އޭއެފްސީ ކަޕް ބާއްވަން އުޅޭކަން ނާންގާ ކަމަށް ބުނެވުނީ އޮޅިގެން: އެޗްޕީއޭ

އޭއެފްސީ ކަޕުގެ މެޗުތައް ރާއްޖޭގައި ބާއްވަން އުޅޭކަން ނާންގާ ކަމަށް ބުނެވުނީ އޮޅިގެން ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

ދާދި ފަހުން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ވަނީއޭއެފްސީ ކަޕުގެ ދެކުނު އޭޝިއާގެ ޓީމުތަކުގެ ގްރޫޕުގެ މެޗުތައް ރާއްޖޭގައި ބޭއްވުމަށް ކުރި ބިޑް ކާމިޔާބުކޮށް، މެޗުތައް ރާއްޖޭގައި ކުޅުމުގެ ފުރުސަތު ހޯދައިފިއެވެ. އެކަމަކު ހެލްތު އިމަޖަންސީ އޮޕަރޭޝަން ސެންޓަރު (އެޗްއީއޯސީ) ގައި އާދީއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެޗްޕީއޭގެ ޑިރެކްޓަރު އަޙްމަދު ނާސިރު ވިދާޅުވީ އޭއެފްސީ ކަޕުގެ މެޗުތައް ރާއްޖޭގައި ބާއްވަން ޖެހޭކަމުގެ ވާހަކައެއް އެއްވެސް ފަރާތަކުން ހިއްސާ ކޮށްފައިނުވާ ކަމަށާއި، އެކަން ހިއްސާކުރުމުން، އަމަލުކުރާނެ ގޮތެއް އެޗްޕީއޭއިން ކަނޑައަޅާނެ ކަމަށެވެ.

ނަމަވެސް އެކަން އެފްއޭއެމުން ދޮގުކުރުމާއެކު، ރާއްޖޭގައި އޭއެފްސީ ކަޕް ބާއްވަން އުޅޭކަން ނާންގާ ކަމަށް ބުނެވުނީ އޮޅިގެން ކަމަށް އެޗްޕީއޭއިން ވަނީ ބުނެފައެވެ. އެގޮތުން އެޗްއީއޯސީގެ އޮފިޝަލަކު "ރާއްޖެ.އެމްވީ" އަށް މަޢުލޫމާތު ދެއްވަމުން ވިދާޅުވީ އޭއެފްސީ ކަޕުގެ މެޗުތައް ރާއްޖޭގައި ބާއްވަން ޖެހޭކަމުގެ ވާހަކައެއް އެއްވެސް ފަރާތަކާ ހިއްސާ ކޮށްފައިނުވާ ކަމަށް ނާސިރަށް ވިދާޅުވެވުނީ އޮޅުމަކުން ކަމަށާއި، އެޗްއީއޯސީން ދެން ބާއްވާ ނޫސްވެރިންގެ ބައްދަލުވުމުގައި އެކަމުގެ އަޕްޑޭޓެއް ދޭނެ ކަމަށެވެ.

މީގެ ކުރިން "ރާއްޖެ.އެމްވީ" އާ ވާހަކަދައްކަވަމުން އެފްއޭއެމުގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ) ވިދާޅުވީ އޭއެފްސީ ކަޕުގެ މެޗުތައް ރާއްޖޭގައި ބާއްވަން ބިޑް ކާމިޔާބުކުރުމާ ގުޅިގެން، އެކަމާ ބެހޭ ގޮތުން ބައްދަލުވުމަކަށް އެދި ސިޓީއެއް ފޮނުވާފައިވާނެ ކަމަށެވެ. ނަމަވެސް އެ ސިޓީގެ ޖަވާބު މިހާތަނަށްވެސް ލިބިފައިނުވާ ކަމަށް ޖަވާޒް ވިދާޅުވިއެވެ.

"ރާއްޖެ.އެމްވީ" އަށް މަޢުލޫމާތު ލިބިފައިވާ ގޮތުގައި އެޗްއީއޯސީގެ ޓެގް ޓީމުން ވަނީ އޭއެފްސީ ކަޕުގެ މެޗުތައް ރާއްޖޭގައި ބޭއްވުމަށް، އެ އިދާރާއިން ދޭން ޖެހޭ ހުއްދަތައް ދިނުމަށް، އެކަމާ ގުޅޭ ބައްދަލުވުމެއް ބާއްވާފައެވެ. އަދި ކުރިއަށް އޮތް ނޫސްވެރިންގެ ބައްދަލުވުމުގައި އެކަން ހިއްސާކުރުމަށް ވަނީ ނިންމާފައެވެ.

އޭއެފްސީ ކަޕުގެ ދެކުނު އޭޝިއާގެ ޓީމުތަކުގެ ގްރޫޕުގެ މެޗުތައް ރާއްޖޭގައި ބާއްވާއިރު، އެ މުބާރާތް ބޭއްވުމާ ގުޅޭ ގޮތުން އެފްއޭއެމުން މީގެ ކުރިން ވަނީ ކުޅިވަރާ ބެހޭ ވަޒީރު އަޙްމަދު މަޚްލޫފާވެސް ބައްދަލުކޮށް، މަޝްވަރާކޮށްފައެވެ. އަދި ގްރޫޕް ސްޓޭޖުގެ ފަހު ދެ މެޗު އެއް ވަގުތެއްގައި ކުޅެން ޖެހޭތީ، ކުޅިވަރާ ބެހޭ ވުޒާރާއާ ގުޅިގެން ގްރޫޕް ސްޓޭޖުގެ މެޗެއް ލ. ގަން ޒޯން ސްޓޭޑިއަމުގައި ކުޅެން އެފްއޭއެމުން އަންނަނީ މަސައްކަތްކުރަމުންނެވެ.