އައުންގ ސަން ސޫޗީ ގެ ގެ ނީލަން ކިއުމުން އެއްވެސް ފަރާތަކުން ބިޑް ނުކުރި

މިޔަންމާގެ ކުރީގެ ލީޑަރ އައުންގ ސަން ސޫޗީގެ ގެ ނީލަން ކިއުމުން އެއްވެސް ފަރާތަކުން އެގެ ގަތުމަށް ބިޑް ނުކުރިއެވެ. "ލޭކް ފްރަންޓް" ގައި ހުންނަ މިގެ ވިއްކާލަން ނިންމީ އެގޭގެ މިލްކްވެރިކަމާ މެދު ސޫޗީގެ އަޚަކާ ދެމެދު އޮތް ދުވަސްވީ ދެބަސްވުމަކާގުޅިގެން މިދިޔަ ޖެނުއަރީ މަހު ކޯޓުން ކުރި އަމުރަކަށް ފަހުއެވެ.   

ސޫޗީގެ ވެރިކަން 2021 ވަނަ އަހަރު ގެނެވުނު މިލިޓަރީ އިންގިލާބެއްގައި ވައްޓާލިފަހުން އެކަމަނާ އަދިވެސް ހުންނެވީ ޖަލު ބަންދުގައެވެ. އަދި 2022ވަނަ އަހަރުގެ ޑިސެމްބަރުގެ ފަހުން އެކަމަނާގެ ލޯޔަރުންނާ ބައްދަލު ނުކުރެވޭ ކަމަށް ވެއެވެ. އެހެން ކަމުން ސޫޗީގެ ހުއްދަ ނެތި ގެ ވިއްކާލުމަށް ނީލަމަށް ލީ މައްސަލަ ސޫޗީގެ ލޯޔަރުން ވަނީ ޖައްސާފައެވެ.

ދެބުރިއަށް ހުރި އިހުގެ ގަދީމީ ގޭގެ އަގެއްގެ ގޮތުގައި ކަނޑައަޅާފައިވަނީ 90 މިލިއަން ޑޮލަރެވެ. ބުދަ ދުވަހު ހެނދުނު 10 ޖެހި އިރު ކޯޓު އޮފިޝަލުން އެގޭ ދޮރުމައްޗަށް ޖަމާވެ، އެގެ ގަތުމަށް އެއްވެސް ފަރާތަކުން ޝައުގުވެރިވޭތޯ ތިން ފަހަރަށް އަހާފައިވާކަމަށް ވެއެވެ. ނަމަވެސް ނީލަން ނިންމާލިއިރުވެސް އެއްވެސް ފަރާތަކުން ބިޑް ހުށަނާޅާކަމަށް ވެއެވެ.އެވަގުތު އެތާތިބީ ހަމައެކަނި ނޫސްވެރިންނާ އޮފިޝަލުންނާ އަންޑަރކަވަރ ފުލުހުން ކަމަށް ވެއެވެ.

މިޔަންމާގެ ޔަންގޮންގެ، ޔުނިވަރސިޓީ އެވެނިއު ގައި ހުންނަ ލޭކްސައިޑް ހޯމް އަކީ އަންގ ސަން ސޫޗީ އާ އެއްވަރަށް މަޝްހޫރުކަން ލިބިފައިވާ ގެއެކެވެ. ސޫޗީ ބޮޑުފުޅުވީ އެގޭގަކަމަށްވާއިރު 1988 ވަނަ އަހަރު ޑިމޮކްރަސީ ކެމްޕެއިން ފައްޓަވާފައިވަނީ ވެސް އެގެއިންނެވެ. އަދި އެކަމަނާގެ ޕާޓީ ނެޝަނަލް ލީގްފޯ ޑޮމޮކްރަސީގެ މައި މަރުކަޒުގެ ގޮތުގައިވެސް ހަމަޖެއްސެވީ އެގެއެވެ. އަދި އޭގެ ފަހުން، 2010 ވަނައަހަރާހަމަޔަށް، ތިން ފަހަރެއްގެ މަތިން ޖުމްލަ 15 އަހަރު އެގޭގަ ބަންދުވެގެން ހުންނަވާފައި ވެއެވެ. އޭރު ގޭގެ ގޭޓުގެ މަތިން ނޫސްވެރިންނާ އަދި ހެޔޮ އެދޭ ފަރާތްތަކާ ބައްދަލް ކުރައްވާފައިވެއެވެ.

ސޫޗީގެ ގެ ފުރަތަމަ ނިސްބަތްވީ ސޫޗީގެ މަންމާފުޅަށެވެ.

ސޫޗީގެ ބައްޕާފުޅު، މިޔަންމާގެ މިނިވަން ކަމުގެ ބާނީ ޖެނެރަލް އައުންގ ސަން ވަނީ 1947 ގައި އަވަހާރަ ކޮށްލެވިފައެވެ. އެއަށްފަހު ސޫޗީ ގިނައިން އުޅުއްވަމުން ގެންދެވީ އެމެރިކާ އަދި އިގިރޭސި ވިލާތުގައެވެ. މަންމާ ފުޅު އާލާސް ކަންފުޅާ އުޅުއްވާތީއާއެކު އެކަމަނާ ގައުމަށް އެބުރި ވަޑައިގެންނެވީ 1988 ގައެވެ. އަދި ހަމަ އެއަހަރު ޑިމޮކްރަސީ ހަރަކާތް ފައްޓަވާފައި ވެއެވެ.