ޔުއެފާ ޗެމްޕިއަންސް ލީގުގެ ދެވަނަ ބުރުގެ ދެވަނަ ލެގުގައިވެސް ބާސެލޯނާއާ ދެކޮޅަށް ބްރެޒިލުގެ ތަރި ނޭމާއަށް ނުކުޅެވޭނެ ކަމަށް ޕީއެސްޖީން ބުނެފިއެވެ.

ނޭމާއަށް އަނިޔާވީ މިދިޔަ ފެބްރުއަރީ މަހު ފްރެންޗް ކަޕުގައި ޕީއެސްޖީ ކުޅުނު މެޗެއްގެ ތެރެއިންނެވެ. އެގޮތުން ރަށުން ބޭރުގައި ކޯން އަތުން 1-0 ގެ ނަތީޖާއަކުން ޕީއެސްޖީ މޮޅުވި މެޗުގެ 60 ވަނަ މިނެޓުގައި ލިބުނު އަނިޔާއަކާ ގުޅިގެން ނޭމާ ވަނީ ބަދަލުކޮށްފައެވެ. އެ އަނިޔާއާ ގުޅިގެން ބާސާގެ ދަނޑުގައި 4-1 ގެ ނަތީޖާއަކުން ޕީއެސްޖީ މޮޅުވި ފުރަތަމަ ލެގުގައިވެސް ނޭމާއަށް ކުޅުމުގެ ފުރުސަތެއް ނުލިބުނެވެ.

ދާދި ފަހުން ޕީއެސްޖީން ނެރުނު ބަޔާނެއްގައި ބުނީ އަނިޔާއިން ރަނގަޅުވެ ނޭމާ އަމިއްލަ ފަރިތަކުރުންތަކަށް ނުކުތް ނަމަވެސް، އޭނާ އަދި އެއްކޮށް ފިޓްނުވާ ކަމަށެވެ. އެހެންކަމުން ދެވަނަ ލެގުގައި އަމިއްލަ ދަނޑުގައި ބާސާއާ ދެކޮޅަށް ޕީއެސްޖީ ކުޅޭ މެޗުގައިވެސް ނޭމާ ނުފެންނާނެ ކަމަށް އެ ބަޔާނުގައި ވަނީ ބުނެފައެވެ.

އަނިޔާގެ ސަބަބުން ބާސާއާ ދެކޮޅަށް ކުޅުމުގެ ފުރުސަތު ނޭމާއަށް ގެއްލުނުއިރު، މި ފަހަރުގެ މެޗުތަކަކީ 2017 ވަނަ އަހަރު ދުނިޔޭގެ ރިކޯޑު އަގެއް ކަމަށްވާ 222 މިލިޔަން ޔޫރޯއަށް ބާސާ ދޫކޮށް ޕީއެސްޖީއަށް ބަދަލުވުމަށްފަހު، ބާސާއާ ދެކޮޅަށް ނޭމާއަށް ކުޅެން ލިބުނު ފުރަތަމަ މެޗުތަކެވެ.

ދެވަނަ ބުރުގެ ދެވަނަ ލެގުގައި ބުދަ ދުވަހުގެރޭ ޕީއެސްޖީ އާއި ބާސާ ބައްދަލުކުރާއިރު، ބާސާއަށްވެސް ވަނީ އަނިޔާގެ މައްސަލަތަކެއް ކުރިމަތިވެފައެވެ. އެގޮތުން އެ ޓީމުގެ ދެ ޑިފެންޑަރުން ކަމަށްވާ ޖެރާޑް ޕީކޭ އާއި ރޮނާލްޑް އަރައުހޯއަށް އަނިޔާގެ ސަބަބުން މި މެޗުގައި ނުކުޅެވޭނެއެވެ.

ފުރަތަމަ ލެގުން 4-1 ގެ ނަތީޖާއަކުން ޕީއެސްޖީން ބާސާ ބަލިކޮށްފައިވާއިރު، ކުއާޓާ ފައިނަލަށް ދަތުރުކުރުމުގެ ފުރުސަތު ބޮޑީ ޕީއެސްޖީއެވެ. އަދި ދެވަނަ ލެގު ޕީއެސްޖީގެ ދަނޑުގައި ކުޅޭއިރު، މި މެޗު ފެށުމަށް ތާވަލުކޮށްފައިވަނީ ބުދަ ދުވަހުގެރޭ ރާއްޖެ ގަޑިން ދަންވަރު 01:00 ގައެވެ.