ހުރިހާ މޮޅެއް އިދިކޮޅޭމެނަށް، ގޮތެއް ނެތީ ޕާޓީ ކުދިންނަށް

މަގުމަތިން ދިމާވި މީހެކެވެ. ދަންނަ ރައްޓެއްސެއް ނޫނެވެ. އެކަމަކު ފެންނަފެނުމަށް އެއީ ނިމިދިޔަ ރިޔާސީ އިންތިޚާބުގައާއި މަޖިލިސް އިންތިޚާބުގެ ކެމްޕޭނުގައި ޕީޕީއެމް ޕީއެންސީ ހަރަކާތްތަކުން ފެންނަ މީހެކެވެ.

ގޮވާލާފައި ފުރަތަމަވެސް އޭނާ ބުނީ ހުރިހާ މޮޅެއް އެހެން މީހުންނަށް ކަމަށެވެ. ހޯދަދިން ބަޔަކަށް، އަމުދުން ރައްޔިތަކަށްވީ ފައިދާއެއް ނެތް ކަމަށެވެ. ކައިރިއަށް ލެފިލާ ކިހިނެއް ވީތޯއޭ އަހާލީމެވެ. ދެންވެސް ބުނީ އަޑުގަދަ ކުރިވަރެއް ރަނގަޅުވާނެ ކަމަށެވެ. އޭރުން ގެންދާވަރު ބޮޑުވާނެޔޭވެސް ބުންޏެވެ.

ތި ކިޔަނީ ކޯއްޗެއް ހެއްޔޭ އަނެއްކާވެސް އެހީމެވެ. ދެންވެސް ބުނީ ކުރިއަށް އޮތީވެސް އެގޮތް ކަމަށެވެ.

ތިންވަނަ ފަހަރަށް އެހީމާ ދިން ޖަވާބުން ވެގެން އުޅޭގޮތް ސާފުވިއެވެ. އެކިޔަނީ ކީކޭކަން ފަހުމް ވިއެވެ. އެކަމަކު އެވާހަކަ ބުނެ ނިންމާލަމުން ރައީސް މުއިއްޒަށް މުޚާތަބުކޮށް އެބުނި އެއްޗަކުން ސީދާ އެވާހަކަ ސީދާ ބުނިގޮތައް ބުނާކަށް މަށަކަށްވާ ލާހިކު ކުޅަދާނައެއް ނޫނެވެ.

ހިތާހިތާ ކިޔާލެވުނެވެ. އޭނާ އެބުނީ ވަރަށްބޮޑު ތެދެކެވެ. ފެންނަ ފެނުމަށް އެއީ ސީދާ ހަގީ ގަތެކެވެ. އަދި މަންޒަރުތައް ހުރިގޮތުން އެކަން ދާނީވެސް ކުރިއަށެވެ.

އޭނާ ބުނީ ދެއިރު ދެޅައަށް އިންޑިޔާ އައުޓް ޖައްސާފައި ރެޔާ ދުވާލު ގޭގެއަށް ހިނގާފައި މުއިއްޒު ވެރިކަމަށް ގެންނާން އުޅުނީ ޕީޕީއެމް ޕީއެންސީ މީހުންނެވެ. ދެއްކި ހުސް ގޮނޑިއާ ރައީސް ޔާމީން ސަލާމަތް ކުރެވޭންވެސް އޮތީ އެގޮތައް އެކަން ކޮށްގެންކަމަށް ވިސްނައިދިނީތީ މުއިއްޒު ހޮވަން ކުރެވުނިއްޔާ ކުރެވުނުހާ ކަމެއް ކުރެވުނު ކަމަށެވެ. އޭނާ ބުނީ އެކަން ކުރީ ގައުމަށް ހެޔޮގޮތެއް ހޯދުމުގެ ބޭނުމުގައިވެސް ކަމަށާއި އިހުއޮތް ސަރުކާރަށްވުރެ ރަނގަޅުވާނެ ކަމުގެ އުއްމީދުގައި ކަމަށެވެ.

އެކަމަކު އޭނާ ބުނީ ކަންކަން މިދަނީ އިހުނަށްވުރެ ގޯސްކޮށް ކަމަށާއި ތަކެތީގެ އަގުބޮޑުވެ އަނގަޔާ އަތާ ދިމާ ނުވާ ހިސާބަށް ދަނީ ކަމަށެވެ. ބޭސް ނުލިބި ގޮތްހުސްވަމުންދާއިރު ދެއިރު ދެދަޅައަށް ކާ ބޭހެއްހެން ވެރިމީހާ މަޖާކުރުމަށް އަބަދު ފުރަފުރައިގެން ރާއްޖެއިން ބޭރުގައި ކަމަށެވެ. އަދުނޫން މާދަން ރަނގަޅުވާނެ ކަމުގެ އުއްމީދު ދީގެން ޕާޓީކުދިންކޮޅު ތިބީ ގުނބޯ ހައްދާފައި ކަމަށާއި ބަހެއް ބުނާންތިބި މަޖިލީސް މެންބަރުންނަށް ލޯނުތައް ދީފައި އަނގަތައް ބަންދުކުރުވާފައި ކަމަށެވެ. ރައްޔިތުންނަށް ކޮށްދޭން ބުނި ހެޔޮވެރިކަމުގެ ބަދަލުގައި ފެންނަމުންދަނީ ދެމަފިރިންގެ ނާޗަރަނގީ އަދި ޗާލާކީ ވެރިކަމެކޭވެސް އޭނާ ބުންޏެވެ.

