މާޒިޔާ މިހާރު އޮތް ހާލަތު ބުނެދޭކަށްވެސް ނޭނގޭ: ވިޑަކޮވިޗް

މެދުކެނޑުމަކަށްފަހު ދިރާގު ދިވެހި ޕްރިމިއާ ލީގުގެ ކުޅުން ފެށުނުއިރު، މާޒިޔާ ސްޕޯޓްސް އެންޑް ރެކްރިއޭޝަން މިހާރު އޮތް ހާލަތު ބުނެދެން ނޭނގޭ ކަމަށް އެ ޓީމުގެ ކޯޗު ރިސްޓޯ ވިޑަކޮވިޗް ބުނެފިއެވެ.

ލީގުގެ ކުޅުން މިދިޔަ ހުކުރު ދުވަހު އަލުން ފެށީ 52 ދުވަހުގެ މެދުކެނޑުމަކަށްފަހުއެވެ. އެގޮތުން މިދިޔަ ފެބްރުއަރީ މަހުގެ ތިންވަނަ ދުވަހު ލީގުގެ ކުޅުން މެދުކަނޑާލިއިރު، ލީގުގައި މާޒިޔާއިން އެންމެ ފަހުން މެޗެއް ކުޅުނީ ފެބްރުއަރީ މަހުގެ ދެވަނަ ދުވަހުއެވެ.

ލީގުގައި އަންގާރަ ދުވަހުގެ ހަވީރު ޔުނައިޓެޑް ވިކްޓަރީ (ޔޫވީ) އާ ދެކޮޅަށް ނުކުތުމުގެ ކުރިން އާދީއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ވިޑަކޮވިޗް ބުނީ މި މެޗަށް ނުކުންނައިރު މާޒިޔާއަށް އޮތް އެންމެ ބޮޑު ގޮންޖެހުމަކީ ލީގު މެދުކެނޑި، ގިނަ ދުވަސްތަކެއްވުން މިހާރު ޓީމު އޮތް ހާލަތު ބުނަން ނޭނގުން ކަމަށެވެ. އެހެންނަމަވެސް މި މެޗާއެކު މާޒިޔާގެ ފެންވަރު ވަޒަންކޮށްލެވޭނެ ކަމަށް އޭނާ ވަނީ ބުނެފައެވެ.

ވިޑަކޮވިޗް ބުނީ ޔޫވީއަކީ ވަރުގަދަ ޓީމެއް ކަމަށާއި، ލީގު ތާވަލުގައި އެ ޓީމު އޮތް ހިސާބަށް ބަލައި، ޔޫވީގެ ފެންވަރު ދަށްކޮށްލުން އެއީ މާޒިޔާއިން ކުރާނެ ކަމެއް ނޫން ކަމަށެވެ. އަދި ޔޫވީން ކުޅުނު މެޗުތައް ބެލުމުން އެ ޓީމުގެ ފެންވަރު ވަރަށް ސާފުކޮށް އެނގޭ ކަމަށްވެސް ވިޑަކޮވިޗް ބުންޏެވެ.

މި މެޗާ ބެހޭ ގޮތުން ވާހަކަދައްކަމުން ޔޫވީގެ ކޯޗު އިހުސާން އަބްދުލް ޣަނީ (ސާންތީ) ބުނީ މާޒިޔާއަކީ މިހާރު ލީގުގައި އޮތް އެންމެ ވަރުގަދަ ޓީމު ކަމަށާއި، އެހެންކަމުން މި މެޗަށް ނުކުންނައިރު ޔޫވީން މަސައްކަތް ކުރާނީ އެ ޓީމު ކޮޅަށް ވަންނަ ލަނޑުތައް މަދުކުރަން ކަމަށެވެ.

އަދި މާޒިޔާ މެޗާ ކުރިމަތިލާއިރު، ޔޫވީގައި މިހާރުވެސް އަނިޔާގެ މައްސަލަ ބޮޑުކަމަށާއި، މި ސީޒަނުގައި ޔޫވީއަށް ދިމާވި އަނިޔާގެ މައްސަލަތަކުން އަދިވެސް އަރައިގަނެވިފައިނުވާ ކަމަށްވެސް ވަނީ ބުނެފައެވެ. އެހެންނަމަވެސް ޔޫވީ ކުޅޭ މެޗުތަކުން ބަލިވެފައިވަނީ ވަރަށް ރަނގަޅަށް ކުޅުމަށްފަހު، ހެދޭ ކުޑަ ގޯހަކުން ކަމަށްވެސް ސާންތި ވަނީ ބުނެފައެވެ.

ލީގުގައި އަންގާރަ ދުވަހުގެ ހަވީރު މާޒިޔާ އާއި ޔޫވީ ބައްދަލުކުރާއިރު، ލީގު ތާވަލުގެ އެއްވަނައިގައި މާޒިޔާ އޮތީ ކުޅުނު ނުވަ މެޗުން ލިބުނު 21 ޕޮއިންޓާއެކުގައެވެ. އަދި ލީގުގައި މިހާތަނަށް ކުޅުނު އެއްވެސް މެޗަކުން ޔޫވީ މޮޅުވެފައި ނުވާއިރު، އެ ޓީމު އޮތީ ތާވަލުގެ ފުލުގައި ނުވަ މެޗުން ތިން ޕޮއިންޓާއެކުގައެވެ.

ދިރާގު ދިވެހި ޕްރިމިއާ ލީގުގައި މާޒިޔާ އާއި ޔޫވީ ބައްދަލުކުރާ މެޗު ފަށާނީ އަންގާރަ ދުވަހުގެ ހަވީރު 16:00 ގައެވެ.