ތ.އަތޮޅުގެ ޗެމްޕިއަންކަން ތިމަރަފުއްޓަށް

ތަފާތު ބޮޑު ނަތީޖާއަކުން ވިލުފުށި ބަލިކޮށް، އެސްޓީއޯ މިނިވަން ޗެމްޕިއަންޝިޕް ފުޓުބޯޅަ މުބާރާތުގެ ތ.އަތޮޅުގެ ޗެމްޕިއަންކަން ތިމަރަފުށިން ހޯދައިފިއެވެ.

ތ.އަތޮޅުގެ ފައިނަލުގައި މިދެޓީމް ބައްދަލުކުރި މެޗް ތިމަރަފުށިން ކާމިޔާބުކުރީ 5-0 ގެ ނަތީޖާއަކުންނެވެ. މެޗުގެ ތިމަރަފުށީގެ ބިދޭސީ ކުޅުންތެރިޔާ ކައޮޑިއޯ ޔާއޯ އާންގޭގެ ފަރާތުން ވަނީ މޮޅު ކުޅުމެއް ފެނިގެން ގޮސްފައެވެ.

މެޗުގެ ފުރަތަމަ ހާފުވެސް އެޓީމުން ނިންމާލީ 2-0 ގެ ނަތީޖާއަކުންނެވެ. މި ދެ ލަނޑުވެސް އެޓީމަށް ކާމިޔާބުކޮށްދިނީ މެޗުގެ މޮޅު ކުޅުންތެރިޔާގެ މަގާމު ހޯދި ކައޮޑިއޯ ޔާއޯ އާންގޭގެ އެވެ. ފުރަތަމަ ލަނޑު އޭނާ ކާމިޔާބު ކޮށްފައިވަނީ 33 ވަނަ މިނެޓުގައެވެ. އޭގެ 10 މިނެޓުފަހުން އެނާ ވަނީ ދެވަނަ ލަނޑު ކާމިޔާބުކޮށްދީ ތިމަރަފުއްޓަށް ލީޑު އިތުރަށް ފުޅާކޮށްދީފައެވެ. ފުރަތަމަ ހާފު އެޓީމުން ނިންމާލީ ލީޑު ގައި އޮވެގެންނެވެ.

ދެވަނަ ހާފު ފެށިގެން 5 ވަނަ މިނެޓުގައި ކައޮޑިއޯ ވަނީ 3 ވަނަ ލަނޑާއެކު ހެޓްރިކް ފުރިހަމަ ކޮށްފައެވެ. އޭގެ ފަހުން 58 ވަނަ މިނެޓުގައި ޝާމިލް އަލީ ހަސަން ވަނީ 4 ވަނަ ލަނޑު ކާމިޔާބުކޮށްދީ ލީޑު އިތުރަށް ފުޅާކޮށްފައެވެ. އެޓީމުގެ ފަހު ލަނޑު އަދި 5 ވަނަ ލަނޑު 82 ވަނަ މިނެޓުގައި އެޓީމަށް ކާމިޔާބުކޮށްދިނީ އަހުމަދު ތާހިރު އެވެ.

ތ.އަތޮޅުގެ ޗެމްޕިއަންކަން ތިމަރަފުށިން ހޯދުމާއެކު އެޓީމަށް ދެން ޖެހޭނީ ޒޯން ބުރުގައި ކުޅޭށެވެ.