ލ.އަތޮޅުގެ ޗެމްޕިއަންކަން މާބައިދޫއަށް

އެސްޓީއޯ މިނިވަން ޗެމްޕިއަންޝިޕް ފުޓުބޯޅަ މުބާރާތިގެ ލ.އަތޮޅުގެ ޗެމްޕިއަންކަން މާބައިދޫއިން ހޯދައިފިއެވެ.

މާބައިދޫއިން އަތޮޅު ޗެމްޕިއަންކަން ހޯދީ ލ.ކުނަހަންދޫގެ މައްޗަށް ޕެނަލްޓީގައި ކުރިހޯދައިގެންނެވެ. ޕެނަލްޓީގައި އެޓީމު ކުރިހޯދާފައިވަނީ 4-2 ގެ ނަތީޖާއަކުންނެވެ.

އަންގާރަ ދުވަހު ކުޅުނު ފައިނަލް މެޗުގައި ދެޓީމުގެ ފަރާތުންވެސް ވާދަވެރި ކުޅުމެއް ފެނިގެން ދިޔައިރު މެޗުގައި ދެޓީމަށްވެސް ވަނީ ލަނޑު ޖަހާނެ ގިނަ ފުރުސަރުތަކެއް ލިބި ބޭކާރުވެފައެވެ. ދެޓީމުންކުރެ އެއްވެސް ޓީމަކަށް ލަނޑެއް ނުޖެހި އެއްވަރުވެގެން މެޗުގެ ފުރިހަމަ ވަގުތު ހަމަވުމުން ދެން ކުޅުނީ އިތުރު ވަގުތުގެ ދެހާފެވެ. ނަމަވަސް އިތުރު ވަގުތުގެ 2 ހާފުވެސް ނިމުނީ 0-0 އިން އެއްވަރު ވެގެންނެވެ. މާބައިދޫއިން ކުނަހަންދޫގެ މައްޗަށް ކުރިހޯދީ ނަތީޖާ ނެރުމަށްޓަކާ ޖެހި ޕެނަލްޓީގައެވެ.

ޕެނަލްޓީގައި މާބައިދޫގެ 4 ޕެނަލްޓީ ކާމިޔާބުކޮށްދީފައި ވަނީ އަހުމަދު ޝަރީފް އާއި، އަބްދުﷲ ފަރީޝް އާއި، މުހަންމަދު ވަހީދުގެ އިތުރުން، އިބްރާހިމް ފަސީހް އެވެ.

ކުނަހަންދޫއަށް ޕެނަލްޓީ ޝޫޓްއައުޓްގައި ކާމިޔާބު ކުރެވުނީ އެންމެ 2 ޕެނަލްޓީއެވެ. މި 2 ޕެނަލްޓީ އެޓީމަށް ކާމިޔާބުކޮށްދިނީ ހުސައިން ޒަކީ އާއި، މުހަންމަދު އަޒްމޫން އެވެ.

މާބައިދޫއިން ލ.އަތޮޅުގެ ޗެމްޕިއަންކަން ހޯދުމާއެކު އެޓީމުން ދެން ކުޅެން ޖެހޭނީ މުބާރާތުގެ ޒޯން ބުރުގައެވެ.

މުބާރާތުގެ ޒޯން ބުރުގެ ޗެމްޕިއަންކަން ހޯދާ ޓީމުތަކުގެ މެދުގައި ކުޅޭ ބުރުން އެންމެ ގަދަ 4 ޓީމު ދިވެހި ލީގަށް ކޮލިފައި ވާނެއެވެ.