މީހުން ބުނެއެވެ. ފުޅަށް ބުޑުގައިހުރެ މީހަކު ކަރުކެހިލިއަސް ހަސަނަށް ހީވާނީ ކެޔޮގަނޑު ކަނޑާލަން އުޅޭ ހެންނެވެ. އެބީދައިން އެމީހަކު ކުރާ ކަމެއް އެހެން މީހަކު ކޮށްފާނެޔޭ އަބަދުވެސް ހިތުގައި އޮންނާނެއެވެ. އެކަމުގެ ވަހުމް އަބަދުވެސް އޮންނާނީ ހިނގަ ހިނގައެވެ. އެބިރުވެރިކަން އަބަދުވެސް އޭނާއަށް އޮވެއެވެ. ގިނި ދުށް މީހާ ރަތްމަލަށް ބިރު ގަންނަ ފަދައިންނެވެ.

އެހަމައިގެ މަތިން މިއަދު ފެންނަމުން އެދަނީ އެފަދަ މަންޒަރެކެވެ. ވެރިކަމަށް އަންނަން މުއިއްޒު ކުރި ފުރަތަމަ ކަމަކީ ޕީޕީއެމްގެ ސެނެޓުގެ ނުވަތަ ޕާޓީގެ ގިނަ ބޮޑުންނަށް ސިޓީ ކައުންސިލުން ވަޒީފާ ދިނުމެވެ. އެމީހުންނަށް އެހެން ގޮތަކަށް ހޭހަން ކުރުމެވެ. ސިޓީ ކައުންސިލްގެ ތެރެއިން ފައިސާ އެއްކުރުމުގެ އިތުރުން ސިޔާސީ ގޮތުންނާއި ޕާޓީގެ ތެރެއިން ބާރުގަދަ ވުމަށެވެ. ޔާމީނަށް ކުރިމަތިލެވެން ނެތް ވަގުތު ދަނޑިވަޅު ބަލާފައި ރިޔާސީ ޓިކެޓް ހޯދީ އޭގެ ބޭނުން ހިފައިގެންނެވެ. ފަޅާއެރީ ފަހުންނެވެ. ސީދާ އަދުރޭވެސް ދެއްކި ވާހަކަތަކުންނެވެ. ވެރިކަމަށް އާދެވުމާއެކު ދެން ކަންކުރައްވާން ފެށްޓެވި ގޮތުންނެވެ.

އެބިރު އަބަދުވެސް މުއިއްޒަށް އޮވެއެވެ. ޕާޓީގެ ތެރެއިން ގޯހެއް ހަދާފާނެ ކަމުގައެވެ. އެކަމަށްޓަކައި އެޅި ފުރަތަމަ ފިޔަވަޅަކީ ޕާޓީ ރަނގަޅަށް ހިސޯރުކޮށް ޕީޕީއެމް އުވާލުމެވެ. ޕީއެންސީ ވަރުގަދަ ކުރިއިރު މުއިއްޒުގެ މައްޗަށް ބަސްކިޔޭނޭ އެކަކުވެސް އެޕާޓީގެ ކުޑައިން ބޮޑަށް ނެތުމެވެ. އެންމެނަށް ވަޒީފާދީ ތަޅުއެޅުވުމެވެ. މަޖިލިސް މެންބަރުން އަނގައިގާ ޓޭޕުއަޅުވާ އެމީހުން އޮބަހެއްޓުމެވެ.

ކައުންސިލްތަކުގެ ބާރު ކަނޑުވާލުމަކީވެސް އޭގެ ބޮޅެކެވެ. މެޖޯރިޓީ ނެތް ކައުންސިލްތަކުން މުއިއްޒު ކުޅުނު ކުޅި ކުޅެފާނެތީއެވެ. މީހުން ވަޒީފާތަކަށްލާފާނެތީއެވެ. ސަރުކާރަށް ތުރާލެއްވާފަދަ ކަމެއް ކޮށްފާނެތީއެވެ.

ވެރިކަމަށް އަންނަން ބޭނުންކުރީ ސީދާ ދޮގު ވާހަކައެވެ. ގައުމު ވިއްކާލުމެވެ. އިންޑިޔާ ސިފައިން ހާހުން ހާހުން މިތާ ތިބުމެވެ. އިންޑިޔާއާއެކު ހަދާފައިވާ އެއްބަސްވުންތަކުގެ ސަބަބުން ރާއްޖޭގެ ސިޔާދަތާއި އިސްތިގްލާލް ގެއްލިގެން ދިއުމެވެ. މުޅި ސަރުކާރާއި ދިފާއީ ބާރުގެ މައްޗަށް އިންޑިޔާއާއި އިންޑިޔާ މިލިޓްރީން ބާރު ފޯރުވުމެވެ. ސީދާ ރައީސުލް ޖުމްހޫރިއްޔާއަކީ އިންޑިޔާގެ ބޮޑުވަޒީރު މޯދީ ކޮންޓްރޯލް ކުރާ މީހަކަށް ވުމެވެ. މިހެންގޮސް ކިޔާފަ ނުކިޔާނެ އެއްޗެއް ނެތެވެ. އެވާހަކަތައް ދައްކާން އެންމެ ބޮޑަށް ބޭނުންކުރީ ސޯޝަލް މީޑިޔާއެވެ. ޕާޓީގެ އެކްޓިވިސްޓުން ލައްވައި އޭގެ އެތައް ވާހަކައެއް ސޯޝަލް މީޑިޔާގައި އަނބުރާ ރައްޔިތުން ސަރުކާރާމެދު ނަފްރަތު އުފެއްދިއެވެ. ސަރުކާރުގެ އަމަލްތަކުން ފުދިއްޖެކަމާ ސަރުކާރާ ދެކޮޅަށް ނުކުމެ ސަރުކާރު ބަދަލުކުރަން ވެއްޖެ ކަމަށް ރައްޔިތުންނަށް ވިސްނައިދިނީއެވެ. އެކަމުގައި އެއްވުމާއި މުޒާހަރާވެސް ކޮށް ހެދީއެވެ. ކޮވިޑްގެ ވަބާގައި މުޅި ރާއްޖެ ލޮކްޑައުންކޮށްފައި އޮއްވައި އެއަށްވެސް ބަލާލުމެއް ނެތިއެވެ.