ކުޑައިކޮށް އިތުރަށް ކޮނެލުމުގެ ބޭނުމުގައި އަނެއްކާވެސް ސުވާލު ކޮށްލީމެވެ. ތިޔަ ބުނަނީ ކޮންބައެއްގެ ވާހަކަ ހެއްޔެވެ. އޭނާ ބުނީ އިންތިޚާބު ތެރޭގައި އެންމެ ގަދައަށް ހަޅޭލެވި އެކަކު އެހެރީ ގެނެސް އެންމެ އެޑްވައިޒަރަށް ލައިފައެވެ. ގެއެޅި ގޮތާއި ފައިސާ ހޯދި ގޮތޭ ކިޔައިގެން ވާހަކަ ދެއްކި މީހާވެސް މިހާރު އެހެރީ އެންމެ ގާތުގައެވެ. ޓެކްސްތައް މައާފް ކޮށްދިނުމާއި އެތަނުން ފަޅެއް މިތަނުން ފަޅެއް ދީފައި އެމީހުން ގެނެސް ބައިތިއްބަން މުއިއްޒަށް އޯކޭ ކަމަށެވެ. ކަމުނުދުޔައީ ޔާމީން މިނިވަން ކުރުން ކަމަށާއި ޔާމީން ގާތުގައި ހުރެގެން ބަވަބަވާފައި ލާރި ދިނީމާ ބޮޑުފަޅިއަށް އެރުން މުއިއްޒަށް ބަރާބަރު ކަމަށެވެ.

އޭނާ ބުނީ ސަރުކާރުން ބޮޑެތި މަގާމް ދީފައި ގަނެގެން ގެންނަނީ މުޅިންވެސް އިދިކޮޅު މީހުން ކަމަށާއި ނިމިދިޔަ ސަރުކާރުގައި ވަޒީރުކަމާއި މަޖިލިސް މެންބަރުންނާ އޭރުގެ މަތިފަޑީގައިތިބި މީހުންވެސް މިހާރު މުއިއްޒަށް މާ ކަމުދާ ކަމަށެވެ. ރަށްރަށުގައިވެސް ވަޒީފާ ދެނީ ބާރަށް ހަޅޭލަވާ އިދިކޮޅު ޕާޓީތަކުގެ މީހުންނަށް ކަމަށާއި ޕީޕީއެމް ޕީއެންސީ ކުދިން ގޮތެއް ނެތިފައި ޕާޓީއާ އަހަރެމެންގެ ވެރިކަމޭ ބުނެ ގޮތެއް ނެތިފައި ތިބެންވީ ކަމަށެވެ.

ނިންމާލަމުންވެސް އޭނާ އެހެން ވާހަކައެއްވެސް ބުންޏެވެ. އިންޑިޔާ އައުޓޭ އެއްބަސްވުމޭ، ގައުމީ ސަލާމަތޭ ކިޔައިގެން އަހަރެމެން ލައްވައި ލައްކަ ހަޅޭ ލެއްވުވި ކަމަށާއި އެހުރިހާ ކަމެއް މިހާރު ބަރާބަރުވެ ފައިކޭޓު ދައްކާލީމަ މޯދީ އުނގަށްވެސް އެރި ހަމަޖެހިލީ ކަމަށެވެ.

ކޮންމެއަކަސް ނިންމާލަމުން އެބުނި އެއްޗެއް ބުނެފައި ފަހުބަހަކަށް އޭނާ ބުނީ މިހާރު މިވެރިކަން ގެނެވުނީތީ މޮޔަހީވާ ކަމަށާއި މަހްލޫފް ނޫނަކަސް ހަމަހޭގައި މަށާ މަގޭ އާއިލާމީހެއްގެ ވޯޓު މިމުއިއްޒަށް ހަތް ހަރާމުން ހަރާމް ކަމަށެވެ. މަށަށް ވެގެން ދަންޏާ މަގޭ އެކުވެރިއަކުވެސް މަގޭ ގާތްތިމާގެ ވަންހަކޮޅު މީހަކަސް ދެން މިމީހުންގެ އަވައިގާ ޖެހުނަކަ ނުދޭނެ ކަމަށެވެ. މަވާ ސަލާމެވެ.