އަންނަ މަހު ކޮރެއާގައި ފެށުމަށް ހަމަޖެހިފައިވާ އޭޝިއަން ޔޫތު ނެޓްބޯލް އެސޯސިއޭޝަން ޗެމްޕިއަންޝިޕުގައި ވާދަކުރާ ރާއްޖޭގެ ނެޓްބޯލް ޓީމުގެ އަމާޒަކީ ތަޖުރިބާ ހޯދައި ލެވެލް މަތިކުރުން ކަމަށް ނެޓްބޯލް އެސޯސިއޭޝަނުން ބުނެފި އެވެ.

މި މުބާރާތުގައި ވާދަކުރުމަށް މި އަހަރުގެ ޖެނުއަރީ މަހު ފަރިތަކުރުންތައް ފަށާފައިވާ އިރު، ހޯމަ ދުވަހު ޓީމުގެ ފައިނަލް ސްކޮޑު އިއުލާނުކުރާނެ ކަމަށް އެ އެސޯސިއޭޝަނުން ބުނެ އެވެ.

މުބާރާތަށް ޓީމު ވަމުންދާ ތައްޔާރީތަކާ ބެހޭ ގޮތުން ނެޓްބޯލް އެސޯސިއޭޝަންގެ ސީއޯއޯ އަހުމަދު އަދުހަމް ވިދާޅުވީ ޓީމުގެ ފަރިތަކުރުންތައް ކޮންމެ ދުވަހެއްގެ ވެސް ހެނދުނާއި ރޭގަނޑު ކުރިއަށްދާ ކަމަށެވެ.

އަދުހަމް ވިދާޅުވީ މިހާރު ޓީމުގައި ތިބި ކުޅުންތެރިންނަކީ ހުނަރުވެރި ޒުވާން ކުޅުންތެރިން ތަކެއް ކަމަށާއި އެގޮތުން ޓީމުގެ ފައިނަލް ސްކޮޑު އެކުލަވާލުމުގައި ގޮންޖެހުންތަކެއް ކުރިމަތިވާނެ ކަމަށެވެ.

"ޓީމު އެއްކޮށް ވަރަށް ބުރަކޮށް ފަރިތަކުރުންތައް ކުރިއަށްގެންދަނީ، ކޮންމެ މަހަކު އެއްފަހަރު ބީޕް ޓެސްޓްވެސް އެބަ ޖައްސުވަން، ވަރަށް ފިޓު ކުޅުންތެރިން، ސްކޮޑު އެކުލަވާލުމުގައި ގޮންޖެހުންތަކާ ދިމާވާނެ، އެކަމަކު ހުރިހާ ގޮތަކަށް ބަލާފަ އެންމެ ރަނގަޅު ކުޅުންތެރިން ހޮވޭނީ." އަދުހަމް ވިދާޅުވި އެވެ.

އަދުހަމް ވިދާޅުވީ މިފަދަ ބޮޑު މުބާރާތަކަށް ޓީމު ތައްޔާރުވާއިރު، އެ ކުޅުންތެރިންނަށް މެޗު އެކްސްޕީރިއަންސް ތަކެއް ބޭނުންވާނެ ކަމަށާއި އެހެން ނަމަވެސް މިވަގުތު އެސޯސިއޭޝަންގެ ބަޖެޓު ތަން ނުދިނުމުގެ ސަބަބުން ބޭރުން ތަމްރީނު ދަތުރެއް ހަމަޖެހިފައި ނުވާ ކަމަށެވެ. އެހެން ނަމަވެސް އަމިއްލަ ގައުމުގައި ކުރިއަށްދާ ފަރިތަކުރުންތަކުން ބޮޑު ކުރިއެރުމެއް ލިބޭނެ ކަމަށް އުންމީދުކުރާ ކަމަށް ވެސް އަދުހަމް ވިދާޅުވި އެވެ.

ރާއްޖޭގެ ނެޓްބޯޅަ އަންހެން ޓީމު ވަނީ މީގެ ކުރިން ވެސް ބޮޑު މުބާރާތެއްގައި ވާދަކޮށް ރަނގަޅު ހިސާބަކަށް ދަތުރުކޮށްފަ އެވެ. އޭރު ޓީމުގައި ވެސް ޒުވާން ކުޅުންތެރިން ހިމެނުނު އިރު، އޭގެ ތެރެއިން ބައެއް ކުޅުންތެރިން މިފަހަރުގެ ޓީމުގައި ވެސް ހިމެނެ އެވެ.

ކޮރެއާގައި އަންނަ މަހުގެ 6 ވަނަ ދުވަހު ފެށުމަށް ހަމަޖެހިފައިވާ މި މުބާރާތުގައި ވާދަކުރުމަށް ނެޓްބޯލް ޓީމު ފުރުމަށް ހަމަޖެހިފައި ވަނީ މެއި މަހުގެ 3 ވަނަ ދުވަހު އެވެ.