އެއްބަސްވުން އާކޮށް، 2026 ވަނަ އަހަރުގެ ޖޫން މަހުގެ ނިޔަލަށް ޕީއެސްޖީގައި މަޑުކުރަން ބްރެޒިލުގެ ތަރި ނޭމާ ނިންމާފައިވާ ކަމަށް ރިޕޯޓުތައް ބުނެފިއެވެ.

ބާސެލޯނާ ދޫކޮށް 2017 ވަނަ އަހަރު އުމުރުން 29 އަހަރުގެ ނޭމާ ޕީއެސްޖީއަށް ބަދަލުވީ ދުނިޔޭގެ ރިކޯޑު އަގެއް ކަމަށްވާ 222 މިލިއަން ޔޫރޯއަށެވެ. އަދި ނޭމާ މި ވަގުތު ޕީއެސްޖީގެ އެއްބަސްވުމުގައި ހުރީ 2022 ވަނަ އަހަރުގެ ޖޫން މަހުގެ ނިޔަލަށެވެ.

މީގެ ކުރިން އަނބުރާ ބާސާއަށް ބަދަލުވާން ބޭނުންވާކަން ނޭމާ ހާމަކުރި ނަމަވެސް، ފަހުން ސްޕެއިނުގެ މީޑިއާތަކުން ވަނީ އަލުން އަނބުރާ ބާސާއަށް ބަދަލުވާން ނޭމާ މިހާރު ބޭނުންނުވާ ކަމަށް ރިޕޯޓުކޮށްފައެވެ. އެހެންކަމުން ނޭމާގެ އެއްބަސްވުން އާކުރަން ޕީއެސްޖީން މަސައްކަތްކުރަމުން އަންނައިރު، އިތުރު ހަތަރު އަހަރަށް އެއްބަސްވުން އާކުރަން ނޭމާ މިހާރު ނިންމާފައިވާ ކަމަށް ރިޕޯޓުތައް ބުނެއެވެ. އެހެންކަމުން އައު އެއްބަސްވުމާއެކު، 2026 ވަނަ އަހަރުގެ ޖޫން މަހުގެ ނިޔަލަށް ނޭމާ ޕީއެސްޖީގައި މަޑުކުރާނެއެވެ.

ޕީއެސްޖީގެ އެއްބަސްވުން އާކުރަން ނޭމާ ނިންމާފައިވާ ކަމަށް ރިޕޯޓުތައް ބުނިއިރު، މިދިޔަ އަހަރުގެ ފަހުކޮޅު އޭނާ ވަނީ މި އަހަރުގެ ތެރޭގައި ބާސާއަށް ކުޅެމުން އަންނަ އާޖެންޓީނާގެ ތަރި ލިއޮނެލް މެސީއާ އެއް ޓީމެއްގައި ކުޅެން ބޭނުންވާ ކަމަށް ބުނެފައެވެ. މި ސީޒަން ނިމުމުން ބާސާއާއެކު މެސީ ހަދާފައިވާ އެއްބަސްވުން ހަމަވާއިރު، ޕީއެސްޖީން މެސީ ހޯދުމަށް މިހާރު އަންނަނީ މަސައްކަތްކުރަމުންނެވެ.

ޕީއެސްޖީގެ އެއްބަސްވުން ނޭމާ އާކުރާއިރު، މެސީއާއެކު މީގެ ކުރިން ބާސާއަށް ކުޅުނު ނޭމާ ވަނީ މިހާތަނަށް ޕީއެސްޖީއަށް ކުޅެދިން 104 މެޗުގައި ވަނީ 83 ލަނޑު ކާމިޔާބުކޮށްފައެވެ. އަދި ވަނީ ޕީއެސްޖީއާއެކު މިހާތަނަށް ފްރެންޗް ލީގު ތިން ފަހަރު ކާމިޔާބުކޮށްފައެވެ.