ސައިކަލް އެކްސިޑެންޓެއްގައި އެންރީކޭ އަށް ސީރިއަސް އަނިޔާތަކެއް

ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށް އިރުޝާދު ދެމުން އަންނަ، ސްޕެއިންގެ ލުއިސް އެންރީކޭ ސައިކަލު އެކްސިޑެންޓެއްވެ ސީރިއަސް އަނިޔާ ތަކެއް ލިބިއްޖެ އެވެ.

ހުކުރު ދުވަހު އެންރީކޭ އެކްސިޑެންޓު ވެފައިވާއިރު، އެ ހާދިސާއާ ގުޅިގެން އޭނާ ވަނީ އޮޕަރޭޝަނެއް ކުރަން ޖެހިފަ އެވެ. އެކްސިޑެންޓުގައި އެންރީކޭ އަށް ލިބިފައިވާ އަނިޔާ ތަކުގެ ތެރޭގައި، އޭނާގެ ކޮނޑުގެ ކަށި ބިނދިފައިވާ ކަމަށް ވަނީ ހާމަކޮށްފަ އެވެ.

އެކަމާ ގުޅިގެން ޕީއެސްޖީ އިން ނެރެފައިވާ ބަޔާނެއްގައި ބުނެފައި ވަނީ، އެ ކުލަބުން އަންނަނީ އެންރީކޭގެ ޙާލަތު ވަރަށް ގާތުން ބަލަމުން ކަމަށާއި، އެންރީކޭ އަށް ދޭން ޖެހޭ އެންމެހައި އެއްބާރުލުމެއް އެ ކުލަބުން ދެމުން އަންނަ ކަމަށެވެ. އަދި އެންރީކޭގެ ޞިއްޙީ ޙާލަތާ ގުޅޭ އެންމެ ފަހުގެ މައުލޫމާތު ލިބެމުން އަންނަ ވަރަކުން، އެ މައުލޫމާތު ހިއްސާ ކުރަމުން ގެންދާނެ ކަމަށް ވެސް ޕީއެސްޖީ އިން ވަނީ ބުނެފަ އެވެ.

އުމުރުން 55 އަހަރުގެ އެންރީކޭ، ޕީއެސްޖީގެ ކޯޗުކަމާ ހަވާލުވީ 2023 ވަނަ އަހަރުގެ ޖުލައި މަހުގެ ތެރޭގަ އެވެ. ސްޕެއިންގެ ޤައުމީ ފުޓުބޯޅަ ޓީމުގެ ކޯޗުކަމުން ވަކިވުމަށް ފަހު، ޕީއެސްޖީގެ ކޯޗުކަމާ އޭނާ ހަވާލުވީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. ނަމަވެސް، އެ އެއްބަސްވުމުގެ މުއްދަތު ހަމަވުމުގެ ކުރިން، އެންރީކޭ ވަނީ ޕީއެސްޖީގެ އެއްބަސްވުން އިތުރު ދެ އަހަރަށް އައު ކޮށްފަ އެވެ.

އެންރީކޭގެ އިރުޝާދުގެ ދަށުން ޕީއެސްޖީ ވަނީ މިހާތަނަށް 122 މެޗު ކުޅެފަ އެވެ. އޭގެ ތެރެއިން 85 މެޗުން އެ ޓީމު މޮޅުވެފައިވާއިރު، 21 މެޗުން އެއްވަރުވެ އަދި 16 މެޗުން ވަނީ ބަލިވެފަ އެވެ. އޭނާގެ އިރުޝާދުގެ ދަށުން ޕީއެސްޖީ އިން ވަނީ އަށް ތައްޓެއް ކާމިޔާބު ކޮށްފަ އެވެ. އޭގެ ތެރޭގައި އެ ކުލަބުގެ ތާރީޚުގައި ފުރަތަމަ ފަހަރަށް ޔުއެފާ ޗެމްޕިއަންސް ލީގު ކާމިޔާބު ކުރުން ހިމެނެ އެވެ.

އޭނާގެ އިރުޝާދުގެ ދަށުން ޕީއެސްޖީ އިން ވަނީ ފްރާންސް ލީގު ދެ ފަހަރު، ފްރާންސް ކަޕް ދެ ފަހަރު، ޓްރޮފީ ޑީ ޗެމްޕިއަންސް ދެ ފަހަރު، ޔުއެފާ ޗެމްޕިއަންސް ލީގު އަދި ޔުއެފާ ސުޕަ ކަަޕް އެއް ފަހަރު ކާމިޔާބު ކުރުން ހިމެނެ އެވެ. އެންމެ ފަހުން ކުޅުނު ފީފާ ކުލަބު ވޯލްޑް ކަޕްގެ ފައިނަލްގައި ޕީއެސްޖީ ވަނީ ޗެލްސީ އަތުން ބަލިވެފަ އެވެ.

އައު ސީޒަންގެ ފްރާންސް ލީގުގައި އެންރީކޭގެ އިރުޝާދުގެ ދަށުން ޕީއެސްޖީ އިން ވަނީ ތިން މެޗު ކުޅެފަ އެވެ. ތިން މެޗުން ވެސް މޮޅުވެ، މިވަގުތު ޕީއެސްޖީ އޮތީ ލީގު ތާވަލްގެ އެއް ވަނައިގަ އެވެ. ލީގުގައި ޕީއެސްޖީ އަށް ދެން އޮތީ މި މަހުގެ 14 ވަނަ ދުވަހު ލެންސްއާ ދެކޮޅަށް ކުޅޭ މެޗެވެ.