އޭއެފްސީކަޕް ގްރޫޕް ސްޓޭޖްގައި އިންޑިޔާގެ އޮޑިޝާ އަތުން މާޒިޔާ ބަލިވެ, މިވަގުތު ރާއްޖޭގެ ފުޓްބޯޅަ އަށް އޮތް ހަމައެކަނި އުއްމީދުވެސް ފަނޑު ވެއްޖެއެވެ.

ރާއްޖޭގެ ފުޓްބޯޅައިގެ ހާލަތު ދުވަހު ނުދާހާ ދަށަށް ގޮސް, ގައުމީ ޓީމްގެ ނަތީޖާތައްވެސް އިންތިހާއަށް ގޯސްވުމުން ދިވެހި ފުޓްބޯޅައިގެ އޮތް އުއްމީދެއް އޮތީ މާޒިޔާއާއި ގުޅިފައެވެ. މާޒިޔާއިން އޭއެފްސީކަޕް ގައި ހޯދާ ނަތީޖާތަކަށް ދިވެހި ފުޓްބޯޅައިގެ އުއްމީދުތައް ގުޅިފައި އޮތަސް ގްރޫޕްގައި އެންމެ ބަލިކަމަށް ބެލެވުނު އިންޑިޔާގެ އޮޑިޝާ އަތުން ބަލިވުމުން އެއުއްމީދުވެސް ވަނީ ފަނޑުވެފައެވެ. އިންޑިޔާގައި ކުޅުނު މެޗުން މާޒިޔާ ބަލިވީ 6-1 ގެ ބޮޑު ތަފާތަކުންނެވެ. ފުރަތަމަ ދެމެޗުން ބަލިވެ, ގްރޫޕްގެ ފުލުގައި އޮތް އޮޑިޝާއިން މާޒިޔާއާ ދެކޮޅަށް މެޗު ފެށީވެސް ގޯލަކުންނެވެ. ތިންވަނަ މިނިޓްގައި ލީޑް ނެގީ ލަލްތަތަންގާ ކައުލަރިން ޖެހި ލަނޑުންނެވެ. އެކަމަކު އޮޑިޝާގެ ކީޕަރު އަތުން ވަން ފަސޭހަ ބޯޅައަކުން މާޒިޔާއިން އެއްވަރުކޮށް އުއްމީދު ހޯދިއެވެ. ޑިފެންޑަރ ބްރަނިމިއޭ ޖޮސިޗް ބޮލުން މަޑުމަޑުން ފޮނުވާލި ބޯޅަ ގޯލަށް ވަނީ ކީޕަރު އަތް ކައިރިންނެވެ. އެހިތްހަމަ ޖެހުން މާޒިޔާއަށް ލިބުނީ މިނިޓެއް ވަންދެންނެވެ. ކާލޯސް ޑަލްގާޑޯ ލަނޑު ޖަހާ ދެވަނަ ފަހަރަށް އޮޑިޝާ އަށް ކުރިހޯދައިދިނެވެ. އަދި އޭގެ ތިން މިނިޓް ފަހުން މޯޓަޑާ ފޯލް އޮޑިޝާގެ ތިންވަނަ ލަނޑު ޖެހިއެވެ. ދެވަނަ ހާފްގެ ކުރީކޮޅު ހަތަރު ވަނަ ލަނޑު ޖެހީ އަމޭ ރަނަވާޑޭ އެވެ. އޮޑިޝާއަށް މެޗުގެ ފަސްވަނަ ލަނޑު ޖަހައިދިނީ އިސާކް އެވެ. އަދި ފަހު ލަނޑު އިތުރު ވަގުތުގައި ޖެހީ ސާހިލް ޕަންވާރެ އެވެ.

މިމެޗުގެ ކުރިން އޮޑީޝާ ވަނީ ބަނގްލަދޭޝްގެ ބަޝުންދުރަ އަތުން އަދި އިންޑިޔާގެ މޯހަން ބަގާން އަތުން ބަލިވެފައެވެ. މާޒިޔާއިން މާލޭގައި ބަޝުންދުރަ އަތުން މޮޅުވެ, މޯހަން ބަގާން އަތުން ބަލިވިޔަސް ރަނގަޅު ވާދައެއް ކުރިއެވެ. އެކަމަކު މިބައްޔާއެކު ގްރޫޕްގެ އެއްވަނަ ހޯދައިގެން ދެން އޮތް ބުރަށް ދިއުމުގެ ފުރުޞަތު މާޒިޔާއަށް ކުޑައެވެ. މިހާރު ތިން ޕޮއިންޓާއެކު ގްރޫޕްގެ ފުލުގައި އޮތީވެސް މާޒިޔާއެވެ.

މާޒިޔާއަށް ކުރިއަށް ދިއުމުގެ ފުރުޞަތު ހަނިވެފައިވާއިރު ރާއްޖޭގެ ގައުމީ ޓީމް ވަނީ ބަނގްލަދޭޝް އަތްދަށުގެ ވަރލްޑްކަޕް ގްރޫޕް ސްޓޭޖަށް ނުގޮސް ކަޓާފައެވެ.