އިންޓަރ މިއާމީ ބަލިކޮށް ޕީއެސްޖީ ކުއާޓާ ފައިނަލަށް

މިހާރު ކުރިއަށްދާ ފީފާ ކުލަބު ވޯލްޑް ކަޕްގެ ގަދަ 16 ވަނަ ބުރުގައި އެމެރިކާގެ އިންޓަރ މިއާމީއާ ދެކޮޅަށް ކުޅުނު މެޗުން މޮޅުވެ، ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އިން މުބާރާތުގެ ކުއާޓާ ފަައިނަލްގެ ޖާގަ ހޯދައިފި އެވެ.

އާދީއްތަ ދުވަހުގެ ރޭ މިއާމީއާ ދެކޮޅަށް ކުޅުނު މެޗު ޕީއެސްޖީ އިން ކާމިޔާބު ކުރީ 4-0 އިންނެވެ. މެޗުގައި ޕީއެސްޖީ އިން އެ ޓީމުގެ ހަތަރު ލަނޑު ވެސް ޖެހީ ފުރަތަމަ ހާފުގަ އެވެ.

މި މެޗުގެ ފުރަތަމަ 11 ގައި އިންޓަރ މިއާމީ އިން ވަނީ ކެޕްޓަން ލިއޮނަލް މެސީގެ އިތުރުން، ލުއިސް ސުއަރޭޒް، ސާޖިއޯ ބުސްކެޓްސް އަދި ޖޯޑީ އަލްބާ ވެސް ހިމަނައިފަ އެވެ.

މެޗު ފަށައިގެން ހަ ވަނަ މިނެޓުގައި ޕީއެސްޖީ އިން ވަނީ މިއާމީ ކޮޅަށް ލަނޑު ޖަަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ޔާއޯ ނެވެސް އެވެ. އޭނާ އެ ލަނޑު ޖެހީ ވިޓީނިއާ ތަނަވަސްކޮށްދިން ފުރުސަތެއްގަ އެވެ.

އޭގެ ފަހުން ފުރަތަމަ ހާފުގެ 39 ވަނަ މިނެޓުގައި ނެވެސް ވަނީ ދެ ވަނަ ލަނޑެއް ޖަހައި ޕީއެސްޖީ އަށް ލީޑު ފުޅާ ކޮށްދީފަ އެވެ. މި ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ފަބިއަން ރުއީޒް އެވެ.

މެޗުގައި ޕީއެސްޖީގެ ތިން ވަނަ ލަނޑަކީ މިއާމީގެ ތޯމަސް އަވިލެސް އަތުން ބައި ކޮޅަށް ވަތް ލަނޑެކެވެ. މެޗުގެ ފުރަތަަމަ ހާފުގެ އިތުރު ވަގުތުގެ ތެރޭގައި ޕީއެސްޖީގެ ހަތަރު ވަނަ ލަނޑު ޖެހީ އަޝްރަފް ޙަކީމީ އެވެ.

މެޗުގައި މިއާމީ އިން ވެސް ވަނީ ލަނޑު ޖަހަން ފުރުސަތު ތަކެއް ތަނަވަސްކޮށްފަ އެވެ. މިއާމީގެ މެސީ ބޮލުން ފޮނުވާލި ބޯޅަ ޕީއެސްޖީގެ ގޯލު ކީޕަރު ވަނީ މަތަކޮށްފަ އެވެ. މިއާމީގެ ސުއަރޭޒް އަށް ލިބުނު ފުރުސަތެއްގައި އޭނާ ފޮނުވާލި ބޯޅަ ވެސް ކާމިޔާބު ކުރެވޭ ގޮތެއް ނުވި އެވެ.