މިނިސްޓަރު ކަމުގެ ފަހު ދެ އަހަރު މުއިއްޒުގެ އެކައުންޓަށް ނަގުދު ފައިސާގެ ގޮތުގައި ފަސް މިލިއަނަށްވުރެ ގިނަ ރުފިޔާ ޖަމާކުރިކަން ހާމަވެއްޖެ

ރައީސް މުހައްމަދު މުއިއްޒު ހައުސިން މިނިސްޓަރުކަމުގައި ހޭދަކުރެއްވި ފަހު 30 މަސް ދުވަހުގެ ތެރޭގައި އެމަނިކުފާނުގެ އެކައުންޓަށް ނަގުދު ފައިސާގެ ގޮތުގައި ފަސް މިލިއަނަށް ވުރެ ގިނަ ރުފިޔާ ޖަމާކުރިކަން ހާމަވެއްޖެ އެވެ.

2012 ވަނަ އަހަރު އެމްޑީޕީގެ ފުރަތަމަ ސަރުކާރު ވައްޓާލުމަށްފަހު އުފެދުނު ސަރުކާރާއި، 2013 ވަނަ އަހަރު ބޭއްވުނު ރިޔާސީ އިންތިޚާބު ކާމިޔާބުކުރި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ސަރުކާރުގައި މުއިއްޒު ހުންނެވީ ހައުސިން މިނިސްޓަރުގެ މަގާމުގައެވެ.

Advertisement

ސަރުކާރުގެ ވަޒީރަކަށް މުސާރައާއި އިނާޔަތްތަކުގެ ގޮތުގައި މަހަކު ލިބެނީ 66,000 ރުފިޔާއެވެ. މި ފައިސާ މުއިއްޒުގެ އެކައުންޓަށް ޖަމާކުރީ ފިނޭންސް މިނިސްޓްރީންނެވެ. އަދި ސަރުކާރުގެ އެއްވެސް މުވައްޒަފަކަށް ނަގުދު ފައިސާއިން މުސާރަ ދީފައެއް ނުވެއެވެ.

އެހެން ނަމަވެސް، ރާއްޖޭގެ އޮންލައިން ނޫހެއް ކަމަށް ވާ އަދަދު ނޫހަށް ލިބިފައިވާ ލިޔެކިޔުންތަކުން ދައްކާ ގޮތުގައި 2016 ވަނަ އަހަރުގެ މާރޗް މަހުން ފެށިގެން 2018 ވަނަ އަހަރުގެ ސެޕްޓެންބަރު މަހުގެ ނިޔަލަށް މުއިއްޒުގެ އެކައުންޓަށް ޑޮލަރާއި ދިވެހި ރުފިޔާ ހިމެނޭ ގޮތަށް ފަސް މިލިއަނަށްވުރެ ގިނަ ފައިސާ ވަނީ ޖަމާކޮށްފައެވެ.

މި މުއްދަތުގެ ތެރޭގައި ބޭންކް އޮފް މޯލްޑިވްސްގައި ހުޅުވާފައި ހުރި މުއިއްޒުގެ ރުފިޔާ އަދި ޑޮލަރު އެކައުންޓުތަކަށް 85 ފަހަރު ނަގުދު ފައިސާ ޖަމާކޮށްފައިވެއެވެ. މިއީ 5,254,252 ރުފިޔާއާއި 15,600 ޑޮލަރެވެ. ބޭންކު ރޭޓުން ޑޮލަރު މާރުކޮށްފިނަމަ ޖުމްލަ ފައިސާގެ އަދަދު 5,494,804 ރުފިޔާއަށް އަރައެވެ.

މިދިޔަ އަހަރު ކުރީކޮޅު އާންމުވި އެމްއެމްއޭގެ ފައިނޭންޝަލް އިންޓެލިޖެންސް ރިޕޯޓެއްގައި ވެސް މި ފައިސާތަކުގެ ވާހަކަ ފާހަގަކޮށްފައިވެއެވެ. އޭރު ހާމަވެފައިވަނީ 2015 އިން ފެށިގެން މުއިއްޒުގެ އެކައުންޓަށް ޖަމާވި ފައިސާގެ އަދަދުތަކާއި ބޭންކުތަކަށް އޮޅުވާލަން އެމަނިކުފާނު ކުރެއްވި ބައެއް ކަންކަމެވެ.

ނަގުދު ފައިސާގެ އިތުރުން، މުއިއްޒުގެ މިނިސްޓަރުކަމުގައި ރާއްޖޭގައި ބޮޑެތި މަޝްރޫޢުތަކެއް ހަވާލުކުރެވުނު ބޭރުގެ ކުންފުނިތަކުން އެމަނިކުފާނުގެ އަމިއްލަ އެކައުންޓަށް ގިނަ އަދަދެއްގެ ޑޮލަރު ޖަމާކޮށްފައިވެއެވެ.

މީގެ ތެރޭގައި ވިންރަން އިންޓަނޭޝަނަލް ނަމަކަށް ކިޔާ ކުންފުންޏަކުން ތިން ފަހަރެއްގެ މަތިން ޖަމާކުރި 24,348.77 ޑޮލަރާއި، ސިނަމާލެ ބްރިޖާއި ގުޅިގެން ހައިވޭ ތަރައްގީކުރި ހުނާން ކޮންސްޓްރަކްޝަނުން ހަތަރު ފަހަރެއްގެ މަތިން ޖަމާކުރި 70,499 ޑޮލަރު ހިމެނެއެވެ.

މުއިއްޒުގެ އެކައުންޓަށް ޑޮލަރު ވަނުމުގެ ކުރިން 2017 ވަނަ އަހަރުގެ އޮކްޓޫބަރު މަހުގެ 15 ގައި ދައުލަތުގެ ބަޖެޓުން ފިނޭންސް މިނިސްޓްރީން ވަނީ ހުނާން ކޮންސްޓްރަކްޝަނަށް 105,950 ޑޮލަރު (1,633,749 ރުފިޔާ) ޖަމާކޮށްފަ އެވެ. މިއީ މުއިއްޒުގެ މިނިސްޓަރު ކަމުގައި އެ ކުންފުންޏަށް ދިން މަޝްރޫއެއްގެ ފައިސާ އެވެ.

މި މުޢާމަލާތްތަކާ ގުޅޭގޮތުން އަދަދު ނޫޙުން ކުރި ސުވާލުގެ ޖަވާބުގައި މުއިއްޒު ވިދާޅުވީ އެއީ އެމަނިކުފާނުގެ އަމިއްލަ ރޯހައުސްއެއް އެ ކުންފުނިތަކަށް ކުއްޔަށް ދިނުމުން ދައްކާފައިވާ ފައިސާ ކަމަށެވެ. ނަމަވެސް އެއް މުއްދަތެއްގައި ތިން ކުންފުންޏަކަށް އެއް ތަނެއް ކުއްޔަށް ދެވުނު ގޮތް މިހާތަނަށް ސާފުކޮށްދެއްވާފައެއް ނުވެއެވެ.

މި މައްސަލައާ ގުޅިގެން އިދިކޮޅު އެމްޑީޕީ އަދި ޕީއެންއެފް އިން ވަނީ މި މައްސަލަ ތަހުގީގު ކުރުމަށް ތަހުގީގީ އިދާރާތަކަށް ގޮވާލާފައެވެ. ނަމަވެސް މިހާތަނަށް ތަހުގީގީ އެއްވެސް އިދާރާއަކުން މި މައްސަލައާ ގުޅޭގޮތުން މިހާތަނަށް އެއވެސް ބަހެއް ބުނެފައެއް ނުވެއެވެ.