ލިވަޕޫލަށް ކުޅެމުން އަންނަ މިޞްރުގެ ފޯވާޑު މުޙައްމަދު ޞަލާޙު ހޯދުމަށް، ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އިން ޝައުޤުވެރިވާ ކަމަށް ބުނެ ދެކެވެމުން އަންނަ ވާހަކަތައް އެ ކުލަބުގެ ރައީސް ނާސިރު އެލް ހެއްލާފީ ދޮގު ކުރައްވައިިފި އެވެ.

ލިވަޕޫލާ އެކު ޞަލާޙު ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ. ނަމަވެސް މިހާތަނަށް ލިވަޕޫލް އިން ޞަލާޙު އާއެކު އައު އެއްބަސްވުމެއްގެ ވާހަކަ ދައްކާފައި ނުވާ ކަމަށް އޭނާ ވަނީ ބުނެފަ އެވެ. އެހެންކަމުން މިވަގުތު އެންމެ ގާތީ ލިވަޕޫލް ދޫކޮށްލުން ކަމަށް ވެސް ޞަލާޙު ވަނީ ބުނެފަ އެވެ.

މީޑިއާ ތަކުގައި ރިޕޯޓުކޮށްފައިވާ ގޮތުން ޞަލާޙު ހޯދުމަށް ޝައުޤުވެރިކަން ފާޅު ކުރަމުން އަންނަ ކުލަބުތަކުގެ ތެރޭގައި ފްރާންސްގެ ގަދަ ބާރު ޕީއެސްޖީ ވެސް ހިމެނެ އެވެ. އެހެންކަމުން ލިވަޕޫލް ދޫކޮށްލަން ޞަލާޙު ނިންމާ ނަމަ، އޭނާ ހޯދުމަށް ޕީއެސްޖީން ވަރަށް ބޮޑަށް މަސައްކަތް ކުރާނެ ކަމަށް ވެސް ރިޕޯޓުތަކުގައި ވަނީ ބުނެފަ އެވެ.

އެކަމާ ގުޅޭ ގޮތުން ވާހަކަ ދައްކަވަމުން ނާސިރު އެލް ހެއްލާފީ ވިދާޅުވީ، ޕީއެސްޖީ އިން ޞަލާޙު އަށް ޝައުޤުވެރިވާ ކަމަށް ބުނެ ދެކެވެމުން އަންނަ ވާހަކަ ތަަކަކީ އެކަމުގައި އެއްވެސް ހަޤީގަތެއް ނުވަތަ ތެދެއް އެކުލެވިގެންވާ ވާހަކައެއް ނޫން ކަމަށެވެ. ޞަލާޙު އަކީ ވަރަށް މޮޅު އަދި އެހާމެ ހުނަރުވެރި ކުޅުންތެރިޔެއްކަން ފާހަގަ ކުރަމުން ނާސިރު އެލް ހެއްލާފީ ވިދާޅުވީ، ތެދުތެދަށް ބުނާ ނަމަ ޕީއެސްޖީގެ ވިސްނުން ޞަލާޙު އަކަށް ނެތް ކަމަށެވެ. ޚާއްސަކޮށް ޞަލާޙު އަކީ ކޮންމެ ކުލަބަކުން ވެސް ބޭނުންވާނެ ފަދަ ކުޅުންތެރިޔެއް ކަމަށާއި، ނަމަވެސް ޕީއެސްޖީއާ ގުޅުވައިގެން ދެކެވެމުން އަންނަނީ ދޮގު ވާހަކަތަކެއް ކަމަށް އޭނާ ވިދާޅުވި އެވެ.

މިހާތަނަށް ލިވަޕޫލާ އެކު ހާދަކޮށްފައިވާ އަށް ސީޒަންގެ ތެރޭގައި ޞަލާޙު ވަނީ އެ ކުލަބަށް ކުޅެދިން 370 މެޗުގައި 226 ލަނޑު ޖަހައިފަ އެެވެ. ލިވަޕޫލާ އެކު އޭނާ ވަނީ ހަތް ތައްޓެއް ކާމިޔާބު ކޮށްފަ އެވެ. އޭގެ ތެރޭގައި އިނގިރޭސި ޕްރިމިއާ ލީގު، އެފްއޭ ކަޕް، ކަރަބޯ ކަޕް، އެފްއޭ ކޮމިއުނިޓީ ޝީލްޑު، ޔުއެފާ ޗެމްޕިއަންސް ލީގު، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް ކާމިޔާބު ކުރުން ހިމެނެ އެވެ. މިވަގުތު ލިވަޕޫލްގައި ތިބި ކުޅުންތެރިންގެ ތެރެއިން އެންމެ މުހިންމު ދައުރެއް އަދާ އެއް ކުޅުންތެރިޔަކީ ވެސް ޞަލާޙު އެވެ.