ސަސް ބަލިކޮށް އީގަލްސް ފަސްވަނައަށް

ދިރާގު ދިވެހި ޕްރިމިއާ ލީގުގައި ހުކުރު ދުވަހުގެ ހަވީރު ކުޅުނު މެޗުން ސުޕަ ޔުނައިޓެޑް ސްޕޯޓްސް (ސަސް) ބަލިކޮށް ތާވަލުގެ ފަސްވަނައަށް ކުލަބު އީގަލްސް ޖެހިލައިފިއެވެ.

ލީގުގެ ކުޅުން ހުކުރު ދުވަހު އަލުން ފެށީ 52 ދުވަހުގެ މެދުކެނޑުމަކަށްފަހުއެވެ. އެގޮތުން މެދުކެނޑުމަށްފަހު ކުޅުނު ފުރަތަމަ މެޗުން އީގަލްސް މޮޅުވީ ސަސް އަތުން 2-1 ގެ ނަތީޖާއަކުންނެވެ.

ޤައުމީ ފުޓްބޯޅަ ދަނޑުގައި ކުޅުނު މެޗުގައި އީގަލްސްއިން ދެ ލަނޑުވެސް ޖަހާފައިވަނީ މެޗުގެ ކުރީކޮޅެވެ. އެގޮތުން މެޗު ފަށައިގެން 10 ވަނަ މިނެޓުގައި ލިބުނު ޕެނަލްޓީއަކުން އީގަލްސްއަށް ލީޑު ނަގައިދިނީ މި ފަހަރުގެ ޓްރާންސްފާ ބާޒާރުގައި އެ ޓީމާ އަލަށް ގުޅުނު ރަޝިއާގެ ފޯވާޑް ވްލަޑިސްލާވް ކޮރްމިޝިނެވެ. މިއީ އޭރިއާ ތެރެއިން އީގަލްސްގެ މިސްރު ފޯވާޑް މުޙައްމަދު އޮސާމާއަށް ސަސްގެ ކެޕްޓަން އަބްދުﷲ ހަނީފް (ބެންޖޯ) ކުރި ފައުލަކަށް ރެފުރީ ދިން ޕެނަލްޓީއެކެވެ. އަދި އޭގެ ތިން މިނެޓު ފަހުން ހަސަން ރާއިފް އަހުމަދު (ހަންނަ) ދިން ބޯޅައަކުން ވްލަޑިސްލާވް ވަނީ އީގަލްސްއަށް ލީޑު ފުޅާކޮށްދީފައެވެ.

ނަމަވެސް އޭގެ ފަހުން ސަސްއިން ވަނީ މި މެޗުގައި ކުޅުން ރަނގަޅުކޮށްފައެވެ. އެގޮތުން ދެވަނަ ހާފު ފަށައިގެން ފަސްވަނަ މިނެޓުގައި ބެންޖޯ ބޮލުން ނުރައްކާތެރި ހަމަލާއެއް ފޮނުވާލިއިރު، އެ ހަމަލާ އީގަލްސްގެ ލުބުނާން ގޯލްކީޕަރު މުޙައްމަދު ތޯހާ ވަނީ ދިފާއުކޮށްފައެވެ. އަދި މެޗު ނިމެން ހަތް މިނެޓަށް ވެފައި ވަނިކޮށް މޮރޮކޯގެ މިޑްފީލްޑަރު މުޙައްމަދު އަޖްނާނީ ފޮނުވާލި ހިލޭ ޖެހުމެއް ވަނީ ގޯލުގެ ހުރަސް ދަނޑިއަށް އަމާޒުވެފައެވެ.

މި މެޗުގެ ފަހުކޮޅު ސަސްއިން ރަނގަޅު ކުޅުމެއް ދެއްކިއިރު، އެ ޓީމުން ފަރަގު ކުޑަކޮށްފައިވަނީ މެޗު ނިމެން ތިން މިނެޓަށް ވެފައި ވަނިކޮށެވެ. މި ލަނޑު އެ ޓީމަށް ޖަހައިދިނީ މި ފަހަރުގެ ޓްރާންސްފާ ބާޒާރުގައި އެ ޓީމާ އަލަށް ގުޅުނު ސްވިޑެންގެ ފޯވާޑް ޝްކޮޑްރަން މަހޯލީއެވެ. މި މެޗުގައި އޭނާ ކުޅެން އަރާފައިވަނީ ދެވަނަ ހާފުގައެވެ.

މި މެޗުން އީގަލްސް މޮޅުވިއިރު، މިއީ އީގަލްސްގެ ކޯޗުކަމާ މުޙައްމަދު ޝާޒްލީ (ޝާޒް) ހަވާލުވި ފަހުން އެ ޓީމުން ކުޅުނު ފުރަތަމަ މެޗެވެ. މެޗަށްފަހު ޝާޒް ބުނީ އީގަލްސްއާއެކު އޭނާގެ އަމާޒަކީ ގަދަ ހައެއް ކަމަށާއި، އެގޮތުން ފުރަތަމަ މެޗުން މޮޅުވުމަކީ އެ އަމާޒަށް ވާސިލުވުމަށް ލިބިގެންދިޔަ ހިތްވަރެއް ކަމަށެވެ. އަދި ލީގު މެދުކަނޑާލުމާ ގުޅިގެން ޓީމު ދަސްކުރަން ވަގުތު ކޮޅެއް ލިބުމަކީ ފައިދާއެއްގެ ގޮތުގައި ބެލިދާނެ ކަމަށާއި، އެކަމަކު މެޗެއް ނުކުޅެ ހުރުމުން އޭގެ ދަތިތަކެއް ވެސް ދިމާވި ކަމަށްވެސް ވަނީ ބުނެފައެވެ.

މެޗަށްފަހު އީގަލްސްގެ ކުރީގެ ކޯޗު އަދި ސަސްއަށް މިހާރު އިރުޝާދުދެމުން އަންނަ މުހައްމަދު ޝިޔާޒް (މޯހަން) ބުނީ ބޮޑު މެދުކެނޑުމަކަށްފަހު މެޗަށް ނުކުންނައިރު އުނދަގޫތަކެއް ހުންނާނެ ކަމަށާއި، އެގޮތުން މި މެޗުން އެ ޓީމު ބަލިވީ މެޗުގެ ކުރީކޮޅުގައި ހެދުނު ގޯސްތަކަކުން، ވަން ލަނޑުތަކެއްގެ ސަބަބުން ކަމަށެވެ.

ހުކުރު ދުވަހުގެ ހަވީރު ސަސް އަތުން ހޯދި މޮޅާއެކު ތާވަލުގެ ފަސްވަނައަށް އީގަލްސް ޖެހިލީ ކުޅުނު ނުވަ މެޗުން ލިބުނު 11 ޕޮއިންޓާއެކުއެވެ. އަދި އީގަލްސް އަތުން ބަލިވި ސަސް އޮތީ ތާވަލުގެ ހަތްވަނައިގައި ނުވަ މެޗުން އަށް ޕޮއިންޓް ހޯދައިގެންނެވެ.