ވީ އެންމެ އަވަސް ފުރުޞަތެއްގައި ފުޓްބޯޅަ ކުޅުންތެރިންގެ ޙައްޤުތައް ހޯދައިދިނުމަށް ކަމާ ގުޅުންހުރި ހުރިހާ އިދާރާތަކަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ގޮވާލައްވައިފިއެވެ.

ކުޅުންތެރިންގެ ޙައްޤުތައް ހޯދައިދިނުމަށް ބައްސާމް ގޮވާލެއްވިއިރު، ކޮވިޑް-19 ގެ ކޭސްތައް މާލެ ސިޓީގައި އިތުރުވުމާއެކު ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ނެރުނު އައު އުސޫލުތަކާ ގުޅިގެން ދިރާގު ދިވެހި ޕްރިމިއާ ލީގު މެދުކަނޑާލަން ނިންމީ މިދިޔަ ފެބްރުއަރީ މަހުގެ ތިންވަނަ ދުވަހުއެވެ. އެއާއެކު މީގެ ކުރިން ފުރަތަމަ ޑިވިޝަނުގެ ހުރިހާ ކުލަބަކުން ވަނީ ލީގު މެދުކަނޑާލުމުން ކުލަބުތަކާއި ކުޅުންތެރިންނަށް ބޮޑު ގެއްލުމަކާ ކުރިމަތިލާން ޖެހޭނެ ކަމަށާއި، އެހެންކަމުން ލީގު ފެށުމުގެ ހުއްދަދިނުމަށް ގޮވާލާފައެވެ.

މިދިޔަ ފެބްރުއަރީ މަހުގެ 25 ވަނަ ދުވަހު އެފްއޭއެމާއި އެޗްޕީއޭ ގުޅިގެން އެކުލަވާލި އައު އުސޫލުތަކުގެ ދަށުން ފުރަތަމަ ޑިވިޝަނުގެ ކުލަބުތަކަށް ފަރިތަކުރުންތައް ފެށުމުގެ ހުއްދަދިން ނަމަވެސް، މިހާތަނަށްވެސް ލީގު އަލުން ފެށުމުގެ ހުއްދަދީފައެއް ނުވެއެވެ.

އެއާއެކު އާދީއްތަ ދުވަހު ބައްސާމް ނެރުއްވި ބަޔާނުގައި ވަނީ ފުޓްބޯޅަ ކުޅުންތެރިންނަށް، އެ މީހުންގެ ވަޒީފާއަދާކުރެވޭނެ ގޮތްތަކެއް ހޯދުމަށް ކުލަބުތަކުންނާއި ކުޅުންތެރިން އަދި އެފްއޭއެމުން މިހާތަނަށް ސަރުކާރާއި، ޞިއްޙަތާ ބެހޭ ވުޒާރާ އާއި، ކުޅިވަރާ ބެހޭ ވުޒާރާ އަދި އެޗްޕީއޭއާއެކު ވަރަށް ގިނަ ފަހަރު ބައްދަލުކޮށް، ގިނަ މަޝްވަރާތަކެއް ކޮށްފައިވީ ނަމަވެސް، ކުރިމަތިވެފައިވާ މައްސަލައަކަށް އެކަށީގެންވާ ހައްލެއް ހޯދިފައިނުވާކަން ފާހަގަކުރައްވާފައެވެ.

އަދި ވިދާޅުވީ ކޮވިޑުގެ ހާލަތު ކޮންމެ ގޮތަކަށް އޮތަސް، އާދަވެގެން ދިވެހިން އަދާކުރާ ގިނަ ވަޒީފާތަކަށާއި، އިޤުތިޞާދީ ހަރަކާތްތަކަށް ޤައުމު ހުޅުވާލާފައިވީ ނަމަވެސް، ވަޒީފާއަށް ނުކުތުމުގެ ފުރުސަތު ނެތް މަދު ދާއިރާތަކުގެ ތެރޭގައި ދިވެހި ފުޓްބޯޅަ ކުޅުންތެރިންނާއި ފުޓްބޯޅަ ކުލަބުތަށް ހިމެނޭކަމީ ކަންބޮޑުވާންޖެހޭ އަދި އެކަމާ މެދު ސީރިއަސްކޮށް ވިސްނަންޖެހޭ ކަމެއް ކަމަށެވެ. އެހެންކަމުން ވީ އެންމެ އަވަސް ފުރުޞަތެއްގައި ފުޓްބޯޅަ ކުޅުންތެރިންގެ ޙައްޤުތައް ހޯދައިދިނުމަށް ކަމާ ގުޅުންހުރި ހުރިހާ އިދާރާތަކަށް ބައްސާމް ވަނީ ގޮވާލައްވާފައެވެ.

