ކުރީގެ ރައީސް މައުމޫނު އަބްދުލްގައްޔޫމް އިދިކޮޅު ޕީޕީއެމް/ޕީއެންސީއާ ގުޅެން ނިންމެވުމުގެ އަޑުތަކެއް ފެތުރިއްޖެއެވެ.
އިތުބާރު ހުރި ފަރާތަކުން ރާއްޖެއެމްވީއަށް ވިދާޅުވީ ރައީސް މައުމޫނު 2023ގެ ކުރިން ޕީޕީއެމް/ޕީއެންސީ ކޯލިޝަން އާ ގުޅެ އެތެރެން ނިންމާފައިވާ ކަމަށެވެ. އަދި އިދިކޮޅުން މިހާރު ބާއްވަމުންދާ ސިލްސިލާ މުޒާހަރާތަކުގެ ތެރެއިން ހުކުރު ދުވަހު ބާއްވާ އެއްވުންތަކުގައި މޯލްޑިވްސް ރިފޯމް މޫވްމަންޓް (އެމްއާރްއެމް) އަށް ނިސްބަތްވާ މެމްބަރުން ބައިވެރިވާ ކަމަށް ތުހުމަތުކޮށްފައިވެއެވެ.
މީގެ އިތުރުން ވިދާޅުވީ ޕީޕީއެމް އޮފީސް ހުންނަ ހެންވޭރު އުރަފާ އިމާރާތާއި ޖެހިގެން އިން ގުދަން ރައީސް މައުމޫންގެ އެދުމުގެ މަތިން ޖަގަހައެއް ހެދުމަށް ދީފައިވާ ކަމަށެވެ.
ނަމަވެސް މިހުރިހާ ކަމެއް އެމްއާރްއެމްގެ ސެކެޓަރީ ޖެނެރަލް އަބްދުލް އަލީމް އާދަމް ވަނީ ދޮގުކުރައްވާފައެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި އެމަނިކުފާނުގެ ބޭބޭފުޅު މައުމޫނު ވަނީ ދައުވާއަކާ ނުލައި ޖަލަށް ލާފައެވެ. އެމަނިކުފާނުގެ ދަރިކަލުން ފާރިސް މައުމޫނު ވެސް ޖަލަށް ލާފައިވެއެވެ. ސިޔާސީ ގޮތުން އުފެދުނު ދެބަސްވުންތަކާއެކު ޕީޕީއެމް ދެބައިވެ ދެފެކްޝަނެއް އުފެދިގެން ދިއުމާއެކު ރައީސް މައުމޫނަށް ތާއިދު ކުރާ ފަރާތްތަކާއެކު ވަކި ސިޔާސީ ޕާޓީއެއް އެމްއާރްއެމްގެ ނަމުގައި އުފެއްދެވިއެވެ.
އޭގެފަހުން މިސަރުކާރު އެކުލަވާލާފައިވާ ކޯލިޝަންގައި ވެސް އެމްއާރްއެމް ހިމެނެއެވެ.