ދެން އެއެޅި ފިޔަވަޅު އެއަޅަން ފެށީ އެބިރުވެރިކަމާހެދިއެވެ. ޚިޔާލު ފާޅުކުރުމުގެ މިނިވަންކަން ހުއްޓުވާލުމަށް ގާނޫނެއް އެހެދީ އެސަބަބާ ހުރެއެވެ. އަބުރޭ، އެހެންމީހުންގެ ހައްގޭ ޅަފަޅޮލޭ ކިޔައިގެން އެހެދި ގާނޫނުގެ މައިގަނޑަކީ ސޯޝަލް މީޑިޔާ ކޮންޓްރޯލް ކުރުމެވެ. ސޯޝަލް މީޑިޔާގައި މީހުން ކުރާ ޕޯސްޓާހުރެ މީހުން ފުލުހަށް ހާޒިރުކޮށް ސުވާލު އެކުރަނީ އެބިރު ދައްކާށެވެ. ސޯޝަލް މީޑިޔާގައި ހަރަކާތްތެރިވާ މީހުން އޮބަހެއްޓުމަށެވެ. މުއިއްޒުއާ ދެކޮޅަށް ވާހަކަ ފެތުރުނަ ނުދޭށެވެ.

ވެރިކަމަށް އަންނަން ކުރި މަސައްކަތުގައި މުއިއްޒު ކޮވިޑްގެ އާލަމީ ވަބައިގެ ތެރޭގައިވެސް އެއްވާނެތާކަށް އެއްވިއަސް މަޖީދީ މަގުން ހިނގާލިޔަ ނުދެނީވެސް އެބިރުންނެވެ. މުއިއްޒުގެ އޮފު އިތުރަށް ކަނޑާލިޔަ ނުދިނުމަށެވެ. ސަރުކާރާ ދެކޮޅަށް ނުކުންނަ މީހުންގެ ބައިހެޔޮ ބޯކަން އެހެން މީހުންނަށް ފެނިދާނެތީއެވެ. އިތުރު މީހުން އޭގެ ތެރެއަށް ވަނަނުދިނުމަށް ދައްކާ ބިރެއްގެ ގޮތުގައެވެ. އިދިކޮޅު ޕާޓީތައް ސައިޒް ކުރުމުގެ ނިޔަތުގައެވެ.

ކޮންމެއަކަސް މުއިއްޒާ ދެކޮޅަށް ބަޔަކު ނުކުމެ ޝުއޫރު ފާޅުކޮށް އަޑު އުފުލަފާނެތީ އެގަންނަނީކީ އަމަށަކު ބިރެއް ނޫނެވެ. އެކަމަކު ބިރަކީ އެބިރުގައި އެހެން މީހުންނަށް ބިރު ދެއްކުމެވެ. މީހަކު މުޒާހަރާއަށް ނުކުމެއްޖެ ނަމަ ޖެހިގެން އަންނަ ދުވަހު އޮފީހަށް ނުކުތަ ނުދީ ވަކިކޮށްފާނެ ކަމުގެ ބިރެވެ. ޚިޔާލެއް ފާޅުކޮށް ޕޯސްޓެއް ކޮށްފިނަމަ އޭނާ ފުލުސް އޮފީހަށް ހާޒިރުކޮށްފާނެ ކަމުގެ ބިރެވެ. ކުރި ޕޯސްޓަކުން ކުއްލިއަކަށް މަގުމަތިން މީހުންގެ ފޯނު ޖަހައިގަނެފާނެ ކަމެވެ. އެފޯނުގައި ހުރި އަމިއްލަ ތަކެތި ސޯޝަލް މީޑިޔާއަށް ލީކުކޮށްލާނެ ކަމުގެ ބިރެވެ. ފެންނަމުން އެދަނީ އެމަންޒަރެވެ. އެކަމަކު ހަގީގަތަކީ އެއީ އަދި ދެއްކޭނެ ބިރެއް ނޫންކަމެވެ. ތާއަބަދު ބިރު ދައްކައި މީހުންނަށް މަޖްބޫރުކޮށް އުޅުނު މިއަށްވުރެ ބާރުގަދަ މީހުންވެސް ނިމިދިއުމެވެ. ބާރު ކެނޑި ރައްޔިތުންގެ ބާރު އިސްވުމެވެ. އޭގައި އޮންނަނީ މަތިން ގަޑި ޖެހުމެވެ. ވަގުތު ޖެހުމާއެކު ލަހެއް ފަހެއް ނުވެ އެކަން ވެގެން ދެއެވެ.