އޭއެފްސީ ކަޕުގެ ކުރިން ދަ ގްރާންޑޭ އަތުން މޮޅުވުން މުހިންމު: ޝާޒްލީ

އޭއެފްސީ ކަޕުގެ ކޮލިފައިން މެޗުގެ ކުރިން ދަ ގްރާންޑޭ ސްޕޯޓްސް ކުލަބާ ދެކޮޅަށް ކުޅޭ މެޗުން މޮޅެއް ހޯދުން މުހިންމު ކަމަށް ކުލަބު އީގަލްސްގެ ކޯޗު މުޙައްމަދު ޝާޒްލީ (ޝާޒް) ބުނެފިއެވެ.

ދަ ގްރާންޑޭ މެޗާ ކުރިމަތިލާއިރު، ޝާޒްލީގެ އިރުޝާދުގެ ދަށުން ކުޅުނު ފުރަތަމަ މެޗުން އީގަލްސް ވަނީ މިދިޔަ ހުކުރު ދުވަހު ސުޕަ ޔުނައިޓެޑް ސްޕޯޓްސް (ސަސް) އަތުން 2-1 ގެ ނަތީޖާއަކުން މޮޅުވެފައެވެ. އެއާއެކު ދިރާގު ދިވެހި ޕްރިމިއާ ލީގުގެ ފަސްވަނައަށް އީގަލްސް ޖެހިލިއިރު، އޭއެފްސީ ކަޕުގެ ކޮލިފައިންގައި މި ފެށޭ އޭޕްރީލް މަހުގެ ހަތްވަނަ ދުވަހު ބޫޓާނުގެ ތިމްޕޫ ސިޓީއާ ދެކޮޅަށް ކުޅޭ މެޗުގެ ކުރިން އީގަލްސްއަށް އޮތީ ދަ ގްރާންޑޭ މެޗެވެ.

ލީގުގައި ހޯމަ ދުވަހުގެ ހަވީރު ދަ ގްރާންޑޭއާ ދެކޮޅަށް ނުކުތުމުގެ ކުރިން އާދީއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ޝާޒްލީ ބުނީ ދިވެހި ޕްރިމިއާ ލީގުގައި އީގަލްސްއަށް ކުރިއަށް އޮތް މެޗަކީ ވަރުގަދަ މެޗެއް ކަމަށާއި، އެގޮތުން މެޗަށް ނުކުންނައިރު ދެޓީމަށްވެސް ފައިދާ އެބައޮތް ކަމަށެވެ.

ޝާޒްލީ ބުނީ މި މެޗުން ތިން ޕޮއިންޓް ހޯދައިގެން، ލީގުގައި ކުރިއަށްދިޔުމަށްވެސް ފަސޭހަތަކެއްވާނެ ކަމަށާއި، އަދި މި މެޗުން މޮޅެއް ހޯދައިގެން އޭއެފްސީ ކަޕުގެ ކޮލިފައިންނާ ކުރިމަތިލާއިރު، ކުޅުންތެރިންގެ މޯޓިވޭޝަންވެސް އިތުރަށް ރަނގަޅުވެގެންދާނެ ކަމަށެވެ. އެހެންކަމުން އީގަލްސްއިން މި މެޗަށް ވަރަށް ރަނގަޅަށް ތައްޔާރުވެފައިވާ ކަމަށާއި، މި މެޗަކީ އީގަލްސްއަށް މުހިންމު މެޗެއް ކަމަށްވެސް ޝާޒްލީ ވަނީ ބުނެފައެވެ.

އީގަލްސް މެޗުގެ ކުރިން ދަ ގްރާންޑޭގެ ކޯޗު އިސްމާޢީލް މަހަފޫޒް (އިންމަ) ބުނީ ބޮޑު މެދުކެނޑުމަކަށްފަހު އީގަލްސް ކަހަލަ ވަރުގަދަ ޓީމަކާ ދެކޮޅަށް ކުޅެން ޖެހުން އެއީ ޗެލެންޖެއް ކަމަށެވެ. އަދި މެދުކެނޑުމަށްފަހު ލީގު އަލުން ފެށުމުން، ޓީމުތަކުގެ ފެންވަރު ވަޒަންކޮށްލަން ކޮންމެ ކޯޗަކަށްވެސް އުނދަގޫވާނެ ކަމަށްވެސް ވަނީ ބުނެފައެވެ.

އިންމަ އިތުރަށް ބުނީ މެދުކެނޑުމަށްފަހު މެޗަކާ ކުރިމަތިލާއިރު ކުޅުންތެރިންގެ މެޗު ފިޓްނަސް ދަށްވާނެ ކަމަށާއި، އެހެންނަމަވެސް ދެ މެޗެއްވަރު ކުޅުމުން އެކަން ހަމައަކަށް އެޅޭނެ ކަމަށެވެ. އެހެންކަމުން ދާދި ފަހުން އީގަލްސްއިން މެޗެއް ކުޅެފައިވުން، އެއީ އެ ޓީމަށް އޮތް ފައިދާއެއް ކަމަށާއި، އެކަމަކު ދަ ގްރާންޑޭ މެޗެއް ނުކުޅުނު ނަމަވެސް އެއީ ދަ ގްރާންޑޭއަށް ލިބޭނެ ގެއްލުމެއް ނޫން ކަމަށްވެސް އިންމަ ވަނީ ބުނެފައެވެ.

ލީގުގައި ހޯމަ ދުވަހުގެ ހަވީރު ދަ ގްރާންޑޭ އާއި އީގަލްސް ބައްދަލުކުރާއިރު، ދަ ގްރާންޑޭ އޮތީ ތާވަލުގެ ތިންވަނައިގައި ކުޅުނު ނުވަ މެޗުން ލިބުނު 15 ޕޮއިންޓާއެކުއެވެ. އަދި އީގަލްސް އޮތީ ތާވަލުގެ ފަސްވަނައިގައި ނުވަ މެޗުން 11 ޕޮއިންޓާއެކުއެވެ.

ދިރާގު ދިވެހި ޕްރިމިއާ ލީގުގައި ދަ ގްރާންޑޭ އާއި އީގަލްސް ބައްދަލުކުރާ މެޗު ފަށާނީ ހޯމަ ދުވަހުގެ ހަވީރު 16:00 ގައެވެ.