އުރީދޫ އޭކޭއައި-އެލްއެފް ޔޫތު ޗެމްޕިއަންޝިޕުގެ ގުރު ނަގައިފި

ތ. ވިލުފުށީ ރައިސިން ސްޓާސް ސްޕޯޓްސް އެކެޑަމީގެ ފަރާތުން އިންތިޒާމުކޮށްގެން ބާއްވާ "އުރީދޫ އޭކޭއައި-އެލްއެފް ޔޫތު ޗެމްޕިއަންޝިޕް 2021" ގެ ގުރު ނަގައިފިއެވެ.

ރައިސިން ސްޓާސް ސްޕޯޓްސް އެކެޑަމީއަކީ ރައިސިން ސްޓާސް ފޯ ވިލުފުށީ ރެކްރިއޭޝަން ކުލަބުން ހިންގަމުން އަންނަ އެކެޑަމީއެކެވެ. އެކެޑަމީގެ ފަރާތުން މުޅިން އަލަށް ބާއްވާ އުރީދޫ އޭކޭއައި-އެލްއެފް ޔޫތު ޗެމްޕިއަންޝިޕް ޚާއްސަ ކުރެވިފައިވަނީ ވިލުފުށީގެ 21 އަހަރުން ދަށުގެ ޒުވާނުންނާއި، އެ ޖަމުޢިއްޔާގެ ފަރާތުން ދަޢުވަތުދެވޭ އެހެން ރަށްރަށުގެ ޒުވާނުންނަށެވެ.

މި މުބާރާތުގައި ތ. އަތޮޅުގެ ހަތަރު ރަށަކުން ވަނީ ބައިވެރިވެފައެވެ. އެއީ ވިލުފުށީގެ އިތުރުން ދިޔަމިގިއްޔާއި ހިރިލަންދޫ އަދި ގުރައިދޫއެވެ. މުބާރާތުގެ ގުރުލުން ހޯމަ ދުވަހުގެ ރޭ ބޭއްވިއިރު، މުބާރާތް ފެށުމަށް ތާވަލުކޮށްފައިވަނީ އަންނަ ހުކުރު ދުވަހުއެވެ. ހަތަރު ޓީމުގެ މެދުގައި ލީގު އުސޫލުން ކުޅެ، ލީގު ބުރުގެ އެއްވަނައަށްދާ ޓީމަކަށް ފައިނަލުގެ ސީދާ ޖާގައެއް ލިބޭއިރު، ފައިނަލުގެ ފަހު ޖާގަ ލިބޭނީ ދެވަނައަށް ދާ ޓީމާއި ތިންވަނައަށް ދާ ޓީމުގެ މެދުގައި ކުޅޭ ސެމީ ފައިނަލް މެޗުން މޮޅުވާ ޓީމަކަށެވެ.

ދާދި ފަހުން ގާއިމުކުރި ވިލުފިށީ ޓާފް ފުޓްބޯޅަ ދަނޑުގައި މި މުބާރާތް ކުރިއަށްދާއިރު، މުބާރާތުގެ ފައިނަލް މެޗު ކުޅުމަށް ނިންމާފައިވަނީ މި މަހުގެ 12 ވަނަ ދުވަހުއެވެ.

ރައިސިން ސްޓާސް ސްޕޯޓްސް އެކެޑަމީން މުޅިން އަލަށް ޒުވާނުންނަށް ބޮޑު ފުޓްބޯޅަ މުބާރާތެއް ބާއްވާއިރު، މި މުބާރާތް ބޭއްވުމުގެ މަގުސަދަކީ ތ. އަތޮޅާއި، އަދި ޚާއްސަކޮށް ވިލުފުށީގައި ފުޓްބޯޅަ ކުޅުމަށް ޝައުގުވެރިވާ އަދި ފުރުސަތު ނުލިބި ތިބި ޒުވާނުންނަށް އެ ފުރުސަތު ހޯދައިދިނުން ކަމަށް އެކެޑަމީން މައުލޫމާތުދެއެވެ. ވިލުފުށީގެ ގިނަ ރައްޔިތުންތަކެއް އެއް ތަނަކުން ބައްދަލުވެ، އެކުވެރިކަމާއި އަޚުވަންތަކަމުގެ ގުޅުން ބަދަހުކުރުމާއި، ރައްޔިތުންގެ މެދުގައި އިޖުތިމާޢީ ރޫޙު އާލާކޮށް، ރަށުގެ ތަރައްގީއަށްޓަކައި އެންމެން ގުޅިގެން މަސައްކަތް ކުރުމަށް ބާރު އެޅުމަކީވެސް އެއް މަގުސަދު ކަމަށް ރައިސިން ސްޓާސް ސްޕޯޓްސް އެކެޑަމީން މައުލޫމާތުދެއެވެ.

މި އަހަރުގެ މުބާރާތުގެ މެއިން ސްޕޮންސަރަކަށް އުރީދޫ މޯލްޑިވްސް ހަމަޖައްސާފައިވާއިރު، މީޑިއާ ޕާޓްނަރަކީ ރާއްޖެޓީވީ ސްޕޯޓްސްއެވެ. އަދި މުބާރާތުގެ ޕްރިންޓިން ޕާޓްނަރަކަށް އިންކްޑް މޯލްޑިވްސް ހަމަޖައްސާފައިވާއިރު، އޮފިޝަލް ޖާޒީ ޕާޓްނަރަކީ ދަ ޑަބްލިއު ސްޕޯޓްސްއެވެ. މީގެ އިތުރުން ލައިވް ކަވަރޭޖް ޕާޓްނަރަކަށް ޗޮކޮލެޓް ކެފޭ އެންޑް ބިސްޓްރޯ ހަމަޖައްސާފައިވާއިރު، އޮންލައިން މީޑިއާ ޕާޓްނަރަކީ ބޯޅަ.އެމްވީއެވެ.