އީގަލްސް އަތުން ދަ ގްރާންޑޭއަށް ޕޮއިންޓެއް

ދިރާގު ދިވެހި ޕްރިމިއާ ލީގުގައި ހޯމަ ދުވަހުގެ ހަވީރު ދަ ގްރާންޑޭ ސްޕޯޓްސް ކުލަބާއި ކުލަބު އީގަލްސް ބައްދަލުކުރި މެޗު އެއްވަރުވެއްޖެއެވެ.

ޤައުމީ ފުޓްބޯޅަ ދަނޑުގައި ކުޅުނު މި މެޗު ނިމުނީ 1-1 ގެ ނަތީޖާއަކުން ދެ ޓީމު އެއްވަރުވެގެންނެވެ.

މި މެޗުގެ ފުރަތަމަ ހާފުގައި އީގަލްސްއިން ރަނގަޅު ކުޅުމެއް ދެއްކިއިރު، މި ހާފުގައި އެ ޓީމަށް ވަނީ ލީޑު ނަގަން ރަނގަޅު ފުރުސަތުތަކެއް ލިބިފައެވެ. އެގޮތުން މެޗުގެ 12 ވަނަ މިނެޓުގައި އޭރިއާ ބޭރުން އީގަލްސްގެ މިސްރު ފޯވާޑް މުޙައްމަދު އޮސާމާ ނުރައްކާތެރި ހަމަލާއެއް ފޮނުވާލިއިރު، އެ ހަމަލާ ދިޔައީ ގޯލުގެ ހުރަސް ދަނޑި ކައިރިން ބޭރަށެވެ. އަދި އޭގެ ދެ މިނެޓު ފަހުން އީގަލްސްގެ މިސްރު ޑިފެންޑަރު އެލްސައީދު މަހުމޫދަށް އޭރިއާ ތެރެއިން ވަނީ ރަނގަޅު ފުރުސަތެއް ލިބުނުއިރު، މި ހާފުގައި އީގަލްސްގެ މިޑްފީލްޑަރު އިމްރާން ނަޝީދު (އިންމަ) ބޮލުން ފޮނުވާލި ހަމަލާއެއް ވަނީ ގޯލުގެ އަރިމަތީ ދަނޑިއަށް އަމާޒުވެފައެވެ.

މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، ދެވަނަ ހާފު ފަށައިގެން 12 ވަނަ މިނެޓުގައި އީގަލްސްއިން ވަނީ ލީޑު ނަގާފައެވެ. ދަ ގްރާންޑޭގެ ގޯލްކީޕަރު އިޔާން އަބްދުލް އަލީމް ހެދި ގޯހެއްގެ ފައިދާ ނަގައި، މި ލަނޑު އީގަލްސްއަށް ކާމިޔާބުކޮށްދިނީ ރަޝިއާގެ ފޯވާޑް ވްލަޑިސްލާވް ކޮރްމިޝިނެވެ. އެކަމަކު މެޗުގެ 73 ވަނަ މިނެޓުގައި ދަ ގްރާންޑޭގެ އަޔާޒް އަޙްމަދު (އަޔާ) ކާމިޔާބުކުރި ހިތްގައިމު ލަނޑުން، ދަ ގްރާންޑޭއިން ވަނީ މެޗުގައި ނަތީޖާ އެއްވަރުކޮށްފައެވެ.

މި މެޗަށްފަހު ދަ ގްރާންޑޭގެ ކޯޗު އިސްމާޢީލް މަހަފޫޒް (އިންމަ) ބުނީ ގިނަ ދުވަސްތަކެއް ފަހުން މެޗަކަށް ނުކުތްއިރު، ޓީމަށް އެންމެ އެކަށޭނެ މިންވަރަށް ތައްޔާރުނުވެވުނު ނަމަވެސް، އީގަލްސް ކަހަލަ ޓީމެއް ކައިރީގައި މި ނަތީޖާ ނެރެވުމުން ހިތްހަމަޖެހޭ ކަމަށެވެ. އަދި މި މެޗުގެ ދެވަނަ ހާފުގައި ކުޅުންތެރިންގެ ފެނުނު ކަންތައްތަކަށް ބަލާއިރު، ކުރިއަށް ހުރި މެޗުތަކުގައި ރަނގަޅު ނަތީޖާއެއް ނެރުމުގެ އުންމީދު އެބައޮތް ކަމަށްވެސް އިންމަ ވަނީ ބުނެފައެވެ.

އީގަލްސްގެ ކޯޗު މުޙައްމަދު ޝާޒްލީ (ޝާޒް) ބުނީ މެޗަށް ނުކުތީ ތިން ޕޮއިންޓް ހޯދުމަށް ކަމަށާއި، އެކަން ނުވުމުން ހިތްހަމަޖެހެއޭ ނުބުނެވޭނެ ކަމަށެވެ. އެކަމަކު އީގަލްސްއިން ދެއްކި ކުޅުން ބަލައިގަންނަ ކަމަށްވެސް ވަނީ ބުނެފައެވެ. މީގެ އިތުރުން މެޗަށްފަހު ޝާޒްލީ ވަނީ މެޗުގެ އޮފިޝަލުންގެ ބައެއް ނިންމުންތަކާ މެދު ހިތްހަމަނުޖެހުން ފާޅުކޮށްފައެވެ.

ލީގުގައި ހޯމަ ދުވަހުގެ ހަވީރު ކުޅުނު މެޗުން ދަ ގްރާންޑޭ އެއްވަރުވިއިރު، އެ ޓީމު ވަނީ ތާވަލުގެ ދެވަނައަށް ޖެހިލާފައެވެ. އެގޮތުން ކުޅުނު 10 މެޗުން ދަ ގްރާންޑޭއަށް ވަނީ 16 ޕޮއިންޓް ލިބިފައެވެ. ތާވަލުގެ އެއްވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަނަށް ނުވަ މެޗުން 21 ޕޮއިންޓް ލިބިފައިވާއިރު، ތިންވަނައަށް ވެއްޓުނު ކުލަބު ވެލެންސިއާއަށް ނުވަ މެޗުން ލިބިފައިވަނީ 15 ޕޮއިންޓެވެ. އެހެންކަމުން ލީގުގައި ހޯމަ ދުވަހުގެރޭ ވެލެންސިއާ އާއި ތާވަލުގެ ހަތަރުވަނައިގައި އޮތް ކުލަބު ގްރީން ސްޓްރީޓްސް ބައްދަލުކުރާ މެޗުން ކޮންމެ ނަތީޖާއެއް ނުކުތް ކަމުގައި ވިޔަސް، ދަ ގްރާންޑޭއަށް ދެވަނަ ގެއްލޭނެއެވެ. މީގެ އިތުރުން ދަ ގްރާންޑޭއާ އެއްވަރުވި އީގަލްސް އޮތީ ތާވަލުގެ ފަސްވަނައިގައި 10 މެޗުން 12 ޕޮއިންޓާއެކުއެވެ.