އަލްވަރޭޒްގެ ދެ ލަނޑާ އެކު އެތުލެޓިކޯ އިން ރެއާލް ލަދު ގަންނަވާލައިފި

ސްޕެނިޝް ލީގުގައި އެތުލެޓިކޯ މެޑްރިޑާ ދެކޮޅަށް ކުޅުނު މެޗުން، ރެއާލް މެޑްރިޑަށް ލަދުވެތި ބައްޔަކާ ކުރިމަތިލާން ޖެހިއްޖެ އެވެ.

އެތުލެޓިކޯގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗުގައި އެ ޓީމުން ވަނީ 5-2 އިން ރެއާލްގެ މައްޗަށް ކުރި ހޯދައިފަ އެވެ. މެޗުގައި އެތުލެޓިކޯ އިން ލީޑު ނަގާފައި ވަނިކޮށް، ރެއާލް އިން ފަހަތުން އަރައި ލީޑު ވެސް ނެގި އެވެ. އޭގެ ފަހުން އިތުރު ހަތަރު ލަނޑު ޖަހައިގެން އެތުލެޓިކޯ ވަނީ މެޗުން މޮޅުވެފަ އެވެ.

މެޗު ފަަށައިގެން 14 ވަނަ މިނެޓުގައި އެތުލެޓިކޯ އަށް ލީޑު ނަގައިދިނީ ރޮބިން ލީ ނޯމަންޑް އެވެ. އެއީ ޖިއުލިއާނޯ ސިމިއޯން ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ފަހުން މެޗުގެ 25 ވަނަ މިނެޓުގައި ރެއާލް އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު ރެއާލް އަށް ޖަހައިދިނީ ފްރާންސްގެ ކެޕްޓަން ކީލިއަން އެމްބާޕޭ އެވެ.

އޭގެ ފަހުން މެޗުގެ 36 ވަނަ މިނެޓުގައި ރެއާލް އިން ވަނީ ލީޑު ނަގައިފަ އެވެ. ވިނީޝިއުސް ޖޫނިއާ ތަނަވަސްކޮށްދިން ފުރުސަތެއްގައި ރެއާލް އަށް ލީޑު ނަގައިދިނީ އާޑާ ގުލާ އެވެ. ނަމަވެސް، ފުރަތަމަ ހާފުގެ އިތުރު ވަގުތުގައި އެލެގްޒެންޑާ ސޯލޮތު ޖެހި ލަނޑުންް އެތުލެޓިކޯ އިން ވަނީ ނަތީޖާ ހަމަހަމަ ކޮށްފަ އެވެ.

ދެ ވަނަ ހާފު ފަށައިގެން ހަ ވަނަ މިނެޓުގައި އެތުލެޓިކޯ އަށް ލިބުނު ޕެނަލްޓީ ކާމިޔާބުކޮށް، ދެ ވަނަ ފަހަރަށް ލީޑު ނަގައިދިނީ އާޖެންޓީނާގެ ހޫލިއަން އަލްވަރޭޒް އެވެ. އޭގެ ފަހުން 63 ވަނަ މިނެޓުގައި އަލްވަރޭޒް ވަނީ އިތުރު ލަނޑެއް ޖަހައި އެތުލެޓިކޯގެ ލީޑު ފުޅާ ކޮށްފަ އެވެ. އަދި މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އެތުލެޓިކޯގެ ފަސް ވަނަ ލަނޑު ޖެހީ އެންޓޮއިން ގްރީޒްމަން އެވެ.

މިއީ މި ސީޒަންގެ ލީގުގައި ރެއާލްގެ ފުރަތަމަ ބައްޔެވެ. ލީގުގައި މިހާތަނަށް ކުޅެފައިވާ ހަ މެޗުން 18 ޕޮއިންޓާ އެކު ރެއާލް އޮތީ އެއް ވަނައިގަ އެވެ. ރެއާލް އަށް ވުރެ އެއް މެޗު މަދުން ކުޅެގެން ދެ ވަަނައިގައި އެންމެ ފަހުގެ ޗެމްޕިއަން ބާސެލޯނާ އަށް ލިބެނީ 16 ޕޮއިންޓެވެ. މެޗުގެ އަދަދު ހަމަކޮށް، އެއް ވަނަ ޖެހިލުމުގެ ފުރުސަތު މިހާރު ބާސެލޯނާ އަށް އޮންނާނެ އެވެ.

ރެއާލް އަތުން މޮޅުވި އެތުލެޓިކޯ އޮތީ ހަތް މެޗުން 12 ޕޮއިންޓާ އެކު ހަތަރު ވަނައިގަ އެވެ.