މިޔަންމާގެ އަސްކަރިއްޔާއިން އެ ޤައުމުގައި ހިންގަމުންދާ ބަޣާވަތާ ދެކޮޅަށް އެ ޤައުމުގައި ކުރިއަށްގެންދާ ސިލްސިލާ މުޒާހަރާތަކުގައި މިހާތަނަށް 300ށް ވުރެ ގިނަ މީހުން މަރުވެފައިވާކަމަށް އަންދާޒާ ކުރެވޭ ކަމަށް މަޝްރަޙު ދިރާސާ ކުރާ ފަރާތްތަކުން ބުނެފިއެވެ.

އެސިސްޓެންސް އެސޯސިއޭޝަން ފޮރ ޕޮލިޓިކަލް ޕްރިޒަނަރސް (އޭއޭޕީޕީ) އިން ރިޕޯޓް ކޮށްފައިވާ ގޮތުން، މަރުވި މީހުންގެ އަދަދު ގާތްގަނޑަކަށް 300ން މައްޗަށް އަރާނެއެވެ. ނަމަވެސް އަސްކަރިއްޔާގެ މަސްދަރުތަކާ ޙަވާލާދީ ރިޕޯޓުތައް ބުނާ ގޮތުން މި މުޒާހަރާތަކުގައި މިހާތަނަށް މަރުވެފައިވަނީ ގާތްގަނޑަކަށް 164 މީހުންނެވެ.

އޭއޭޕީޕީއާ ޙަވާލާދީ ރޮއިޓަރސްގައި ރިޕޯޓު ކޮށްފައިވާ ގޮތުން 1 ފެބްރުއަރީން ފެށިގެން މިޔަންމާގައި އަސްކަރީ ބަޣާވާތެއްގެ ދަށުން އެ ޤައުމުގެ ސިފައިން ވެރިކަން ކުރަމުން އަންނައިރު، އެކަމާ ދެކޮޅަށް އަދިވެސް ގިނަ ބަޔަކު ގެންދަނީ އަޑުއުފުލައި މުޒާހަރާ ކުރަމުންނެވެ. އެގޮތުން މި މުޒާހަރާގައި މިހާތަނަށް 300ށް ވުރެ ގިނަ މީހުން މަރުވެފައިވާއިރު، އޭގެ ތެރެއިން 90 އިންސައްތަ މީހުންނަކީ ބަޑީގެ ޙަމަލާތައް އަމާޒުވެގެން މަރުވެފައިވާ މީހުންކަމަށް ރޮއިޓަރސްގައި ރިޕޯޓު ކޮށްފައިވެއެވެ. ރިޕޯޓުތައް ބުނާގޮތުން މާރޗް މަހުގެ 25 ގެ ނިޔަލަށް 320 މީހަކު މަރުވެފައިވެއެވެ. އޭގެ ތެރެއިން 36 އިންސައްތައެއްހާ މީހުންނަކީ 24 އަހަރުން ދަށުގެ ޒުވާނުންނެވެ.

އޭގެ އިތުރުން، އަސްކަރިއްޔާއާ ދެކޮޅަށް ބާއްވަމުން ގެންދާ މުޒާހަރާތަކުގެ ތެރެއިން މިހާތަނަށް 3000ށް ވުރެ ގިނަ މީހުން ހައްޔަރުކޮށްފައިވާއިރު، އޭގެ ތެރެއިން ގިނަ ބައެއްގެ މީހުންގެ މައްޗަށް ދައުވާ އުފުލައި، ބައެއް މީހުން ޖަލަށް ލާންވެސް ޙުކުމްކޮށްފައިވެއެވެ.

މިޔަންމާގެ އަސްކަރިއްޔާއިން އެ ޤައުމުގައި ހިންގަމުންދާ ބަޣާވަތުގައި ހިނގި ކުރިމަތިލުންތަކުގެ ތެރެއިން މިހާތަނަށް މަރުވި އެންމެ ތުއްތު ކުއްޖަކީ 7 އަހަރުގެ ކިން މަޔޯ ޗިޓްއެވެ. އަންގާރަ ދުވަހު މަރުވި މި ކުއްޖާގެ އާއިލާއާ ޙަވާލާދީ ބީބީސީގައި ރިޕޯޓް ކޮށްފައިވާ ގޮތުން އޭނާ މަރާލާފައިވަނީ މިޔަންމާގެ މެންޑެލޭ ސިޓީންނެވެ. ބަޑީގެ ޙަމަލާ އަމާޒުވުމާއެކު، ރެސްކިއު ޓީމުތަކުން ވަގުތުން އެކުއްޖާ ހޮސްޕިޓަލަށް ގެންގޮސް ފަރުވާދޭން މަސައްކަތް ކޮށްފައިވެއެވެ. ނަމަވެސް ގިނަ އިރުތަކެއް ނުވަނީސް އެކުއްޖާ ވަނީ މަރުވެފައެވެ.