އެކޮމޮޑޭޝަން ބްލޮކުން 1268 މީހުންނަށް ޖާގަ ދީފައިވާނެ: ޔޫތު މިނިސްޓްރީ
އޭގެ ތެރޭގައި 1047 ފިރިހެނުންނާއި 221 އަންހެނުން ހިމެނޭ
ޔޫތު އެކޮމޮޑޭޝަން ބްލޮކް މަރާމާތު ކުރަނީ
މިދިޔަ އަހަރު ގައުމީ ފުޓްބޯޅަ ދަނޑުގައި ހުންނަ އެކޮމޮޑޭޝަން ބްލޮކުން ޖުމްލަ 1268 މީހުންނަށް ޖާގަ ދީފައިވާނެ ކަމަށް ކުޅިވަރާ ބެހޭ ވުޒާރާ އިން ބުނެފި އެވެ.
އެކޮމޮޑޭޝަން ބްލޮކަކީ އަތޮޅުތެރެއިން އެކި ކުޅިވަރުތައް ކުޅުމަށް އަންނަ ފަރާތްތައް ތިބުމަށް ކުޅިވަރާ ބެހޭ ވުޒާރާ އިން ގާއިމްކޮށްފައިވާ ތަނެކެވެ.
ކުޅިވަރާ ބެހޭ ވުޒާރާ އިން ބުނީ، މިދިޔަ އަހަރުގެ ހިދުމަތް ހޯދި 1268 މީހުންގެ ތެރޭގައި ހިމެނެނީ 1047 ފިރިހެނުންނާއި 221 އަންހެނުން ކަމަށެވެ. މިހާރު ވެސް ބައެއް މީހުން އެތަނުގެ ހިދުމަތް ހޯދަމުންދާ ކަމަށް ވެސް އެ ވުޒާރާ އިން ބުނެފައިވެ އެވެ.
ކުޅިވަރާބެހޭ ވުޒާރާއިން ބުނީ އެކޮމޮޑޭޝަން ބްލޮކްގައި ތިބުމުގެ އިންތިޒާމް އެ ވުޒާރާ އިން ހަމަޖައްސައިދެނީ ކުޅިވަރު އެސޯސިއޭޝަންތަކުން އެކަމަށް އެދުމުން ކަމަށެވެ. އެގޮތުން ކުޅިވަރު މުބާރާތްތަކުގައި ބައިވެރިވުމަށް އަތޮޅުތެރެއިން އަންނަ ކުޅުންތެރިންނާއި އޮފިޝަލުން ތިބުމުގެ އިންތިޒާމް އެ ވުޒާރާ އިން ހަމަޖައްސައިދެ އެވެ.
މިދިޔަ އަހަރު ފެށި އެކޮމޮޑޭޝަން ބްލޮކް މަރާމާތުކުރުމުގެ މަސައްކަތް އަދި ވެސް ދަނީ ކުރެވެމުންނެވެ. އެތަން މަރާމާތުކުރުމުގެ މަސައްކަތް ވަރަށް އަވަހަށް ނިންމާލެވޭނެ ކަމަށް ކުޅިވަރާ ބެހޭ ވުޒާރާއިން ބުނެ އެވެ. އެކޮމޮޑޭޝަން ބްލޮކްއަކީ އެތަން ބޭނުންކުރާ ފަރާތްތަކުގެ އަތުން އެއްވެސް ފީއެއް ނެގުމަކާނުލައި ހިލޭ ހިދުމަތް ދެމުންދާތަނެކެވެ.
