ޔުއެފާ ޗެމްޕިއަންސް ލީގުގައި އާރްބީ ސަލްސްބާގާ ދެކޮޅަށް ކުޅުނު މެޗުން، ޕެރިސް ސެއިންޓް ޖާމަން (ޕީއެސްޖީ) މޮޅުވެއްޖެ އެވެ.

ސަލްސްބާގްގެ އަމިއްލަ ދަނޑުގައި އަންގާރަ ދުވަހުގެ ރޭ ކުޅުނު މެޗު ޕީއެސްޖީން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި ޕީއެސްޖީން ވަނީ އެއް ލަނޑު ޖަހައި ލީޑު ނަަގައިފަ އެވެ. އަދި ދެ ވަނަ ހާފުގައި ޕީއެސްޖީން ވަނީ އިތުރު ދެ ލަނޑު ޖަހައިފަ އެވެ.

މެޗުގެ ފުރަތަމަ ހާފުގެ 30 ވަނަ މިނެޓުގައި ޕީއެސްޖީ އަށް ލީޑު ނަގައިދިނީ ޕޯޗުގަލްގެ ގޮންޒާލޯ ރާމޯސް އެވެ. އޭނާ އެ ލަނޑު ޖެހީ އަޝްރަފް ޙަކީމީ ތަނަވަސްކޮށްދިން ފުރުސަތެއްގަ އެވެ. މެޗުގެ ދެ ވަނަ ހާފުގައި ޕީއެސްޖީގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ނޫނޯ މެންޑޭސް އެވެ. އެ ލަނޑު އޭނާ ޖެހީ ޑެޒައިއާ ޑޯއު ތަނަވަސްކޮށްދިން ފުރުސަތެއްގަ އެވެ. އަދި މެޗުގައި ޕީއެސްޖީގެ ތިން ވަނަ ލަނޑު ޑޯއު ޖެހީ 85 ވަނަ މިނެޓުގަ އެވެ.

މޮޅާއެކު ޕީއެސްޖީ އޮތީ 24 ވަނައިގަ އެވެ. އެއީ މިހާތަނަށް އެ ޓީމު ކުޅެފައިވާ ހަ މެޗުން ހަތް ޕޮއިންޓާ އެކު އެވެ. ހަ މެޗުގެ ތެރެއިން ޕީއެސްޖީ މޮޅުވެފައި ވަނީ ދެ މެޗުންނެވެ. އެއް މެޗު އެއްވަރުވެފައިވާއިރު، ތިން މެޗުން ވަނީ ބަލިވެފަ އެވެ.