އެތުލެޓިކޯ ބަލިކޮށް، ބާސެލޯނާ އެއް ވަނައިގައި
3 ޑިސެމްބަރު 2025 | ބުދަ 03:34މޮޅާއެކު ބާސެލޯނާ އެއް ވަނައިގައި އޮތީ މިހާތަނަށް ކުޅެފައިވާ 15 މެޗުން 37 ޕޮއިންޓާ އެކު އެވެ. ބާސެލޯނާ އަށް ވުރެ އެއް މެޗު މަދުން ކުޅެގެން ދެ ވަަނައިގައި އޮތް ރެއާލް މެޑްރިޑަށް ލިބެނީ 33 ޕޮއިންޓެވެ. ލީގުގައި ބުދަ ދުވަހުގެ ރޭ ކުޅޭ މެޗުން މޮޅުވެ، ފަރަގު އެއް ޕޮއިންޓަށް ކުޑަ ކުރުމުގެ ފުރުސަތު ރެއާލް އަށް އޮންނާނެ އެވެ.
މެޗުގައި ލަނޑު ޖެހުމަށް ފަހު ބާސެލޯނާގެ ކުޅުންތެރިން އުފާ ފާޅު ކުރަނީ | ރޮއިޓާސް
ސްޕެނިޝް ލީގުގައި އެތުލެޓިކޯ މެޑްރިޑާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ބާސެލޯނާ އިން އެއް ވަނައިގައި ލީޑު ފުޅާ ކޮށްފި އެވެ.
އަންގާރަ ދުވަހުގެ ރޭ ދަންވަރު ބާސެލޯނާގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 3-1 އިންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ އެތުލެޓިކޯ އިންނެވެ. ނަމަވެސް، ބާސެލޯނާ އިން ވަނީ ފަހަތުން އަރައި ތިން ލަނޑު ޖަހައިގެން މެޗުން މޮޅުވެފަ އެވެ.
މެޗު ފަށައިގެން 19 ވަނަ މިނެޓުގައި އެތުލެޓިކޯ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ އެލެކްސް ބައެނާ އެވެ. އެއީ ނަހުއެލް މޮލީނާ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.
ނަމަވެސް، މެޗުގެ 26 ވަނަ މިނެޓުގައި ބާސެލޯނާ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. ސްޕެއިންގެ ޕެޑްރީ ތަނަވަސްކޮށްދިން ފުރުސަތެއްގައި ބާސެލޯނާ އަށް ނަތީޖާ ހަމަހަމަ ކޮށްދިނީ ރަފީނިއާ އެވެ.
މެޗުގައި ބާސެލޯނާ އިން ދެ ވަނަ ލަނޑެއް ޖަހައި ލީޑު ނެގީ މެޗުގެ ދެ ވަނަ ހާފުގަ އެވެ. އެގޮތުން މެޗުގެ 65 ވަނަ މިނެޓުގައި ބާސެލޯނާ އަށް ލީޑު ނަގައިދިނީ ޑެނީ އޮލްމޯ އެވެ. އޭގެ ފަހުން މެޗުގައި ބާސެލޯނާގެ ތިން ވަނަ ލަނޑު، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ޖެހީ ފެރާާން ޓޮރޭސް އެވެ.
މެޗަށް ފަހު ވާހަކަ ދައްކަމުން ބާސެލޯނާގެ ކޯޗު ހަންސީ ފްލިކް ބުނެފައި ވަނީ، އެ މެޗުގައި ބާސެލޯނާގެ ކުޅުން ފެނުނީ އެހެން ފެންވަރެއްގައި ކަމަށެވެ. އެތުލެޓިކޯ އަކީ ވަރަށް ރަނގަޅު އަދި ވަރުގަދަ ޓީމެއްކަން ފާހަގަކޮށް ފްލިކް ބުނީ، އެ ޓީމާ ދެކޮޅަށް ފެނުނީ ކުޅުންތެރިން އެކުވެގެން ކުރި މަސައްކަތުގެ ނަތީޖާ ކަމަށެވެ.
މޮޅާ އެކު ވަރަށް ބޮޑު ހިތްހަމަ ޖެހުމެއްގައި ހުރިކަން ފާހަގަ ކުރަމުން ފްލިކް ބުނެފައި ވަނީ، ކުޅުމާ ދުރުގައި ތިބި ކުޅުންތެރިން އެނބުރި އައިސް ޓީމު ރަނގަޅު ވަމުން އަންނަ ކަމަށެވެ. އޭގެ ތެރެއިން ވެސް ބައެއް ކުޅުންތެރިން މުޅިން ފިޓު ނޫން ކަމަށާއި، އެހެންވެ ބަދަލު ތަކެއް ގެންނަން ޖެހުނީ ކަމަށް އޭނާ ބުންޏެވެ. މެޗުގައި ދެއްކި ކުޅުމާއި، ހޯދި ފުރުސަތު އަދި ނަތީޖާ އަކީ ވަރަށް ޕޮސިޓިވް ކަންތައްތަކެއް ކަމަށް ވެސް ފްލިކް ބުނެފައިވެ އެވެ.
މޮޅާއެކު ބާސެލޯނާ އެއް ވަނައިގައި އޮތީ މިހާތަނަށް ކުޅެފައިވާ 15 މެޗުން 37 ޕޮއިންޓާ އެކު އެވެ. ބާސެލޯނާ އަށް ވުރެ އެއް މެޗު މަދުން ކުޅެގެން ދެ ވަަނައިގައި އޮތް ރެއާލް މެޑްރިޑަށް ލިބެނީ 33 ޕޮއިންޓެވެ. ލީގުގައި ބުދަ ދުވަހުގެ ރޭ ކުޅޭ މެޗުން މޮޅުވެ، ފަރަގު އެއް ޕޮއިންޓަށް ކުޑަ ކުރުމުގެ ފުރުސަތު ރެއާލް އަށް އޮންނާނެ އެވެ.
