އަންނަ މެއި މަހު ކޮރެއާގައި ފެށުމަށް ހަމަޖެހިފައިވާ އޭޝިއަން ޔޫތު ނެޓްބޯލް ޗެމްޕިއަންޝިޕުގައި އަމްޕަޔަރުކަން ކުރުމަށް ރާއްޖޭގެ ސީ ބެޖް ދެ އަމްޕަޔަރަކަށް ފުރުސަތު ލިބިއްޖެ އެވެ.
މި މުބާރާތުގައި އަމްޕަޔަރުކަން ކުރުމަށް ފުރުސަތު ލިބުނު ދެ އަމްޕަޔަރުންނަކީ ރިލްވާން އާދަމާއި ނަބީލް އިބްރާހީމެވެ. މީގެ ތެރެއިން ރިލްވާނަކީ މިދިޔަ އަހަރު އޮތް މި މުބާރާތުގައި ވެސް އަމްޕަޔަރުކަން ކޮށްފައިވާ ފަރާތެކެވެ.
ރާއްޖޭގެ ދެ އަމްޕަޔަރުންނަށް މި މުބާރާތުގައި ތަމްސީލް ކުރުމުގެ ފުރުސަތު ލިބުނީ މި މަހުގެ ކުރީކޮޅު ސިންގަޕޫރުގައި ކުރިއަށް ގެންދިޔަ އަމްޕަޔަރުން ތަމްރީނުކުރާ ޕްރޮގްރާމެއްގައި ބައިވެރިވެގެންނެވެ. މި ޕްރޮގްރާމުގައި ރާއްޖެއިން ހަތަރު އަމްޕަޔަރަކު ބައިވެރިވި އެވެ.
ރާއްޖެއެމްވީ އަށް މައުލޫމާތު ދެއްވަމުން ނެޓްބޯލް އެސޯސިއޭޝަންގެ ރައީސާ އައިމިނަތު ޝާޒްލީން (ޝާޒް) ވިދާޅުވީ މި މުބާރާތުގައި އަމްޕަޔަރުކަން ކުރުމުގެ ފުރުސަތު ރާއްޖޭގެ ދެ އަމްޕަޔަރަކަށް ލިބިގެންދިއުމަކީ މި ކުޅިވަރަށް ދެވޭ ސަމާލުކަން އިތުރުވެގެންދިޔަ ކަމެއް ކަމަށެވެ.
ޝާޒް ވިދާޅުވީ މިދިޔަ އަހަރުގެ މުބާރާތުގައި ރާއްޖޭގެ އެއް ފަރާތަކަށް މި މުބާރާތުގައި އަމްޕަޔަރުކަން ކުރުމަށް ފުރުސަތު ލިބުނު އިރު މިއަހަރު އެ އަދަދު އިތުރު ވެގެން ދިއުމުން ކުރިއަށް ނުކުންނަން ތިބި އަމްޕަޔަރުންނަށް އެކަމުން ހިތްވަރެއް ލިބިގެންދާނެ ކަމަށް އުންމީދުކުރާ ކަމަށެވެ.
މިއަހަރުގެ އޭޝިއަން ޔޫތު ނެޓްބޯލް ޗެމްޕިއަންޝިޕުގައި ރާއްޖޭގެ 21 އަހަރުންދަށުގެ ޓީމެއް ވާދަކުރުމަށް ވަނީ ހަމަޖެހިފަ އެވެ. އެގޮތުން އެޓީމުގެ ފައިނަލް ސްކޮޑު އެކުލަވާލައި މިހާރުވެސް ދަނީ ދެއިރަށް ފަރިތަކުރުންތައް ކުރިއަށް ގެންދަމުންނެވެ.
