ޅ.އަތޮޅުގެ ޗެމްޕިއަންކަން އޮޅުވެލިފުއްޓަށް

މިނިވަން ޗެމްޕިއަންޝިޕް ފުޓުބޯޅަ މުބާރާތުގެ ޅ.އަތޮޅުގެ ޗެމްޕިއަންކަން އޮޅުވެލިފުށިން ހޯދައިފި އެވެ.

ޖުމްލަ ތިން ތީމު ވާދަކުރި މި ބުރުގެ ޗެމްޕިއަންކަން އޮޅުވެލިފުށިން ހޯދީ ކުރެންދޫއާ ވާދަކޮށް 0-2 އިން މެޗު ކާމިޔާބުކޮށްގެންނެވެ.

އޮޅުވެލިފުށީގެ އަމިއްލަ ދަނޑުގައި ކުޅުނު މި މެޗުގައި ދެޓީމުގެ ފަރާތުން ވެސް ވާދަވެރި ކުޅުމެއް ފެނިގެންދިޔައިރު، ފުރަތަމަ ހާފުގައި ދެޓީމަށް ވެސް ލަނޑުޖަހާނެ ރަނގަޅު ފުރުސަތުތަކެއް ލިބި ބޭނުންކުރެވޭ ގޮތް ނުވެފަ އެވެ.

މެޗުގެ ފުރަތަމަ ހާފު ލަނޑެއް ނުޖެހި އެއް ވަރެއްގައި އޮވެ ނިމުނު އިރު، ދެވަނަ ހާފު ފެށިގެން އޮޅުވެލިފުށިން ދިޔައީ ކުރެންދޫގެ ހާފަށް ބާރުބޮޑު ކުރަމުންނެވެ. އެގޮތުން އެޓީމުން ވަނީ 69 ވަނަ މިނެޓުގައި ލަނޑެއް ކާމިޔާބުކޮށް ލީޑު ނަގާފަ އެވެ. މި ލަނޑު އެޓީމަށް ކާމިޔާބުކޮށްދިނީ އަހުމަދު ނިޒާމް އެވެ.

އޮޅުވެލިފުށިން ކާމިޔާބުކުރި ދެވަނަ ލަނޑު 79 ވަނަ މިނެޓުގައި ކާމިޔާބުކޮށްދިނީ އިޔާޒް އިލްޔާޒް އެވެ.

މެޗުގެ މޮޅު ކުޅުންތެރިޔާ އަށް ހޮވުނީ އޮޅުވެލިފުށީގެ އަހުމަދު ރަޝީދެވެ.