ޣައިރު ގާނޫނީ އަމުރުކޮށްގެން މިސަރުކާރުން ދަނީ ފުލުހުންނާ ސިފައިންނަށް މަލާމާތް ކުރަމުން: ފައްޔާޒް

މިހާރުގެ ސަރުކާރުން ހުދުމުހުތާރުކަން ދައްކައި، ސިފައިންނާއި ފުލުހުންގެ މައްޗަށް ޣައިރު ޤާނޫނީ އަމުރުކޮށްގެން، އެ ދެމުއައްސަސާއަށް މަލާމާތް ކުރަމުންދާ ކަމަށް އެމްޑީޕީގެ ޗެއަރޕާސަން ފައްޔާޒް އިސްމާއިލް ވިދާޅުވެއްޖެއެވެ.

ޕީއެންސީގެ މަޖިލިސް މެމްބަރު އިބްރާހިމް ޝުޖާއު ކުރެއްވި ޕޯސްޓަކަށް ރައްދު ދެއްވަމުން ފައްޔާޒް ވިދާޅުވީ، މި ސަރުކާރަށް ދެ އަހަރު ވެގެންދިޔައިރު ދެ މުއައްސަސާ ސިޔާސީކޮށް ހަލާކުކޮށްފައިވާ ކަމަށެވެ. އަދި ޕީޕީއެމް/ޕީއެންސީއަކީ ސަލާމަތީ ޚިދުމަތްތަކުގެ މައްޗަށް ޣައިރު ޤާނޫނީ އަމުރު ކުރުމާއި، އެ އަމުރުތައް ތަންފީޒުކުރުމަށް ވަޒީފާގެ ބިރުދައްކާ ޕާޓީތަކެއްކަމަށް ފާހަގަކުރެއްވިއެވެ.

ޕީޕީއެމް/ޕީއެންސީ ފިކުރަކީ ވެރިކަމަށް އަންނަ ކޮންމެ ދައުރަކު ސިފައިންގެ އާއި ފުލުހުންގެ މުއައްސަސާ ސިޔާސީކޮށް ދިވެހި ރައްޔިތުންގެ މައްޗަށް އަނިޔާވެރިވުމަށް މަޖުބޫރުކުރާ ފިކުރެއް ކަމަށާއި، ރައްޔިތުން އެ ދެ މުއައްސަސާއަށް ކުރާ އިތުބާރު ގެއްލުވާލަނީ އެޕާޓީ އިން ކަމަށް ފައްޔާޒް ވިދާޅުވިއެވެ.

އެމްޑީޕީގެ ޗެއަރޕާސަން އިތުރަށް ފާހަގަކުރެއްވި ގޮތުގައި، އެމްޑީޕީގެ ފަސް އަހަރުގެ ތެރޭގައި، ޕީޕީއެމް ސަރުކާރުން ގެއްލުވާލި އިތުބާރު ފުލުހުންނާއި ސިފައިންނަށް ހޯދައިދިނުމަށް ގިނަ މަސައްކަތްތަކެއް ކުރެވުނެވެ. އަދި ފުލުހުންނާއި ސިފައިންނަކީ ޕްރޮފެޝަނަލް، ޝަރަފުވެރި އަދި ގަދަރުވެރި ބަޔަކަށް ހެދުމަށް އެމްޑީޕީގެ ސަރުކާރުން ގެނައި ބަދަލުތަކަށް އެ ދެ މުއައްސަސާގެ ގިނަ ބަޔަކު ހެކިވާނެ ކަމަށްވެސް ވިދާޅުވިއެވެ.

ކޮވިޑްގެ އާލަމީ ވަބާގެ ދުވަސްވަރު، މިހާރުގެ ރައީސް މުއިއްޒު އިސްނަގައިގެން މާލޭ މަޖީދީ މަގުގައި ކުރި މުޒާހަރާތަކުގައި، ގާނޫނީ ވާޖިބު އަދާކުރަން ތިބި ފުލުހުންގެ ގަޔަށް މުޒާހަރާގެ ބައިވެރިން ކުޅުޖެހި މައްސަލައަށްވެސް ފައްޔާޒް އިޝާރާތްކުރެއްވިއެވެ. މި ހާދިސާއާ ގުޅިގެން އޭރުގެ ޕޮލިސް ކޮމިޝަނަރ ވިދާޅުވެފައިވަނީ މިފަދަ ނާތަހުޒީބު، ލާއިންސާނީ އަމަލެއް ހިންގާނީ ފުލުހުންނަށް އެއްވެސް ވަރެއްގެ ރަހުމެއް، ހަމްދަރުދީއެއް ނުވަތަ އިހްތިރާމެއް ނެތް ބައެއްކަމަށެވެ.

ފާއިތުވި ހުކުރު ދުވަހުގެރޭ ސަރުކާރުގެ ފަރާތުން ފުލުހުންނަށް ޣައިރު ގާނޫނީ އަމުރުކޮށް، މުޒާހަރާ ރޫޅާލުމަށް ހާލަތާ ނުބައްދަލު ބާރުގެ ބޭނުންކޮށް، އަނިޔާވެރިކޮށް އެތައް ބަޔަކު ވަނީ ހައްޔަރުކޮށްފައެވެ. ޚާއްޞަކޮށް، ދުނިޔޭގެ ގިނަ ގައުމުތަކުގައި ލީތަލް ހަތިޔާރެއްގެ ގޮތުގައި ކަނޑައަޅާފައިވާ ސޮނިކް ވެޕަން، ލޯންގް ރޭންޖް އެކޯސްޓިކް ޑިވައިސް (އެލްއާރުއޭޑީ) ރައީސް މުއިއްޒުގެ އަމުރަށް ފުލުހުން ރައްޔިތުންނާ ދެކޮޅަށް ބޭނުންކޮށްފައިވެއެވެ. މި ހަތިޔާރަކީ އިޒްރޭލުން ފަލަސްތީނުގެ ރައްޔިތުންނަށް އަނިޔާވެރިވުމަށް ބޭނުންކުރާ، މަތީ ފްރިކުއެންސީގެ އަޑު ފޮނުވާ ހަތިޔާރެކެވެ.