މޯހަން ބަގާންއާއި ބަޝުންދުރަ އެއްވަރު، އެއްވަނައިގައި މޯހަން ބަގާން

އޭއެފްސީ ކަޕްގައި ރާއްޖޭގެ މާޒިޔާ ހިމެނޭ ގްރޫޕްގެ އެންމެ ކުރީގައި އޮތް ދެޓީމްގެ މެޗު އެއްވަރުވެއްޖެއެވެ.

އިންޑިޔާގައި އިންޑިޔާގެ މޯހަން ބަގާންއާއި ބަނގްލަދޭޝްގެ ބަޝުންދުރަ ކިންގްސް ވާދަކުރި މެޗު އެއްވަރުވީ 2-2 ނެވެ. ބަޝުންދުރައިން މޯހަން ބަގާން ހުއްޓުވީ ދެފަހަރު މަތީން ނަތީޖާ ހަމަހަމަކޮށްގެންނެވެ. މެޗުގައި ފުރަތަމަ ލަނޑު ޖަހާ ކުރިހޯދީ މޯހަން ބަގާންއެވެ. އެޓީމަށް ކުރިހޯދައިދިނީ ފުރަތަމަ ހާފްގައި ޑިމިޓްރީ ޕެޓްރަޓޯސް އެވެ. އެކަމަކު އެލިޑްގައި މޯހަން ބަގާންއަށް އޮވެވުނީ އެންމެ ދެ މިނެޓެވެ. ޑޯރީ ލަނޑެއް ޖަހާ ބަޝުންދުރަ ކިންގްސް އަށް ނަތީޖާ ހަމަހަމަކޮށްދިނެވެ. މޯހަން ބަގާންއިން ދެވަނަ ފަހަރަށް ކުރިހޯދީ ދެވަނަ ހާފް ފަށައިގެން ނުވަވަނަ މިނެޓްގައި އަސިޝް ރާއީ ޖެހި ލަނޑުންނެވެ. އެލިޑްވެސް ބަޝުންދުރައިން ހުއްޓުވިއެވެ. މޯހަން ބަގާންގެ ދަނޑުގައި ޕޮއިންޓެއް ހޯދާ, ދެވަނަ ބުރުގެ ފުރުޞަތު ދަމަހައްޓައިދިނީ ޕެނަލްޓީއަކުން ރޮބީނިއޯ ޖެހި ލަނޑުންނެވެ.

މިގްރޫޕްގައި ރާއްޖޭގެ މާޒިޔާ ވަނީ އިންޑިޔާގެ އޮޑީޝާ އަތުން 6-1 ން ބަލިވެފައެވެ. މިނަތީޖާގެ ސަބަބުން ދެވަނަ ބުރަށްދާން މާޒިޔާއަށް އަމިއްލަ ބާރެއް ނެތެވެ. އޮތީވެސް ވަރަށް ހަނި ފުރުޞަތެވެކެވެ. ކޮންމެ ޓީމެއް ތިން މެޗު ކުޅެނިމުނުއިރު އެއްވަނާގައި އޮތީ 7 ޕޮއިންޓާއެކު މޯހަން ބަގާންއެވެ. ދެވަނާގައި ބަޝުންދުރަ ކިންގްސް އޮތީ 4 ޕޮއިންޓާއެކުއެވެ. އޮޑީޝާ އެފްސީއާއި މާޒިޔާއަށް ވެސް ލިބެނީ ތިން ޕޮއިންޓެވެ. އެކަމަކު ގޯލްގެ ތަފާތަށް ބަލާއިރު މާޒިޔާ އޮތީ ފުލުގައެވެ.