އެފްއޭއެމްގެ ފައިސާ އަށް އެ އެސޯސިއޭޝަންގެ ކުރީގެ ރައީސް ބައްސާމް އަދީލް ޖަލީލް ހިޔާާނާތްތެރިވި މައްސަލައިގައި އޭނާގެ މައްސަލަ ފީފާގެ ބަހެއް ނެތި ނުބެލޭނެ ކަމަށް ބުނެ ހައިކޯޓަށް ހުށަހެޅި މައްސަލަ ބަލައި ނުގަނެ ބޭރުކޮށްލައިފި އެވެ.

ބައްސާމު މި މައްސަލަ ހައިކޯޓަށް އިސްތިއުނާފަށް ހުށަހެޅީ ފީފާގެ ފައިސާއަށް ޚިޔާނަތްތެރިވީ މައްސަލަ ފީފާގެ ބަހެއް ނެތި ކްރިމިނަލް ކޯޓަށް ނުބެލޭނެ ކަމަށް ބުނެ ނެގި ދިފާއު ކްރިމިނަލް ކޯޓުން ބަލައި ނުގަންނަން ނިންމުމުންނެވެ. އިސްތިއުނާފަށް ހުށަހެޅީ 19 ނޮވެމްބަރު ގަ އެވެ.

ހައިކޯޓުގެ ރަޖިސްޓްރާ ގެ ނިންމުމުގައި ބުނެފައިވަނީ މައްސަލަ ބަލާ ފަނޑިޔާރު ގާނޫނީ ގޮތުން ގޯހެއް ހަދާފައިވާ ކަމަށް ނުވަތަ ރިއާޔަތްކުރަންޖެހޭ މިންވަރަށް ހެކިތަކަށް ރިއާޔަތްކޮށްފައި ނުވާ ކަމަށް ނުވަތަ އިސްތިއުނާފުކުރާ ފަރާތުން ދައްކާފައިވާ ވާހަކަތަކަށް ރިއާޔަތްކޮށްފައި ނުވާ ކަމަށް ނުވަތަ ހައްގުތައް ގެއްލިފައިވާ ކަމަށް ނުވަތަ އިންސާފަށް ހުރަސްއެޅިފައިވާކަމަށް ހަމައެކަނި ބުނާ ބުނުމަކުން އެ މައްސަލައެއް ހައިކޯޓުގައި އިސްތިއުނާފުކުރުމަށް ގާނޫނު ހުއްދަކުރާ މިންގަނޑަށް ވާސިލުނުވެވޭނެ ކަމަށެވެ.

އަދި އެފަދައިން ކަންކަން ހުރިކަމަށް ބުނާނަމަ އެކަމުގައި އުފެދޭ ގާނޫނީ ބަހުސަކީ ކޮބައިކަން އެ ނުކުތާގައި އިސްތިއުނާފުކުރާ ފަރާތުން ސާފުކޮސް ބަޔާން ކުރަންވާނެ ކަމަށް ސުޕްރީމް ކޯޓުގެ ނިންމުމެއްގައި ބަޔާންކޮށްފައިވާ ކަމަށް ހައިކޯޓުގެ ނިންމުމުގައި ބުނެފައިވެ އެވެ. އަދި މައްސަލައެއް ޝަރުއީ ނިޒާމުގެ ތިން މަރުހލާއިން ބެލެވުމުގެ މާނައަކީ ދަށުކޯޓަށް ހުށަހެޅޭ ދައުވާއެއް އޮތްގޮތަށް އެ މައްސަލަ އަލުން ތިން ފަހަރު ބެލުން ނޫންކަމަށް ސުޕްރީމް ކޯޓުގެ (ފެކްޓް މޯލްޑިވްސް ޕްރައިވެޓް ލިމިޓެޑް ވ. ދިވެހި ދައުލަތް (މޯލްޑިވްސް ޕޮލިސް ސަރވިސް) ގަޒިއްޔާގައި ބަޔާންކޮށްފައިވާ ކަމަށެވެ.

