މިކަން ކުރީ މާޒިޔާ މެޗަށް ފަހު އެނބުރި ގައުމަށް ދިއުމުގެ ތެރޭގައި
ބަނގްލަދޭޝްގެ ގައުމީ ޓީމުން ސަސްޕެންޑްކުރި ތިން ކުޅުންތެރިން
ރާއްޖޭއިން ރާ އެތެރިކުރި މައްސަލާގައި ބަންގްލަދޭޝްގެ ގައުމީ ޓީމުގެ ތިން ކުޅުންތެރިއަކު ސަސްޕެންޑްކޮށްފި އެވެ.
މިކަން ހިނގާފައިމިވަނީ ވޯލްޑްކަޕް ކޮލިފައިންގައި ރާއްޖެ އާއި ބަންގަލްދޭޝް މާލޭގައި އަންނަ ހަފުތާގެ ބުރާސްފަތި ދުވަހު ކުޅެން ޖެހޭ މުހިންމު މެޗު ކުރިއަށް އޮއްވަ އެވެ.
ބަންގްލަދޭޝްގެ މީޑިޔާތަކުން ބުނާ ގޮތުގައި ބަޝުންދުރަ ކިންގްސްގެ ފަސް ކުޅުންތެރިއަކު ވެގެން ރާއްޖެއިން 60ވުރެ ގިނަ ފުޅީގެ ރާ އެތެރެކުރީ އޭއެފްސީ ކަޕުގައި ރާއްޖޭގެ މާޒިޔާ އާއި ބަންގްލަދޭޝްގެ ބަޝުންދުރަ ކިންގް މިދިޔަ މަހުގެ 19 ވަނަ ދުވަހު ކުޅުނު މެޗަށް ފަހު އެނބުރި ގައުމަށް ދިއުމުގެ ތެރޭގަ އެވެ. މި މެޗުން މާޒިޔާ މޮޅުވީ 3-1އިންނެވެ.
މި މައްސަލާގައި ސަސްޕެންޑްކުރި ތިން ކުޅުންތެރިންނަކީ އަނީސުއްރަހުމާން ޒިކޯ އާއި ޓޮޕޫ ބަރުމާން އަދި ޝެއިހް މޮރުސަލީން އެވެ.
މި ކުޅުންތެރިންގެ ކުލަބުން ސަސްޕެންޑްކޮށް އެކަން ބަންގްލަދޭޝްގެ ފުޓްބޯޅަ ފެޑަރޭޝަނަށް ފޮނުވީ ވެސް އެމީހުންގެ ކުލަބު ބަޝުންދުރައިންނެވެ. އަދި މި މައްސަލަ އިތުރަށް ދަނީ ތަހުގީގުކުރަމުންނެވެ. މިހެންވެ ބަންގްލަދޭޝްގެ ގައުމީ ޓީމުން ވެސް މި ކުޅުންތެރިން ވަނީ ވަގުތީ ގޮތުން ސަސްޕެންޑްކޮށްފަ އެވެ. މީގެ އިތުރުން މިކަމުގައި އިތުރު ދެ ކުޅުންތެރިންތެރިއަކަށް ވެސް ތުހުމަތުކުރޭ ކަމަށް ބަޝުންދުރަ ކިންގްގެ ރައީސް އިމްރުން ހަސަން ވިދާޅުވި އެވެ. އެއީ މާޒިޔާއާ ދެކޮޅަށް ކުޅުނު މެޗުގައި ބެންޗުގައި ތިބި ފޯވަޑް ތައުހީދުލް އާލަމް ސަބޫޖް އާއި ވާތުބެކް ރިމޯން ހުސައިން އެވެ.
ބަންގަލްދޭޝް ފުޓްބޯޅަ ފެޑަރޭޝަނުގެ ރައީސް ޚާޒީ ސަލާހުއްދީން ވިދާޅުވީ ކުލަބަކުން މިފަދަ މައްސަލައެއް ހުށަހެޅުމުން އެކަން ފެޑަރޭޝަނުން ވެސް ބަލަންޖެހޭނެ ކަމަށާއި ކުޅުންތެރިން ގައުމީ ޓީމުން ސަސްޕެންޑްކުރީ މިހެންވެ ކަމަށެވެ.
ރާއްޖެއާ ދެކޮޅަށް ކުޅެން ބަންގްލަދޭޝްއިން އެކުލަވާލާ ޓީމުން މި ކުޅުންތެރިން އުނިކުރުމުން ކޯޗު މިހާރު ވަނީ އިތުރު ފަސް ކުޅުންތެރިއަކު ޓީމަށް ގެނެސްފަ އެވެ.
