"ކޮބާ ވަޒީފާއެއް ނުލިބޭތަ؟ އެއޮށް ބަހާ ނަގަނީނު" މަގުމަތިން ދިމާވި މީހަކު ގޮވާލާފައި ބުންޏެވެ. ދަންނަ ރައްޓެއްސެއް ނޫނެވެ. އެކަމަކު ފެންނަ ފެނުމަށް އެއީ ނިމިދިޔަ ރިޔާސީ އިންތިޚާބުގަ އާއި މަޖިލިސް އިންތިޚާބުގެ ކެމްޕޭނުގައި ޕީޕީއެމް ޕީއެންސީ ހަރަކާތްތަކުން ފެންނަ މީހެކެވެ.

ސަމާސާ އެއް ކޮށްލީތާއޭ ހިތާ ގާތައް ލެފިލާފައި ވީ ކީއްހޭ އަހާލައިފީމެވެ. ދެންވެސް ބުނީ ހަމަ އެވާހަކަ އެވެ. ބަހާ ނަގާ ވާހަކައެވެ. ހަޅޭލެވިވަރެއް އަވަސްވާނެއޭވެސް ބުންޏެވެ. ދުރުދުރުން ނުގޮސް ތަންކޮޅެއް ތަފްސީލު ކޮށްލަދޭން އެދުނީމެވެ. އޭނާ ބުނީ އިއްޔެއާ ހަމައަސްވެސް މުިއްޒަށް ފާޑުކިޔާ އުޅުނު މީހުންނަށް މިއަދު ވަޒީފާތައް ދެނީ ކަމަށެވެ.

ހިތާހިތާ ކިޔާލެވުނެވެ. އޭނާ އެބުނީ ވަރަށްބޮޑު ތެދެކެވެ. ފެންނަ ފެނުމަށް އެއީ ސީދާ ހަގީ ގަތެކެވެ. އަދި މަންޒަރުތައް ހުރިގޮތުން އެކަން ދާނީވެސް ކުރިއަށެވެ.

އޭނާ ބުނީ ދެއިރު ދެ ދަޅައަށް އިންޑިޔާ އައުޓް ޖައްސާފައި ރެޔާ ދުވާލު ގޭގެއަށް ހިނގާފައި މުއިއްޒު ވެރިކަމަށް ގެންނާން އުޅުނީ ޕީޕީއެމް ޕީއެންސީ މީހުންނެވެ. ދެއްކި ހުސް ގޮނޑިއާ ރައީސް ޔާމީން ސަލާމަތް ކުރެވޭންވެސް އޮތީ އެގޮތައް އެކަން ކޮށްގެންކަމަށް ވިސްނައިދިނީތީ މުއިއްޒު ހޮވަން ކުރެވުނިއްޔާ ކުރެވުނުހާ ކަމެއް ކުރެވުނު ކަމަށެވެ. އޭނާ ބުނީ އެކަން ކުރީ ގައުމަށް ހެޔޮގޮތެއް ހޯދުމުގެ ބޭނުމުގައިވެސް ކަމަށާއި އިހުއޮތް ސަރުކާރަށްވުރެ ރަނގަޅުވާނެ ކަމުގެ އުއްމީދުގައި ކަމަށެވެ.

ކުޑައިކޮށް އިތުރަށް ކޮނެލުމުގެ ބޭނުމުގައި އަނެއްކާވެސް ސުވާލު ކޮށްލީމެވެ. ތިޔަ ބުނަނީ ކޮންބައެއްގެ ވާހަކަ ހެއްޔެވެ. އޭނާ ބުނީ އިންތިޚާބު ތެރޭގައި އެންމެ ގަދައަށް ހަޅޭލެވި އެކަކު އެހެރީ ގެނެސް އެންމެގާތް އެޑްވައިޒަރަށް ލައިފަ އެވެ. ގެއެޅި ގޮތާއި ފައިސާ ހޯދި ގޮތޭ ކިޔައިގެން ވާހަކަ ދެއްކި މީހާވެސް މިހާރު އެހެރީ އެންމެ ގާތުގައެވެ. ޓެކްސްތައް މައާފް ކޮށްދިނުމާއި އެތަނުން ފަޅެއް މިތަނުން ފަޅެއް ދީފައި އެމީހުން ގެނެސް ބައިތިއްބަން މުއިއްޒަށް އޯކޭ ކަމަށެވެ. ކަމުނުދުޔައީ ޔާމީން މިނިވަން ކުރުން ކަމަށާއި ޔާމީން ގާތުގައި ހުރެގެން ބަވަބަވާފައި ލާރި ދިނީމާ ބޮޑުފަޅިއަށް އެރުން މުއިއްޒަށް ބަރާބަރު ކަމަށެވެ. އެމީހުނަށް ވަޒީފާތައް އެދަނީ އޮއްސަމުން ކަމަށެވެ.

