ރޮހިންޖާ ރެފިއުޖީން އުފުލި ބޯޓެއް އަޑިޔަށް ގޮސް އެތައް ބަޔަކު މަރުވެއްޖެ

މިޔަންމާ އިން ފިލައިގެން ދިޔަ ރޮހިންޔާ ބަޔަކު އުފުލި ބޯޓެއް ތައިލެންޑާއި މެލޭޝިޔާގެ ކަނޑުގެ ސަރަހައްދުގައި އަޑިއަށް ގޮސް، މަދުވެގެން ހަތް މީހުން މަރުވެ، ސަތޭކަ އެއްހާ މީހުން ގެއްލިއްޖެ އެވެ.

ރެސްކިއު ޓީމުތަކުން އާދީއްތަ ދުވަހު ހަތް މީހެއްގެ ހަށިގަނޑު ހޯދާފައިވާއިރު، އޭގެ ތެރޭގައި ފަސް އަންހެނުންނާއި އަންހެން ކުއްޖަކު ހިމެނެއެވެ. މި ސަރަހައްދުގެ މެލޭޝިޔާ މެރިޓައިމް އެންފޯސްމަންޓް އޭޖެންސީ (އެމްއެމްއީއޭ) ގެ ވެރިޔާ ރުމްލީ މުސްތަފާ ބުނި ގޮތުގައި، މިހާތަނަށް 13 މީހަކު ސަލާމަތްކޮށްފައިވެއެވެ.

ބޯޓަކީ މިއަންމާގެ ރަކައިން ސްޓޭޓުން މީގެ ތިން ދުވަސް ކުރިން 300 އެއްހާ ރޮހިންޔާ މީހުންގެ ބޮޑު ގުރޫޕެއްގެ ގޮވައިގެން ފުރި ބޯޓުތަކުގެ ތެރެއިން ބޯޓެއް ކަމަށް އޮތޯރިޓީތަކުން ބުނެފައިވެއެވެ.

ދެ ބޯޓު މިހާތަނަށް ގެއްލިފައިވާއިރު، ލަންކާވީގެ ކައިރީގައި 583 އަކަކިލޯމީޓަރު (170 އަކަ ނޯޓިކަލް މޭލު) ފުޅާ ސަރަހައްދެއްގައި ރެސްކިއު އޮޕަރޭޝަންތައް ކުރިއަށްދެއެވެ.

މީހުންނާއި ގެއްލިފައިވާ ބޯޓުތައް ހޯދުމުގެ މަސައްކަތް ކުރަނީ މެލޭޝިޔާ މެރިޓައިމް އެންފޯސްމަންޓް އޭޖެންސީ އާއި މެރިން ޕޮލިހުން ނެވެ.

މެލޭޝިއާ ގެ އޮފިޝަލުން ބުނާ ގޮތުގައި އެ ސަރަހައްދުގައި އިންސާނުންގެ ވަގުފާރި ކުރާ ފަރާތްތަކުން މިހާރު ވަރަށް ބޮޑަށް ހަރަކާތްތެރިވަމުން އަންނަނީ، ރެފިއުޖީން ހިއުމަން ޓްރެފިކިންގެ ޝިކާރައަކަށް ހަދައިގެން، ރިސްކު ބޮޑު ކަނޑުގެ މަގުތައް ބޭނުން ކޮށްގެން އެކަމުން ފައިދާ ނެގުމުގައެވެ.

ރިޕޯޓުތަކުން ދައްކާ ގޮތުގައި، ޓްރެފިކަރުން މި ނުރައްކާތެރި ދަތުރަށް ބޮލަކަށް 3،500 ޑޮލަރާ ހަމައަށް ނަގައެވެ.

މެލޭޝިޔާ އަކީ އޭޝިއާގެ އެހެން ސަރަހައްދުތަކުން މިލިއަނެއްހާ މީހުން ހިޖުރަ ކޮށްފައިވާ ރެފިއުޖީން ދިރިއުޅޭ ގައުމެއް ކަމަށްވާއިރު، އޭގެ ތެރޭގައި ގިނައީ ޑޮކިއުމަންޓު ނެތް، ކޮންސްޓްރަކްޝަނާއި އެގްރިކަލްޗަރު ފަދަ އިންޑަސްޓްރީތަކުގައި މަސައްކަތްކުރާ މީހުންނެވެ.

މުސްލިމް ރޮހިންޔާ މައިނޯރިޓީގެ މެންބަރުން އެ މީހުންގެ ވަޒަނުން ފިލައިގެން ދަނީ، ބުދު ދީނުގެ އަޣުލަބިއްޔަތު އޮންނަ މިޔަންމާގެ އަނިޔާވެރިކަމުން ރައްކައުތެރި ކަން ހޯދުމަށެވެ. އެ ގޮތުން މިޔަންމާ ދޫކޮށް ދިޔަ މިލިއަނެއްހާ ރޮހިންޔާ ރެފިއުޖީން ދިރިއުޅެނީ ދެކުނު ބަންގްލަދޭޝްގެ ކޭމްޕުތަކުގައެވެ.

2021 ޑިސެމްބަރުގައި ހިނގި އެންމެ ބޮޑު ހާދިސާތަކުގެ ތެރެއިން، މެލޭޝިޔާގެ ކަނޑުގެ ސަރަހައްދުގައި ގިނަ ބޯޓު ތަކެއް ފެތުނު ހާދިސާތަކުގައި 20 އަށް ވުރެ ގިނަ މީހުން ގެނބިގެން މަރުވިއެވެ.