ވިކްޓަރީ އިން އީގަލްސްގެ މައްޗަށް ކުރި ހޯދައިފި

މިހާރު ކުރިއަށްދާ ދިރާގު ދިވެހި ޕްރިމިއަރ ލީގުގެ ދެ ވަނަ ބުރުގައި ކުލަބު އީގަލްސްއާ ދެކޮޅަށް ކުޅުނު މެޗުން ވިކްޓަރީ ސްޕޯޓްސް ކުލަބު މޮޅުވެއްޖެ އެވެ.

ލީގުގައި އީގަލްސްއާ ދެކޮޅަށް ކުޅުނު މެޗު ވިކްޓަރީ އިން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި ވިކްޓަރީ އިން އެއް ލަނޑު ޖެހިއިރު، އަނެއް ލަނޑު އެ ޓީމުން ޖެހީ ދެ ވަނަ ހާފުގަ އެވެ. 

މެޗު ފަށައިގެން ދެ ޓީމުގެ ފަރާތުން ވެސް ހަމަހަމަ ކުޅުމެއް ފެނުނުއިރު، އީގަލްސް އިން ވަނީ ލަނޑު ޖަހަން ފުރުސަތު ތަނަވަސްކޮށްފަ އެވެ. ނަމަވެސް، އީގަލްސް އަށް ލިބުނު ފުރުސަތުގެ ބޭނުން ނުކުރެވި އުޅެނިކޮށް، ވިކްޓަރީ އިން ވަނީ ލިބުނު ފުރުސަތުގައި ލަނޑު ޖަހައިފަ އެވެ. 

މެޗުގެ ފުރަތަމަ ހާފުގެ 34 ވަނަ މިނެޓުގައި ވިކްޓްރީ އަށް ލަނޑު ޖަހައި ލީޑު ނަގައިދިނީ އެ ޓީމުގެ ބިދޭސީ ކުޅުންތެރިޔާ މިލޯސް ލެޗްނީ އެވެ. މެޗުގައި ވިކްޓަރީ އިން އެ ޓީމުގެ ފަހު ލަނޑު ޖެހީ މެޗުގެ ފަހު ވަގުތުގަ އެވެ. އެގޮތުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އެ ލަނޑު ވިކްޓަރީ އަށް ޖަހައިދިނީ ސަފްރާޒް އިބްރާހީމް އެވެ.

މެޗުން މޮޅުވެ ވިކްޓަރީ އޮތީ ލީގު ތާވަލްގެ ހަ ވަނަ މަގާމުގަ އެވެ. އެއީ މިހާތަނަށް ކުޅެފައިވާ 10 މެޗުން 13 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ފަސް ވަނައިގައި އީގަލްސް އަށް ވެސް ލިބެނީ 13 ޕޮއިންޓެވެ. ލީގުގެ ފުރަތަމަ ބުރުގައި މި ދެ ޓީމު ބައްދަލު ކުރި މެޗު ވަނީ އެއްވަރުވެފަ އެވެ.

އަނެއްކޮޅުން މިއީ އީގަލްސްގެ ކޯޗު ކަމާ ޢަބްދުﷲ ޙަނީފު (ބެންޖޯ) ހަވާލުވީ ފަހުން އެ ޓީމު ބަލިވި ފުރަތަމަ މެޗެވެ. ބެންޖޯ ހަވާލުވީ ފަހުން މިހާތަނަށް އީގަލްސް ކުޅެފައި ވަނީ ހަތް މެޗެވެ. އޭގެ ތެރެއިން ތިން މެޗުން އެ ޓީމު ވަނީ މޮޅުވެފަ އެވެ. ތިން މެޗު އެއްވަރުވެފައިވާއިރު، އެއް މެޗުން މި ވަނީ ބަލިވެފަ އެވެ.