ހަވަނައިގައި 30 މެޗުން 47 ޕޮއިންޓާއެކުއެވެ.