ރެއާލް ބަލިކޮށް، ޕީއެސްޖީ ފައިނަލަށް

އެމެރިކާގައި މިހާރު ކުރިއަށްދާ ފީފާ ކުލަބު ވޯލްޑް ކަޕްގެ ސެމީ ފައިނަލްގެ ދެ ވަނަ މެޗުގައި، ސްޕެއިންގެ ރެއާލް މެޑްރިޑުގެ މައްޗަށް ކުރި ހޯދައި، ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އިން މުބާރާތުގެ ފައިނަލްގެ ފަހު ޖާގަ ހޯދައިފި އެވެ.

އެމެރިކާގެ މެޓްލައިފް ސްޓޭޑިއަމް ނިއު ޖާޒީގައި ބުދަ ދުވަހުގެ ރޭ ދަންވަރު ކުޅުނު މެޗު ޕީއެސްޖީ އިން ކާމިޔާބު ކުރީ 4-0 އިންނެވެ. މެޗުގެ ފުރަތަމަ ހާފުގައި ޕީއެސްޖީ އިން ތިން ލަނޑު ޖެހިއިރު، ދެ ވަނަ ހާފުގައި އެ ޓީމުން ވަނީ ހަަތަރު ވަނަ ލަނޑު ޖަހައިފަ އެވެ.

މެޗު ފަށައިގެން ހަ ވަނަ މިނެޓުގަައި ޕީއެސްޖީ އިން ވަނީ ރެއާލް ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު ޕީއެސްޖީ އަށް ޖަހައިދިނީ ފަބިއަން ރުއިޒް އެވެ. އޭނާ އެ ލަނޑު ޖެހީ އޮސްމާން ޑެމްބެލޭ ތަނަވަސްކޮށްދިން ފުރުސަތެއްގަ އެވެ.

އޭގެ ތިން މިނެޓު ފަހުން ޕީއެސްޖީ އިން ވަނީ އެ ޓީމުގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެއީ ރެއާލްގެ ޑިފެންޑަރަކަށް ހެދުނު ގޯހެއްގައި ލިބުނު ބޯޅަ ހިފައިގެން ގޮސް އޭރިޔާ ތެރެއަށް ވަދެ، ރެއާލްގެ ގޯލު ކީޕަރު ތިބައޫ ކޯޓުއާގެ އަތް ދަށުން ގޯލަށް ފޮނުވާލައިގެން ޑެމްބެލޭ ޖެހި ލަނޑެކެވެ.

މެޗުގެ ފުރަތަމަ ހާފުގައި ޕީއެސްޖީ އިން ތިން ވަނަ ލަނޑެއް ޖެހީ 24 ވަނަ މިނެޓުގަ އެވެ. އެ ލަނޑު ވެސް ޖެހީ ފުރަތަމަ ލަނޑު ޖެހީ ރުއިޒް އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ އަޝްރަފް ޙަކީމީ އެވެ.

މެޗުގެ ފުރިހަމަ ވަގުތު ހަމަވާން ތިން މިނެޓަށް ވެފައި ވަނިކޮށް، ޕީއެސްޖީގެ ހަތަރު ވަނަ ލަނޑު ޖެހީ ގޮންޒާލޯ ރާމޯސް އެވެ. މެޗުގައި އޭނާ ކުޅެން ނިކުތީ ވެސް ބަދަލު ކުޅުންތެރިޔެއްގެ ގޮތުގަ އެވެ. އެ ލަނޑު ޖަހަން ގޮންޒާލޯ ރާމޯސް އަށް ފުރުސަތު ތަނަވަސްކޮށްދިނީ ބްރާޑްލޭ ބާކޮލާ އެވެ.

މޮޅާއެކު ޕީއެސްޖީ އިން މުބާރާތުގެ ފައިނަލްގެ ޖާގަ ހޯދިއިރު، ފައިނަލްގައި ޕީއެސްޖީ ނިކުންނާނީ ޗެލްސީއާ ދެކޮޅަށެވެ.