އެތުލެޓިކޯ އިން މަޔޯކާ ބަލިކޮށްފި

ސްޕެނިޝް ލީގުގައި މަޔޯކާއާ ދެކޮޅަށް ކުޅުނު މެޗުން އެތުލެޓިކޯ މެޑްރިޑު މޮޅުވެއްޖެ އެވެ.

އެތުލެޓިކޯގެ އަމިއްލަ ދަނޑުގައި ހޮނިހިރު ދުވަހުގެ ރޭ މަޔޯކާއާ ދެކޮޅަށް ކުޅުނު މެޗު އެ ޓީމުން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި އެތުލެޓިކޯ އިން އެެއް ލަނޑު ޖެހިއިރު، ދެ ވަނަ ހާފުގައި ވަނީ ދެ ވަނަ ލަނޑެއް ޖަހައިފަ އެވެ.

މެޗުގެ ފުރަތަމަ ހާފުގެ 25 ވަނަ މިނެޓުގައި އެތުލެޓިކޯ އަށް ލީޑު ހޯދައިދިނީ ސަމުއެލް ލިނޯ އެވެ. އެއީ ޖިއުލިއާނޯ ސިމޯނޭ ތަނަވަސްކޮށްދިން ފުރުސަތެއްގައި ލިނޯ ޖެހި ލަނޑެކެވެ. މެޗުގައި އިތުރު ލަނޑު ޖަހާނެ ފުރުސަތުތަކެއް ވެސް އެތުލެޓިކޯ އިން ވަނީ ތަނަވަސްކޮށްފަ އެވެ. އެގޮތުން އެ ޓީމުގެ ހޫލިއަން އަލްވަރޭޒް އަދި އެންޓޮއިން ގްރީޒްމަން އަށް ވެސް ވަނީ ލަނޑު ޖަހާނެ ފުރުސަތު ލިބިފަ އެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އެތުލެޓިކޯގެ ދެ ވަނަ ލަނޑު ޖެހީ ގްރީޒްމަން އެވެ. މެޗުގައި އޭނާ ކުޅެން ނިކުތީ ވެސް ބަދަލު ކުޅުންތެރިޔެއްގެ ގޮތުގަ އެވެ.

މޮޅާއެކު އެތުލެޓިކޯ އޮތީ ދެ ވަނައިގަ އެވެ. އެއީ މިހާތަނަށް އެ ޓީމު ކުޅެފައިވާ 22 މެޗުން 48 ޕޮއިންޓާ އެކު އެވެ. މިހާތަނަށް 14 މެޗުން އެތުލެޓިކޯ މޮޅުވެފައިވާއިރު، ހަ މެޗު ވަނީ އެއްވަރުވެފަ އެވެ. އަދި ދެ މެޗަކުން އެ ޓީމު ވަނީ ބަލިވެފަ އެވެ.