ފަހު ވަގުތު އެތުލެޓިކޯ އަތުން ލިވަޕޫލް މޮޅުވެއްޖެ

ޔުއެފާ ޗެމްޕިއަންސް ލީގުގައި އެތުލެޓިކޯ މެޑްރިޑްއާ ދެކޮޅަށް ކުޅުނު މެޗުން ފަހު ވަގުތު ލިވަޕޫލް މޮޅުވެއްޖެ އެވެ.

ލިވަޕޫލްގެ އަމިއްލަ ދަނޑު އެންފީލްޑުގައި ބުދަ ދުވަހުގެ ރޭ ދަންވަރު ކުޅުނު މެޗު އެ ޓީމުން ކާމިޔާބު ކުރީ 3-2 އިންނެވެ. މެޗުގައި ލިވަޕޫލް އިން ދެ ލަނޑު ޖަހައިގެން ކުރި ހޯދާފައި ވަނިކޮށް، އެތުލެޓިކޯ އިން ފަހަތުން އަރައި ދެ ލަނޑު ޖަހައިގެން ނަތީޖާ ހަމަހަމަ ކުރި އެވެ. ނަމަވެސް ފަހު ވަގުތު ލިވަޕޫލް ވަނީ ލަނޑު ޖަހައި މޮޅުވެފަ އެވެ.

މެޗު ފަށައިގެން ހަތަރު ވަނަ މިނެޓުގައި ލިވަޕޫލް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ އެންޑީ ރޮބާޓްސަން އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ މިޞްރުގެ ފޯވާޑު މުޙައްމަދު ޞަލާޙު އެވެ.

އޭގެ ދެ މިނެޓު ފަހުން ޞަލާޙ ވަނީ ލިވަޕޫލްގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެއީ ރަޔަން ގްރެވެންބާޗް ތަނަވަސްކޮށްދިން ފުރުސަތެއްގައި ޞަލާޙު ޖެހި ލަނޑެކެވެ.

މެޗުގެ ފުރަތަމަ ހާފުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އެތުލެޓިކޯ އިން ފުރަތަމަ ލަނޑު ޖަަހައި ފަރަގު ކުޑަ ކުރި އެވެ. ޖިއާކޮމޯ ރަސްޕަޑޯރީ ތަނަވަސްކޮށްދިން ފުރުސަތެއްގައި އެ ލަނޑު ޖެހީ މާކޮސް ލޮރެންޓޭ އެވެ.

މެޗުގެ ނަތީޖާ ހަމަހަމަ ކުރުމަށް އެތުލެޓިކޯ އިން ކުރި މަސައްކަތް އެ ޓީމަށް ކާމިޔާބު ކުރެވުނީ މެޗުގެ ފަހު ދިހަ މިނެޓުގެ ތެރޭގަ އެވެ. މެޗުގެ 81 ވަނަ މިނެޓުގައި އެތުލެޓިކޯ އަށް ނަތީޖާ ހަމަހަމަ ކޮށްދިނީ ވެސް ލޮރެންޓޭ އެވެ.

ނަމަވެސް، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ލިވަޕޫލްގެ ވާާޖިލް ވެން ޑައިކް ވަނީ ލަނޑު ޖަހައި އެ ޓީމު މެޗުން މޮޅު ކޮށްދީފަ އެވެ. އެ ލަނޑު އޭނާ ޖެހީ ޑޮމިނިކް ސޮބޮސްލާއީ ތަނަވަސްކޮށްދިން ފުރުސަތެއްގަ އެވެ.