ގޯލްޑް ކްރެޑިޓް ކާޑަށް ބައްސާމް ފައިސާ ނުދައްކައިގެން ކުރި ދައުވާ, ފައިސާ ދެއްކުމުން އަނބުރާ ގެންގޮސްފި

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ކުރީގެ ރައީސް ބައްސާމް އާދިލް ޖަލީލްގެ ވިސާ ގޯލްޑް ކްރެޑިޓް ކާޑަށް ފައިސާ ނުދައްކާ ކަމަށް ބުނެ ބޭންކް އޮފް މޯލްޑިވްސް (ބީއެމްއެލް) އިން ހުށަހެޅި މައްސަލަ އަނބުރާ ގެންގޮސްފި އެވެ.

އެފްއޭއެމްގެ ފައިސާ މަނީލޯންޑަރ ކުރި މައްސަލައާއި ހިޔާނާތްތެރިވި މައްސަލައިގައި 9 އަހަރުގެ ޖަލު ހުކުމެއް ތަންފީޒު ކުރަމުން އަންނަ ބައްސާމްގެ މައްޗަށް ބީއެމްއެލް އިން ދައުވާކުރީ އޭނާގެ ވިސާ ގޯލްޑް ކްރެޑިޓް ކާޑަށް 89،997 ރުޕީސް ނުދެއްކުމުންނެވެ. ނަމަވެސް ބައްސާމް އެ ފައިސާ ދެއްކުމުން ބޭންކުން ވަނީ އެ މައްސަލަ އަނބުރާ ގެނެސްފަ އެވެ.

ބައްސާމް އެ ފައިސާ ދެއްކުމުން ސިވިލް ކޯޓުގެ ގާޒީ މުހައްމަދު އީސާފުޅު ވިދާޅުވީ ބައްސާމް ދައްކަން ޖެހޭ ހުރިހާ ފައިސާއެއް ދައްކާފައިވާ ކަމަށް ބޭންކުން ކޯޓަށް އަންގާފައިވާ ކަމަށެވެ.

ހިޔާނާތްތެރިވުމުގެ ކުށުގެ ދައުވާ ސާބިތުވެ 4 އަހަރުގެ ޖަލު ހުކުމެއް މީގެ ކުރިން އިއްވާފައިވާ އިރު މަނީ ލޯންޑަރިންގެ ދައުވާ ސާބިތުވުމުން އޭނާގެ މައްޗަށް އެފްއޭއެމްގެ ފައިސާގެ މައްސަލައިގައި މުޅި ޖުމްލަ 9 އަހަރު ދުވަހުގެ ޖަލު ހުކުމެއް މިވަނީ އިއްވާފަ އެވެ.

ހިޔާނާތްތެރިވުމާއި މަނީލޯންޑްރިންގެ މައްސަލައިގައި ބައްސާމްގެ މައްޗަށް އެންމެ ފުރަތަމަ ހަތަރު އަހަރުގެ ހުކުމެއް އިއްވީ އޮކްޓޯބަރު 8، ގަ އެވެ. އޭނާގެ މައްޗަށް ހިޔާނާތްތެރިވުމާއި މަނީލޯންޑްރިންގެ އިތުރު މައްސަލައެއްގައި ފަސް އަހަރަށް ހުކުމްކުރީ އޮކްޓޯބަރު 30، ގަ އެވެ.