އެހެންކަމުން ކްރިމިނަލް ކޯޓުގެ ޝަރީއަތުގެ ކުރިން ހުށަހަޅާ ހުށަހެޅުމާ މެދު ނިންމި ނިންމުން އިސްތިއުނާފުކުރުމަށް 3 ނުކުތާ ހުށަހަޅާފައިވާ އިރު ބައްސާމު ގެ ފަރާތުން ހުށަހަޅާފައިވާ ފުރަތަމަ ނުކުތާ އާއި، ތިންވަނަ ނުކުތާގެ ތަފްސީލުގައި ފާހަގަކޮށްފައިވާ ކަންކަމަކީ ދަށުކޯޓަށް ހުށަހަޅާފައިވާ ޝަރީއަތުގެ ކުރީގެ ހުށަހެޅުމުގައިވާ ކަންކަމަށްވާއިރު، އެ ހުށަހެޅުމާއި ގުޅިގެން ދަށު ކޯޓުން ނިންމާފައިވާ ނިންމުން ގާނޫނީ ގޮތުން ގޯސްވަނީ ކިހިނެއްކަން އެ ނުކުތާތަކުގެ ތަފްސީލުގައި ބަޔާންކޮށްފައި ނުވާ ކަމަށެވެ.

އަދި ބައްސާމު ގެ ފަރާތުން ގާނޫނު ނަންބަރު 12/2016 (ޖިނާއީ އިޖުރާއަތުގެ ގާނޫނު) ގެ 119 ވަނަ މާއްދާގެ (ހ) ގެ 6 ވަނަ ނަންބަރުގެ ދަށުން ހެކި ހާމަކުރުމަށް އެދި ހުށަހެޅި ހުށަހެޅުން ބަލައި ނުގަތުމަށް ނިންމާފައިވަނީ އެ ގާނޫނުގެ 129 ވަނަ މާއްދާގެ ދަށުން ހެކި ހާމަކުރުމަށް ލިޔުމުން އެދިފައިނުވާތީ ކަން އިސްތިއުނާފުކޮށްފައިވާ ނިންމަށް ބެލުމުން އެނގޭކަމަށް ހައިކޯޓުގެ ނިންމުމުގައި ވެއެވެ. އަދި މި ނިންމުން ގާނޫނުއަސާސީގެ 42 ވަނަ މާއްދާ އާއި، 143 ވަނަ މާއްދާގެ () އާއި ހިލާފު ކަމަށް ބައްސާމު ގެ ފަރާތުން ބަޔާންކޮށްފައިވީ ނަމަވެސް، އެފަދައިން ބުނާބުނުން ފިޔަވައި އެ ނިންމުން ގޯސްވާގޮތެއް ތަފްސީލުކޮށްފައި ނުވާ ކަމަށް ހައިކޯޓުގެ ރަޖިސްޓްރާ ގެ ނިންމުގައިވެ އެވެ.

އެފްއޭއެމްގެ ފައިސާއަށް ހިޔާނާތްތެރިވި މައްސަލައާއި މަނީލޯންޑަރިންގެ މައްސަލައިގައި ބައްސާމު ގެ މައްޗަށް ވަނީ 9 އަހަރުގެ ޖަލު ހުކުމެއް އިއްވާފަ އެވެ. ހިޔާނާތްތެރިވުމާއި މަނީލޯންޑްރިންގެ މައްސަލައިގައި ބައްސާމްގެ މައްޗަށް އެންމެ ފުރަތަމަ ހަތަރު އަހަރުގެ ހުކުމެއް އިއްވީ އޮކްޓޯބަރު 8، ގަ އެވެ. އޭނާގެ މައްޗަށް ހިޔާނާތްތެރިވުމާއި މަނީލޯންޑްރިންގެ އިތުރު މައްސަލައެއްގައި ފަސް އަހަރަށް ހުކުމްކުރީ އޮކްޓޯބަރު 30، ގަ އެވެ.