ފުޓްބޯލް ފިއެސްޓާ 2017: ގްރޭޑް 2 ގެ ޗެމްޕިއަންކަން ކަލާފާނަށް، ގްރޭޑް 3 ބިލަބޮންގަށް

ސޮކާ ވެޓަރެންސާއި މައިލޯ ގުޅިގެން ކުރިއަށްގެންދާ މައިލޯ ކިޑްސް ފުޓްބޯލް ފިއެސްޓާ ކާމިޔާބުކަމާއެކު ނިންމާލައިފި އެވެ. ހޮނިހިރު ދުވަހު ހަވީރު ހެންވޭރު ދަނޑުގައި ކުރިޔަށް ދިޔަ ފިއެސްޓާގެ ގްރޭޑް 2 ގެ ބައިން ޗެމްޕިއަންކަން ކަލާފާން ސްކޫލުން ހޯދިއިރު، ގްރޭޑް 3 ގެ ބައިން ޗެމްޕިއަންކަން ހޯދީ ބިލަބޮންގް ހައި އިންޓަރނޭޝަނަލެވެ.

ފިއެސްޓާގެ ގްރޭޑް 2 ގެ ޗެމްޕިއަން ޓީމަށް ތައްޓާއި މެޑެލް ޙަވާލުކޮށްދެއްވީ ކުޅިވަރަށް ގިނަ ހިދުމަތްތަކެއް ކުރައްވަމުން އަންނަ އިބްރާހިމް އިސްމާއިލް އެވެ. ގްރޭޑް 3 ގެ ޗެމްޕިއަން ޓީމަށް ތައްޓާއި މެޑެލް ޙަވާލުކޮށްދެއްވީ ފިޝަރީޒް މިނިސްޓަރ ޑރ. މުހައްމަދު ޝައިނީ އެވެ. މިދިޔަ ބުދަ ދުވަހުން ފެށިގެން ހޮނިހިރު ދުވަހުގެ ނިޔަލަށް ހެންވޭރު ދަނޑުގައި ކުރިއަށް ގެންދިޔަ މި ފިއެސްޓާގައި 17 ސްކޫލަކުން 33 ޓީމު ބައިވެރިއިރު، ހުރިހާ ސްކޫލަކުން 594 ކުޅުންތެރިންވަނީ ބައިވެރިވެއެވެ.

ކުޑަކުދިންގެ ހިތުގައި ފުޓްބޯޅައިގެ ލޯބި ޖައްސާ، ފުޓްބޯޅައިގެ ފޯރި އެކުދިންގެ ކިބައިގައި އާލާކޮށް ދިރުވާ، އެއްމާހައުލެއްގައި ގިނަ ކުދިންނަށް ފުޓްބޯޅަ ކުޅުމުގެ ފުރުޞަތު ހޯދައިދިނުމުގެ މަޤުޞަދުގައި ބާއްވާ މި ފިއެސްޓާގައި މިއަހަރު ބައިވެރިވެފައިވަނީ 17 ސްކޫލަކުންނެވެ. ސޮކަ ވެޓަރެންސުން އަންނަނީ ކުޑަ ކުދިންނަށް ފުޓުބޯޅަ ދަސްކޮށްދިނުމަށާއި ކުޑަ ކުދިން ފުޓުބޯޅަ އަށް އަހުލުވެރި ކުރުމުގެ ގޮތުން ގިނަ ފެސްޓިވަލްތަކެއް މުޅި ރާއްޖެއަށް އަމާޒުކޮށްގެން ހިންގަމުންނެވެ.

މާލޭގެ ސްކޫލްތަކަށާއި އަތޮޅު ތެރޭގެ ސްކޫލްތަކަށް އަމާޒުކޮށްގެން ހިންގަމުން އަންނަ މި ފެސްޓިވަލްތަށް މިހާރު ވަނީ އައްޑޫ ސިޓީ އާއި ފުވައްމުލައް ސިޓީ އަށް ވެސް ފުޅާ ކުރެވިފަ އެވެ. މީގެ އިތުރުން މިއަހަރު އިތުރު އަތޮޅުތަކަށް މި ފެސްޓިވަލް ފުޅާ ކުރެވިގެންދާނެ ކަމަށްވެސް ސޮކަ ވެޓަރެންސުން މައުލޫމާތުދެ އެވެ. އެގޮތުން މިއަހަރު ނ. އަތޮޅަށާއި ގދ. އަތޮޅަށް ވެސް މިއަހަރު ފެސްޓިވަލް ގެންދާނެ ކަމަށް އެފަރާތުން ބުންޏެވެ.

މިދިޔަ އަހަރު މާލޭގައި ބޭއްވި ގްރޭޑް ދޭއް އަދި ތިނެއްގެ ޗެމްޕިއަންކަން ހޯދާފައި ވަނީ އިސްކަންދަރު ސްކޫލާއި ތާޖުއްދީން ސްކޫލެވެ.