ސެވިއްޔާ ބަލިކޮށް، އެތުލެޓިކޯ ތިން ވަނައިގައި

ސްޕެނިޝް ލީގުގައި ސެވިއްޔާއާ ދެކޮޅަށް ކުޅުނު މެޗުން މޮޅުވެ، އެތުލެޓިކޯ މެޑްރިޑު ލީގު ތާވަލްގެ ތިން ވަނަ އަށް ޖެހިލައިފި އެވެ.

އާދީއްތަ ދުވަހުގެ ރޭ އެތުލެޓިކޯގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 4-3 އިންނެވެ. މެޗުގައި އެތުލެޓިކޯ އިން ލަނޑު ޖަހައި ލީޑު ހޯދާފައި ވަނިކޮށް، ސެވިއްޔާ އިން ފަހަތުން އަރައި ތިން ލަނޑު ޖަހައިގެން ލީޑު ހޯދި އެވެ. ނަމަވެސް އެތުލެޓިކޯ އިން ވަނީ އިތުރު ތިން ލަނޑު ޖަހައިގެން މެޗުން މޮޅުވެފަ އެވެ.

މެޗު ފަށައިގެން ދިހަ ވަނަ މިނެޓުގައި އެތުލެޓިކޯ އަށް ލަނޑު ޖަހައި ލީޑު ނަގައިދިނީ ރޮޑްރިގޯ ޑި ޕައުލް އެވެ. އޭގެ ދެ މިނެޓު ފަހުން ޑޯޑީ ލުކެބާކިއޯ ވަނީ ލަނޑު ޖަހައި ސެވިއްޔާ އަށް ނަތީޖާ ހަމަހަމަ ކޮށްދީފަ އެވެ. އޭގެ ފަހުން ފުރަތަމަ ހާފުގެ 32 ވަނަ މިނެޓުގައި ސެވިއްޔާ އަށް ލީޑު ނަގައިދިނީ އިސާކް ރިމޭރޯ އެވެ. ފުރަތަމަ ހާފުގައި ސެވިއްޔާގައި ހޫލިއަން އަލްވަރޭޒް ލަނޑެއް ޖެހި ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ އެ ލަނޑު ބަލައި ނުގަންނަން ނިންމައިފަ އެވެ.

ދެ ވަނަ ހާފު ފަށައިގެން ބާރަ ވަނަ މިނެޓުގައި ހުއާންލޫ ސަންޗޭޒް ވަނީ ސެވިއްޔާގެ ތިން ވަނަ ލަނޑު ޖަހައި ލީޑު ފުޅާ ކޮށްފަ އެވެ. އޭގެ ފަސް މިނެޓު ފަހުން އެތުލެޓިކޯގެ އެންޓޮއިން ގްރީޒްމަން ވަނީ އެ ޓީމުގެ ދެ ވަނަ ލަނޑެއް ޖަހައި ފަރަގު ކުޑަ ކޮށްފަ އެވެ. އެތުލެޓިކޯ އަށް މެޗުގެ ނަތީޖާ ހަމަހަމަ ކޮށްދިނީ 79 ވަނަ މިނެޓުގައި ސަމުއެލް ލިނޯ އެވެ. އަދި މެޗުން އެތުލެޓިކޯ މޮޅުވީ މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ގްރީޒްމަން ޖެހި ލަނޑުންނެވެ.

މޮޅާއެކު އެތުލެޓިކޯ ތިން ވަނައިގައި އޮތީ މިހާތަނަށް އެ ޓީމު ކުޅެފައިވާ 16 މެޗުން 35 ޕޮޮއިންޓާ އެކު އެވެ.