ބަންދުކޮށްފައިވާ މިޔަންމާގެ ކުރީ ލީޑަރު ސޫކީ ޖަލުގައި އެކަހެރިކޮށްފި
24 ޖޫން 2022 | ހުކުރު 08:34ސޫކީގެ ހުރިހާ އަޑުއެހުންތަކެއް ދެން ކުރިއަށް ދާނީ ޖަލުގައި ހުންނަ ކޯޓްރޫމްގައި
މިޔަންމާގެ ކުރީގެ ލީޑަރު އަންގްސަން ސޫކީ
ބަންދުކޮށްފައި ހުރި މިޔަންމާގެ ކުރީގެ ލީޑަރު އަންގްސަން ސޫކީ ޖަލުގައި އެކަހެރިކޮށްފައިވާ ކަމަށް އެގައުމުގެ އަސްކަރިއްޔާގެ ތަރުޖަމާން ވިދާޅުވެއްޖެއެވެ.
ރޮއިޓަރސްގައި ރިޕޯޓުކޮށްފައިވާގޮތުން ސޫކީ ވެރިކަމުން ބާލައި ހައްޔަރުކޮށް ބައިންދާފައި އިން ތަނުން މިހާރު އެގައުމުގެ ވެރިރަށުގައި ހުރި ޖަލަކަށް ބަދަލުކޮށް ޖަލުގައި އެކަހެރިކޮށްފައިވާކަމަށް ތަރުޖަމާނު ވިދާޅުވެފައިވެއެވެ. އެގޮތުން ރިޕޯޓުތައް ބުނާގޮތުން ސޫކީ ބައިންދާފައި އިންނަނީ ޖަލުގެ ވަކި އިމާރާތެއްގައެވެ.
އެގޮތުން ތަރުޖަމާން ވަނީ ސޫކީ ޖަލަށް ބަދަލުކުރެވިފައި ވަނީ އެގައުމުގެ ގާނޫނާ އެއްގޮތަށް ކަމަށްވެސް ވިދާޅުވެފައެވެ.
މިދިޔަ އަހަރުގެ ފެބްރުއަރީ މަހު ސޫކީ ވެރިކަމުން ބޭލުމަށްފަހު މިހާތަނަށް އޭނާއާ ދެކޮޅަށް 20 މައްސަލައެއް ވާނީ ސާބިތުވެފަައެވެ. އޭގެ އަދަބެއްގެ ގޮތުން ޖަލުގައި 190 އަހަރުގެ ހޭދަކުރުމަށް ސޫކީއަށް ވަނީ ހުކުމްކޮށްފައެވެ.
ސޫކީގެ މައްޗަށް ސާބިތުކޮށްފައިވާ މައްސަލަތަކުގެ ތެރޭގައި ކޮރަޕްޝަންގެ މައްސަލަތައްވެސް ހިމެނެއެވެ. މިހުރިހާ މައްސަލައަކަށްވެސް ސޫކީ ވަނީ އިންކާރުކޮށްފައެވެ.
ސޫކީގެ ހުރިހާ އަޑުއެހުންތަކެއް ދެން ކުރިއަށް ދާނީ ޖަލުގައި ހުންނަ ކޯޓްރޫމްގައި ކަމަށް ރޮއިޓަރސްއިން ވަނީ ރިޕޯޓުކޮށްފައެވެ.