އޭނާ ބުނީ ސަރުކާރުން ބޮޑެތި މަގާމް ދީފައި ގަނެގެން ގެންނަނީ މުޅިންވެސް އިދިކޮޅު މީހުން ކަމަށާއި ނިމިދިޔަ ސަރުކާރުގައި ވަޒީރުކަމާއި މަޖިލިސް މެންބަރުންނާ އޭރުގެ މަތިފަޑީގައިތިބި މީހުންވެސް މިހާރު މުއިއްޒަށް މާ ކަމުދާ ކަމަށެވެ. ރަށްރަށުގައިވެސް ވަޒީފާ ދެނީ ބާރަށް ހަޅޭލަވާ އިދިކޮޅު ޕާޓީތަކުގެ މީހުންނަށް ކަމަށެވެ.

އޭނާ ބުންޏަސް އެއީ ހަމަ ބޮޑު ތެދެކެވެ. އެކިޔައިދިނީ ކަން އޮތްގޮތެވެ. މުިއްޒަށް އެންމެ ބާރަށް ހަލާލެވި މީހުންނަށް އެދަނީ ވަޒީފާތައް ބަހަމުންނެވެ. ފިލްމު ކުޅޭ މީހުންނާއި ލަވަކިޔާ މީހުންނެވެ. ދެއިރުކާ ބޭހެއްހެން ޕާޓީ ބަދަލުކޮށް އުޅޭ މީހުންނެވެ. ސަރުކާރުގެ ކުންފުނިތަކަށް ލައިގެން އެމީހުންނަށް އެދެނީ މުސާރައިގެ ގޮތުގައި ފައިސާތައް ބަހަމުންނެވެ. އެއް ބަުޔަކު ަޮފީހަށް ނުކުމެ އިށީންނާނެ ތަނެއްވެސް ނެތްހާ ގިނަވެއްޖެއެވެ. ބުނެވޭ ގޮތުގައި އަނެއް ބަޔަކު އޮފީހަށް ނުކުންނާންވެސް ނުޖެހެއެވެ. މުސާރަ ދީފައި ތިބޭ ބައެއްގެ ގޮތުގަ އެވެ.

ސަރުކާރުގެ ބޮޑު ކުންފުންޏެއްގައި އުޅޭ އިސްމީހަކު ބުނީ އެމީހުންނަކީ މާމަތީ ބައެއް ކަމަށެވެ. ތަނުގައި އެތައް އަހރެއްވެފައި ތިބި މީހުންގެ މައްޗަށް އެމީހުން ގެނެސްލާފައި ހުރިހައި ހުރިހާ ކަމެއް ކުރަން ޖެހެނީ އެމީހުން ކަމަށެވެ. ސިޔާސީ މީހުންގެ ގޮތުގައި ލައިފާތިބި އޮފީހަށް ނުކުންނަ މީހުންގެ ކަމަކަށް އޮންނަނީ އެމީހުންނަށް އަމުރުކުރުމާއި މަޖާ ކުރުމެވެ. އަނެއް ބަޔަކު އޮފީހަށް ނުކުންނާންވެސް ނުޖެހޭ ކަމަށެވެ.

ކޮންމެއަކަސް މިއީ މިއަދުގެ ހާލަތެވެ. ދެފަހަރަކަށް އެއްޗެއް ބުނެލާ ސަރުކާރާ އިދިކޮޅަށް ޖައްސާލާ ގިނަ މީހުންނަށް ވަޒީފާތައް ބަހައި ރައްޔިތުންގެ ޓެކްސް ފައިސާއިން ހިލޭ ސާބަހަށް އެމީހުންނަށް އެދަނީ މުސާރަދެމުންނެވެ. ހައްދަވައިގެން ކަމެއް ކުރާން ނުޖެހޭއިރު އެއްބަޔަކު އޮފީހަށް ނުނިކުތަސް އޯކޭއެވެ. ހަމަ އެކަނި މުސާރަ ލިބޭ މުވައްޒަފުންގެ ގޮތުގައެވެ. ގޮތެއް ނެތީ ކުރިންވެސް މިހާރުވެސް ޕާޓީއަށް މަރުދިން މީހުންނަށެވެ. މުއިއްޒު ވެރިކަމަށް ގެންނަށް ރެއާ ދުވާލު މަސައްކަތްކުރި މީހުންނަށެވެ. ޕާޓީ ރޫހުގައި ޕާޓިގެ ހައްގުގައި އެމީހުން މިއަދު އެތިބެނީ އަނގައިންވެސް ނުބުނެ އެވެ. ފޮނިކޮޅު ބޮނީ އެހެން މީހުންނެވެ. އެފޮނިބޯންދެނީވެސް އެހެން މީހުންނަށެވެ. ކިޔަވައިގެން މަތީ ފާސްތައް ނަގައިގެން ތިބި މީހުން ހުސް އަތާއެވެ. ވަޒީފާ ލިބުމުގެ ޝަރުތެއްގެ ގޮތުގައި ފެންނަނީ ކުރިން މުއްޒަށް ފާޑުކިޔާފައި ވުމާއި ފިލްމު ކުޅޭ ނޫނީ ލަވަކިޔާ ތަރިއަކަށް ވުމެވެ.