ދިވެހި ޕްރިމިއާ ލީގު އަލުން ފެށުމުގެ ހުއްދަދީފި

ދިރާގު ދިވެހި ޕްރިމިއާ ލީގު އަލުން ފެށުމުގެ ހުއްދަ ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ދީފިއެވެ.

ލީގު އަލުން ފެށުމުގެ ހުއްދަ ބުރާސްފަތި ދުވަހު އެޗްޕީއޭއިން ދިންކަން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވަނީ ޓްވިޓާ މެދުވެރިކޮށް އިއުލާންކުރައްވާފައެވެ. ލީގު އަލުން ފެށުމުގެ ހުއްދަދިންއިރު، ކޮވިޑް-19 ގެ ކޭސްތައް މާލެ ސިޓީގައި އިތުރުވުމާއެކު އެޗްޕީއޭއިން ނެރުނު އައު އުސޫލުތަކާ ގުޅިގެން ދިވެހި ޕްރިމިއާ ލީގު މެދުކަނޑާލީ މިދިޔަ ފެބްރުއަރީ މަހުގެ ތިންވަނަ ދުވަހުއެވެ.

އަދި އެ ދުވަހު ލީގު މެދުކަނޑާލީ ދެ މެޗެއް ކުޅެން ތާވަލުކޮށްފައި އޮއްވައެވެ. އެއީ ސުޕަ ޔުނައިޓެޑް ސްޕޯޓްސް (ސަސް) އާއި ކުލަބު އީގަލްސް ބައްދަލުކުރަން އޮތް މެޗާއި، ކުލަބު ގްރީން ސްޓްރީޓްސް އާއި ޔުނައިޓެޑް ވިކްޓަރީ (ޔޫވީ) ބައްދަލުކުރަން އޮތް މެޗުތަކެވެ. އެހެންކަމުން އެ މެޗުތައް ހުކުރު ދުވަހު ކުޅެން އެފްއޭއެމުން މިހާރު ވަނީ ނިންމާފައެވެ.

ލީގު އަލުން ފެށުމުގެ ހުއްދަ އެޗްޕީއޭއިން ދީފައިވަނީ ލީގު މެދުކަނޑާލުމުން ކުލަބުތަކާއި ކުޅުންތެރިންނަށް ބޮޑު ގެއްލުމަކާ ކުރިމަތިލާން ޖެހޭނެ ކަމަށާއި، އެހެންކަމުން ލީގު ފެށުމުގެ ހުއްދަދިނުމަށް އެދި ފުރަތަމަ ޑިވިޝަނުގެ ކުލަބުތަކުން އާދޭސްކޮށްފައިވާ ދަނޑިވަޅެއްގައެވެ. އެގޮތުން މިދިޔަ އަންގާރަ ދުވަހު ބޭއްވި ނޫސްވެރިންގެ ބައްދަލުވުމެއްގައި ފުރަތަމަ ޑިވިޝަނުގެ ކުލަބުތަކުން ވަނީ ވާނުވާގައި ތިބެން ޖެހުމާ ގުޅިގެން ވަރަށް ބޮޑަށް ކަންބޮޑުވުން ފާޅުކޮށްފައެވެ.

ދިވެހި ޕްރިމިއާ ލީގު އަލުން ފަށަން ހުއްދަދިންއިރު، އެޗްޕީއޭއިން މިހާރު ވަނީ އަންނަ އޭޕްރީލް މަހުގެ ހަތްވަނަ ދުވަހު އޭއެފްސީ ކަޕުގެ ކޮލިފައިންގައި ކުލަބު އީގަލްސްއިން ބޫޓާނުގެ ޗެމްޕިއަން ތިމްޕޫ ސިޓީއާ ދެކޮޅަށް ކުޅެން އޮތް މެޗު މާލޭގައި ކުރިއަށްގެންދަންވެސް ހުއްދަދީފައެވެ.

އެހެންކަމުން އެޗްޕީއޭގެ ހުއްދައާއެކު ހުކުރު ދުވަހު ލީގުގެ ކުޅުން އަލުން ފަށަން އެފްއޭއެމުން ތައްޔާރުވިއިރު، އެފްއޭއެމާއި އެޗްޕީއޭ ގުޅިގެން އެކުލަވާލި އައު އުސޫލުތަކުގެ ދަށުން ފުރަތަމަ ޑިވިޝަނުގެ ކުލަބުތަކުން އަންނަނީ މިދިޔަ ފެބްރުއަރީ މަހުގެ 25 ވަނަ ދުވަހުން ފެށިގެން ފަރިތަކުރުންތައް ކުރިއަށްގެންދަމުންނެވެ.

މެދުކެނޑުމަކަށްފަހު ލީގު އަލުން ފަށާއިރު، އެޗްޕީއޭގެ ހާއްސަ ހުއްދައެއްގެ ދަށުން މި ސީޒަން އެންމެ ފުރަތަމަ ފަށާފައިވަނީ މދިޔަ ޑިސެމްބަރު މަހުގެ އަށްވަނަ ދުވަހުއެވެ. އެގޮތުން ޗެރިޓީ ޝީލްޑް މެޗުން ސީޒަން ފެށިއިރު، ދިވެހި ޕްރިމިއާ ލީގުގެ ކުޅުން ފަށާފައިވަނީ އެ މަހުގެ 13 ވަނަ ދުވަހުއެވެ. އަދި ލީގު ކުރިއަށް ގެންދިޔުމަށް އެފްއޭއެމުން ހާއްސަ އުސޫލުތަކެއް ކަނޑައެޅިއިރު، ލީގުގެ މެޗުތައް ކުރިއަށްގެންދިޔައީ ދަނޑަށް ސަޕޯޓަރުން ނުވައްދައެވެ.

ދެވަނަ ބުރުގެ މެދުތެރެއިން ލީގު މެދުކަނޑާލިއިރު، މިހާތަނަށް ލީގުގައި ވަނީ ޖުމްލަ 34 މެޗު ކުޅެފައެވެ. އެގޮތުން ލީގު ތާވަލަށް ބަލާއިރު، ތާވަލުގެ އެއްވަނައިގައި އޮތީ އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނެވެ. އެ ޓީމަށް ކުޅުނު ނުވަ މެޗުން 21 ޕޮއިންޓް ލިބިފައިވާއިރު، ދެވަނައިގައި އޮތް ކުލަބު ވެލެންސިއާ އާއި ތިންވަނައިގައި އޮތް ދަ ގްރާންޑޭ ސްޕޯޓްސް ކުލަބަށް ނުވަ މެޗުން ލިބިފައިވަނީ 15 ޕޮއިންޓެވެ.