ރައްޔިތުންގެ މަޖިލީހުން މިއަދު ފާސްކުރި މީޑިއާ ކޮންޓްރޯލް ބިލަކީ ދިވެހިރާއްޖޭގެ ޑިމޮކްރަސީއަށް ލިބުނު ވަރަށް ބޮޑު ލޮޅުމެއްކަމަށް ކުރީގެ ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި ރައީސް ޞާލިހު ވަނީ، ރައީސް މުޢިއްޒުގެ ޕީއެންސީ ސުޕަރ މެޖޯރިޓީ މަޖިލިސް ބޭނުންކޮށްގެން އަވަސް އަވަހަށް މި ބިލު ފާސްކުރުމަކީ ދިވެހިރާއްޖޭގެ ނޫސްވެރިކަމުގެ މިނިވަންކަން ނިމުމަކަށް ގެނައުމަށް އެޅުނު ފިޔަވަޅެއްކަމަށް ފާހަގަ ކުރައްވާފައެވެ.

ނޫސްވެރިން، އިދިކޮޅު ޕާޓީތައް، މީޑިއާ ޖަމްޢިއްޔާތައް، މަދަނީ ޖަމްޢިއްޔާތަކާއި އަދި އާންމު ރައްޔިތުންގެ އިހުތިޖާޖުތަކަށް އެއްވެސް ވަރަކަށް ބެލުމެއްނެތި މި ބިލު ފާސްކުރި ގޮތަކީ ސަރުކާރުން ރައްޔިތުންގެ ޑިމޮކްރެޓިކް ޙައްޤުތަކަށް ދެއްވާ އަހައްމިއްޔަތުކަން ހާމަވެގެންދިޔަ ކަމެއްކަމަށް އެމަނިކުފާނު ވިދާޅުވި އެވެ.

މޯލްޑިވިއަން ޑިމޮކްރެޓިކް ޕާޓީގެ ފަރާތުން މި ބިލާ ދެކޮޅަށް ވަރަށް ހަރުދަނާ މަސައްކަތްތަކެއް ކުރާނެކަމަށް ކުރީގެ ރައީސް ޞާލިހު ވިދާޅުވިއެވެ. އެމްޑީޕީން ރައްޔިތުންގެ އިހުސާސްތަކާ ދެކޮޅަށް ކުރެވޭ މި ފަދަ ކަންކަމަށް ބޯނުލަނބާނެކަމަށާއި، އެމްޑީޕީއިން މިތިބީ ހުރިހާ ދިވެހި ރައްޔިތުންގެ އިޖްތިމާޢީ އަދި ސިޔާސީ ޙައްޤުތަކަށްޓަކައި ވަރުގަދައަށް ތެދުވެ ކުރިއަށްދާންކަމަށް ރައީސް ޞާލިހު ފާހަގަ ކުރައްވާފައިވެ އެވެ.

މި ބިލު ފާސްވުމާ ގުޅިގެން ގިނަ ބައިނަލްއަޤްވާމީ މީޑިއާ ޖަމްޢިއްޔާތަކުންވެސް ވަނީ ކަންބޮޑުވުން ފާޅުކޮށްފަ އެވެ. އަދި މިއީ ދިވެހިރާއްޖޭގެ ޑިމޮކްރަސީއަށް ލިބޭނެ ވަރަށް ބޮޑު އަނިޔާއެއްކަމަށް ފާހަގަކޮށްފައިވެ އެވެ.

މިނިވަން މީޑިއާ ނެތިކޮށްލާ ބިލު ފާސްކޮށްފައި މިވަނީ މަޖިލީސް ފެށިނީއްސުރެ ޖަލްސާ ނިމެންދެން މި ބިލު ފާސްނުކުރުމަށް ގޮވާލާ މަޖްލިސް ދޮށުގައި ގިނަ އަދަދެއްއްގެ ނޫސްވެރިންނާއި އާއްމު ރައްޔިތުން މުޒާހަރާ ކުރަމުންދަނިކޮށެވެ.

މުޒާހަރާ ރޫޅާލުމަށް ފުލުހުން ވަނީ ހާލަތާ އެކަށީގެންނުވާ ބާރުގެ ބޭނުންކޮށްފައެވެ. ބައެއް ނޫސްވެރިންގެ ބޮލަށް ކަކުލުން އަރައި، އަތް އަނބުރައި، އަންނައުނަށް ގެއްލުންދީ، ހަށިގަނޑުން ލޭ އޮހޮރުވާލާފައިވެ އެވެ.

މި ބިލު ފާސްކުރުމާއެކު ދިވެހިރާއްޖޭގެ ނޫސްވެރިކަމުގެ މިނިވަންކަން އެތައް ޒަމާނެއް ފަހަތައް ޖެހޭނެ ކަމަށް ގިނަ ބަޔަކު ފާހަގަކުރެއެވެ. އަދި އިދިކޮޅު ފަރާތްތަކުން ވިދާޅުވާ ގޮތުގައި މިއީ ވަރުގަދަ ޚުދުމުހުތާރު ވެރިކަމެއް އުފައްދަވަން ރައީސް މުއިއްޒު ކުރައްވާ މަސައްކަތްތަކުގެ ތެރެއިން ފާސް ކުރި ބިލެކެވެ. މި ބިލުގެ ސަބަބުން ދިވެހި ރައްޔިތުންނަށް ލިބިފައިވާ ހިޔާލު ފާޅުކުރުމުގެ މިނިވަންކަން ވެސް އެތައްގޮތަކުން ހަނިވާނެކަމަށް ގާނޫނީ ގޮތުން ތަޖުރިބާކާރު ފަރާތްތަކުން ފާހަގަ ކުރައްވާފައިވެ އެވެ.