ދިވެހި ޕްރިމިއާ ލީގު މެދުކަނޑާލާފައިވާއިރު، މި ފަހަރުގެ އޭއެފްސީ ކަޕުގައި ރާއްޖެއިން ދެ ޓީމެއް ވާދަކުރެއެވެ. އެއީ އަންނަ އޭޕްރީލް މަހު ކޮލިފައިންގައި ވާދަކުރާ ކުލަބު އީގަލްސް އާއި މެއި މަހަށް ތާވަލުކޮށްފައިވާ ގްރޫޕް ސްޓޭޖުން ފުރުޞަތު ހޯދާފައިވާ ރާއްޖޭގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނެވެ. އެހެންކަމުން ދިވެހި ޕްރިމިއާ ލީގު މެދުކަނޑާލުމަކީ އެ ދެ ކުލަބަށްވެސް ކުރިމަތިވާނެ ބޮޑު ގެންޖެހުމެކެވެ.

ބައްސާމް ވިދާޅުވީ އެޗްޕީއޭގެ އުސޫލުތަކަށް ވަރަށް ފުރިހަމައަށް އަމަލުކުރަމުންދަނިކޮށް، އެކަށީގެންވާ ސަބަބެއްނެތި ފުޓްބޯޅަ ލީގު މެދުކަނޑާލުމުން އަނެއްކާވެސް ރާއްޖޭގެ ފުޓްބޯޅައަށް ކުރިއަށްވުރެ ބޮޑެތި ގެއްލުންތަކާ ކުރިމަތިވަމުން އަންނަ ކަމަށެވެ. އެގޮތުން ރާއްޖޭގެ ކުޅުންތެރިންނަށް ސަރަޙައްދީ ފެންވަރުގައި ވާދަކުރަން ލިބޭ އޭއެފްސީ ކަޕުގެ މެޗުތައް މިހާރު ކުޅެންޖެހިފައިވަނީ އެއްވެސް ވަރަކަށް ތައްޔާރުވުމެއްނެތި ކަމަށެވެ. އަދި އިންޑިއާ ފަދަ ގައުމުތަކާ ވާދަކޮށް މި މުބާރާތް ބާއްވަން ރާއްޖެއިން ފުރުޞަތު ހޯދި ނަމަވެސް، ދިވެހި ފުޓްބޯޅައަށާއި ކުޅުންތެރިންނަށް މި ލިބުނު ރަނުގެ ފުރުޞަތުގެ ޙަޤީޤީ ފައިދާ ނުލިބިދާނެތީވެ، އެކަމާ ކަންބޮޑުވާ ކަމަށްވެސް ވިދާޅުވިއެވެ.

ބައްސާމް އިތުރަށް ވިދާޅުވީ ރާއްޖެއަށްވުރެ ކޮވިޑުގެ ހާލަތު ގޯސް ޤައުމުތަކުންވެސް ފުޓްބޯޅައިގެ ހަރަކާތްތައް ކުރިއަށްގެންދިއުމަށް ފުރުޞަތު ދީފައިވާއިރު، ރާއްޖެ ވާދަކުރަންޖެހޭ ޤައުމުތައް ކަމަށްވާ ބަންގްލަދޭޝް އާއި ބޫޓާން އަދި އިންޑިއާގެ ޓީމުތައް އޭއެފްސީ ކަޕަށް ވަރަށް ފުރިހަމައަށް ތައްޔާރުވަމުން އަންނަ ކަމަށެވެ. އެހެންކަމުން ދިވެހި ޓީމުތަކަށް އެ ފުރުޞަތު ނެތުމަކީ އެފްއޭއެމުން ހިތާމަކުރާ ކަމެއް ކަމަށްވެސް ބައްސާމް ވަނީ ވިދާޅުވެފައެވެ.

ދެވަނަ ބުރުގެ މެދުތެރެއިން ދިވެހި ޕްރިމިއާ ލީގުގެ ކުޅުން ވަގުތީ ގޮތުން މެދުކަނޑާލިއިރު، މި ސީޒަން ފެށުމަށް އެންމެ ފުރަތަމަ ކުލަބުތަކުން އޮކްޓޯބަރު މަހު ފަރިތަކުރުންތައް ފެށީވެސް އެފްއޭއެމާއި އެޗްޕީއޭ ގުޅިގެން އެކުލަވާލި ހާއްސަ އުސޫލުތަކެއްގެ ދަށުންނެވެ. އަދި އޭގެ ފަހުން އެޗްޕީއޭގެ ހާއްސަ ހުއްދައެއްގެ ދަށުން މި ސީޒަން ފަށާފައިވަނީ މިދިޔަ އަހަރުގެ ޑިސެމްބަރު މަހުގެ އަށްވަނަ ދުވަހުއެވެ. އެގޮތުން ޗެރިޓީ ޝީލްޑް މެޗުން ސީޒަން ފެށިއިރު، ދިވެހި ޕްރިމިއާ ލީގުގެ ކުޅުން ފަށާފައިވަނީ އެ މަހުގެ 13 ވަނަ ދުވަހުއެވެ. އަދި ދެވަނަ ބުރުގެ މެދުތެރެއިން ލީގު މެދުކަނޑާލިއިރު، މިހާތަނަށް ލީގުގައި ވަނީ ޖުމްލަ 34 މެޗު ކުޅެފައެވެ.